—

ވަޒީފާއާބެހޭ ޤާނޫނުގެ ނޯޓިސް ނުދީ ވަކިކުރުމާބެހޭ މާއްދާގައިވާ ގޮތުގެމަތިން ނޯޓިހެއް ދިނުމަކާއިނުލައި މުވައްޒަފަކު ވަޒީފާއިން ވަކިކުރެވޭނީ، އެމާއްދާގައިވާ ދެ ޝަރުޠު ފުރިހަމަވެގެންނެވެ. އެއީ: (1) އޭނާގެ މަސައްކަތުގެ އަޚްލާޤު އެކަށީގެންނުވުމާއި، (2) އެމުވައްޒަފަކު ވަޒީފާގައި އިތުރަށް ބެހެއްޓުމަކީ، އެކަށީގެންވާ ހަމަތަކަށް ބަލާއިރު، ކުރެވޭނެ ކަމެއްކަމަށް ވަޒީފާދޭ ފަރާތަށް ނުފެނުމެވެ. (ޕެރ. 03 (ށ))

މުވައްޒަފެއްގެ މަސައްކަތުގެ އަޚްލާޤު އެކަށީގެންނުވާކަމަށް ކަނޑައެޅޭނީ، އެމުވައްޒަފަކު ވަޒީފާގައި އިތުރަށް ބެހެއްޓުމުން ވަޒީފާދޭ ފަރާތަށް ނުވަތަ ވަޒީފާ އަދާކުރާ ތަނަށް ގެއްލުންތަކެއް ލިބިދާނެކަމަށް ވަޒީފާދޭ ފަރާތަށް ފެންނަ ޙާލަތުގައި ނުވަތަ އެމުވައްޒަފަކު ޚިޔާނަތްތެރިވެފައިވާ ޙާލަތުގައެވެ. (ޕެރ. 03 (ށ))

މުވައްޒަފެއްގެ މަސައްކަތުގެ އަޚްލާޤު ރަނގަޅު ނޫންކަމަށް ވަޒީފާދޭ ފަރާތުން ނިންމުމުގައި އެނިންމުމަށް ވާޞިލުވުމަށް ވަޒީފާދޭ ފަރާތުން ތަޠުބީޤުކުރި ހަމައަކީ އެކަށީގެންވާ ހަމައެއްކަމަށް ވާންޖެހޭނެއެވެ. ހަމައެފަދައިން، "އެމުވައްޒަފަކު ވަޒީފާގައި އިތުރަށް ބެހެއްޓުމަކީ، އެކަށީގެންވާ ހަމަތަކަށް ބަލާއިރު، ކުރެވޭނެކަމެއްކަމަށް ވަޒީފާދޭ ފަރާތަށް ނުފެނުން" ވެސް ފުރިހަމަވާނީ އެކަމަށް ވަޒީފާދޭ ފަރާތަށް ނުފެނުނު ހަމައަކީވެސް އެކަށީގެންވާ ހަމައަކަށް ވެގެންނެވެ. (ޕެރ. 03 (ށ))

ވަޒީފާއާބެހޭ ޤާނޫނުގެ ސާބިތުކުރުމުގެ ޒިންމާއާބެހޭ މާއްދާގައި ޤާއިމުކޮށްފައިވާ އުޞޫލަށާއި މުޅި ޤާނޫނުގެ ރޫޙަށް ބަލާއިރު، ނޯޓިސް ނުދީ ވަކިކުރުމަށް ފުރިހަމަކުރަންޖެހޭ ދެ ޝަރުޠު ފުރިހަމަކުރުމުގައި ވަޒީފާދޭ ފަރާތުން ތަޠުބީޤުކޮށްފައިވާ ހަމައަކީ އެކަށީގެންވާ ހަމައެއްކަން ސާބިތުކުރުމަކީ ވަޒީފާދޭ ފަރާތުގެ ޒިންމާއެއްކަމަށް ބަލަންޖެހޭނެއެވެ. (ޕެރ. 03 (ށ))

