ރީތިރަށް ރިސޯޓް ޕްރައިވެޓް ލިމިޓެޑް ވ. މަޢުރޫފް ޛާކިރު

ވަޒީފާއާބެހޭ ޓްރައިބިއުނަލުގެ ނިންމުމުގައި މުވައްޒަފަކީ ވަކިވެފައިވާ މުވައްޒަފެއްކަމުގައި ނުބެލުމަށް އަންގާފައިވާނަމަ، އެމައްސަލަ ޓްރައިބިއުނަލުން ނިންމި ތާރީޚުން ފެށިގެން ވަޒީފާއަށް ޢަމަލީގޮތުން މުވައްޒަފު ނެރެންދެން، އޭނާ ވަޒީފާއަށް ނިކުމެ ޢަމަލީގޮތުން މަސައްކަތް ނުކުރިނަމަވެސް އޭނާ އެހުރީ މުވައްޒަފެއްގެ ޙައިސިއްޔަތު ލިބިގެންވާ ގޮތުގައި ކަމަށް ބަލަންޖެހޭނެއެވެ. ޢަމަލީގޮތުން މަސައްކަތަށް ނުކުތުމަށް އެންގުމުގެ ފަހަށް ވަޒީފާދޭ ފަރާތުގެ މުވައްޒަފުންގެ މައްޗަށް ހިންގޭ އެންމެހައި އުސޫލުތައް އޭނާގެ މައްޗަށްވެސް ހިނގާނެއެވެ. (ޕެރ. 3(ރ))

ވަޒީފާއާބެހޭ ޤާނޫނުގައިވެސް އަދި ވަޒީފާއާބެހޭ ޤަވާޢިދެއްގައިވެސް 'ރީއިންސްޓޭޓް' ނުވަތަ ވަޒީފާ އަނބުރާ ރުޖޫޢަކުރުމަކީ ކޮބައިކަން ބަޔާންކޮށްދީފައިނެތުމުން، ވަޒީފާ އަނބުރާ ރުޖޫޢަކުރުމަކީ ކޮބައިކަން ކަނޑައެޅުމުގައި މައްސަލައިގެ ވަށައިގެން ހުރި ކަންކަމުގެ މައްޗަށް ބަލައި، އެއީ ވަޒީފާއަށް އަނބުރާ ރުޖޫޢަކުރުންކަން ނުވަތަ ނޫންކަން ކަނޑައެޅިދާނެއެވެ. (ޕެރ. 3(ރ))

ވަޒީފާއާބެހޭ މިފަދަ މައްސަލަތަކުގައި ވަޒީފާ އަނބުރާ ރުޖޫޢަކުރުމުގެ ޙަޤީޤީ މަޤްޞަދަކަށްވާންވާނީ މުވައްޒަފަކަށް ވަޒީފާގެ ޔަޤީންކަން ކަށަވަރުކުރެވުމާއެކު، އެމީހަކު ކުރިން އަދާކުރަމުންދިޔަ ވަޒީފާގައި ލިބެމުންދިޔަ އެންމެހައި މުސާރައާއި ޢިނާޔަތްތައް އެގޮތުގެ މަތިން އަލުން ލިބުމަށް މަގުފަހިކުރުމެވެ. ވަޒީފާއަކަށް އަނބުރާ ރުޖޫޢަކުރުން މާނަކުރާއިރު، ވަޒީފާދޭ ފަރާތާއި މުވައްޒަފުގެ ޙައްޤުތަކަށްވެސް އުނިކަން ނާންނާނެ ގޮތެއްގެ މައްޗަށް، އެދެފަރާތުގެ ޙައްޤުތައްވެސް ޙިމާޔަތްކުރެވިދާނެ ގޮތެއްގެ މައްޗަށް އެކަން މާނަކުރަންޖެހޭނެއެވެ. (ޕެރ. 3(ރ))