ވަޒީފާއާބެހޭ ޤާނޫނުގެ ތަރަހައިގެ ތެރޭގައި ހިމެނޭ މުވައްޒަފަކު ވަޒީފާއިން ވަކިކުރެވޭނީ، އެމުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަމާއި އިޖްރާއީ ޢަދުލުވެރިކަން ޤާއިމުކުރުމަށްފަހުއެވެ. މައުޟޫޢީ ޢަދުލުވެރިކަމަކީ މުވައްޒަފަކު ވަޒީފާއިން ވަކިކުރެވުނު ސަބަބަކީ ޢަދުލުވެރި ނުވަތަ އެކަށީގެންވާ ސަބަބެއްކަމަށް ވުމެވެ. އިޖްރާއީ ޢަދުލުވެރިކަމަކީ މުވައްޒަފަކު ވަޒީފާއިން ވަކިކުރުމުގެ ކުރިން ފުރިހަމަ ކޮށްފައިވާ އިޖްރާއާތަކީ ޢަދުލުވެރި އިޖްރާއާތަކަށް ވުމެވެ. (ޕެރ. 03 (ށ))

ނޯޓިސް ނުދީ މުވައްޒަފަކު ވަޒީފާއިން ވަކިކުރުމުގައި ޤާއިމުކުރަންޖެހޭ އިޖްރާއީ ޢަދުލުވެރިކަން ޤާއިމްކުރެވިފައިވާކަމަށް ޢާންމު އުޞޫލެއްގެ ގޮތުން ބެލެވޭނީ، ވަކިކުރުމުގެ ކުރިން، މުވައްޒަފުގެ މައްޗަށް ތުހުމަތުކުރެވިފައިވާ މައްސަލައިގެ މަޢުލޫމާތު އޭރަކު ދެވެން ހުންނަ ހުރިހާ ތަފްޞީލަކާއެކު އޭނާއަށް ދީފައިވުމުގެ އިތުރުން، އެތުހުމަތުތަކާމެދު ޖަވާބުދާރީވުމުގެ ފުރުޞަތު އޭނާއަށް ދިނުމަށްފަހު، އެމައްސަލައެއް ތަޙްޤީޤުކުރުމަށްފަހު، ފުރިހަމަވާންޖެހޭ ދެ ޝަރުޠު ފުރިހަމަވެފައިވާކަމަށް އެކުރެވޭ ތަޙްޤީޤަކަށް ފެނިފައިވުމުގެ އިތުރުން، ޖަވާބުދާރީވުމަށް ދެވުނު ފުރުޞަތުގައި އޭނާ އެދިފައިވާނަމަ، އޭނާ ކަނޑައެޅި މީހެއްގެ އެހީތެރިކަން ހޯދުމުގެ ފުރުޞަތުވެސް އޭނާއަށް ދެވިފައިވާނަމައެވެ. (ޕެރ. 03 (ށ)، (ނ))

ވަޒީފާދޭ ފަރާތުން ދީފައިވާ އިންސްޓްރަކްޝަންތަކަށް ސަމާލުކަން ނުދީ، މުވައްޒަފެއްގެ އިހުމާލުން ރިސޯޓުގެ ގެސްޓެއްގެ ފުރާނައަށް ނުރައްކާތެރިވާފަދަ ހާދިސާއެއް ހިނގުމަކީ ރިސޯޓުގެ ޢާއްމު މަޞްލަޙަތަށް ގެއްލުން ލިބިދާނެ ކަމެއް ކަމުން، އެއީ ވަޒީފާއާބެހޭ ޤާނޫނުގެ ނޯޓިސް ނުދީ ވަކިކުރުމާބެހޭ މާއްދާގެ ދަށުން މުވައްޒަފަކު ވަޒީފާއިން ވަކިކުރުމަށް އެކަށީގެންވާ ސަބަބެކެވެ. (ޕެރ. 03 (ނ))