ހޭދަވެފައިވާ މުއްދަތަށާއި، އެފަދަ މަޤާމެއް ވަޒީފާދޭ ފަރާތުގައި އެހިނދަށް އޮތްކަން ނުވަތަ ނޫންކަމުގެ މައްޗަށާއި، ހުސްވެފައިވާ މަޤާމަށް އެހެން މީހަކު ޢައްޔަންކުރެވިފައިވާނަމަ އެކަމުގެ މައްޗަށް ރިޢާޔަތްކޮށްބަލައި، ރީއިންސްޓޭޓް ކުރުމަކީ ނުވަތަ ވަޒީފާ އަނބުރާ އިޢާދަކުރުމަކީ ކޮންމެހެން މުވައްޒަފަކު ކުރިން ހުރި މަޤާމަށް އަނބުރާ އިޢާދަކުރުން ނޫންކަމުގައިވެސް ބެލިދާނެއެވެ. އެހެންނަމަވެސް ވަޒީފާދޭ ފަރާތުން މުވައްޒަފަށް އެހެން ވަޒީފާއެއް ހުށަހަޅާއިރު، ކުރިން ހުރި ވަޒީފާގައި ލިބެމުންދިޔަ މުސާރައާއި ޢިނާޔަތްތަކާއި އެފަދަ އެހެނިހެން ކަންކަމަށް އުނިކަން އައިސްފައިވޭތޯ ބަލައި، އެއީ ވަޒީފާ އަނބުރާ އިޢާދަކުރީކަމުގައި ނުވަތަ ނޫންކަމުގައި ކަނޑައެޅިދާނެއެވެ. (ޕެރ. 3(ރ))

މުވައްޒަފަކީ ވަޒީފާއިން ވަކިވެފައިވާ މީހެއްކަމަށް ނުބެލުމަށް ކަނޑައަޅައި، އަނބުރާ ވަޒީފާއަށް ނިކުންނަންދެން ލިބެންޖެހޭ މުސާރައާއި ޢިނާޔަތްތައް ދިނުމަށް ވަޒީފާއާބެހޭ ޓްރައިބިއުނަލުންނާއި ކޯޓުން އެންގި އެންގުމާއި އެއްގޮތަށް އެ މުސާރައާއި ޢިނާޔަތްތައް ލިބިދެވުމަށްފަހު، އަނބުރާ ވަޒީފާއަށް ނިކުތުމަށް ވަޒީފާދޭ ފަރާތުން މުވައްޒަފަށް އެންގުމުން، ވަޒީފާދޭ ފަރާތުން ވަޒީފާއާބެހޭ ޓްރައިބިއުނަލާއި ކޯޓުގެ ޙުކުމާއި އެއްގޮތަށް އެހިނދަށް ޢަމަލުކޮށް ނިމުނީކަމުގައި ބެލެވޭނެއެވެ. (ޕެރ. 3(ބ))

ކުރިން އަދާކުރަމުންދިޔަ މަޤާމަށް ހަމަޖެއްސުނުކަން އެންގުމުގެ ފަހުން މުވައްޒަފު އެހެން މަޤާމަކަށް ބަދަލުކުރިކަމަށް ބުނާ ބުނުމާއި، ފަހުން ބަދަލުކުރި މަޤާމަކީ މަޤާމު ރުޖޫޢަކުރުން ނޫންކަމަށް ބުނާ ބުނުމާއި، ފަހުން ބަދަލުކުރެވުނު މަޤާމުގެ މުސާރައާއި ޢިނާޔަތްތަކާއިމެދު ހިތްހަމަ ނުޖެހުމާއި، މިފަދަ ކަންކަމަކީ ވަޒީފާއާބެހޭ ޓްރައިބިއުނަލްގެ އިޚްތިޞާޞް އެހިނދުން ފެށިގެން ހިނގާނެ ވަޒީފާއާގުޅޭ ކަންތައްތަކެކެވެ. އެކަންކަމަކީ ސިވިލް ކޯޓުގެ އިޚްތިޞާޞް ހިނގާނެ ކަންކަމެއް ނޫނެވެ. (ޕެރ. 3(ބ))