—

އެއްބަސްވުމެއްގެ ދަށުން މުޢާމަލާތެއް ހިންގިކަމާމެދު ދަޢުވާލިބޭ ފަރާތުން އިންކާރު ނުކުރާނަމަ، އެމުޢާމަލާތާއި ގުޅިގެން ދައްކަންޖެހޭ އެންމެހައި ފައިސާއެއް ދެއްކިކަން ސާބިތުކުރުމުގެ ބުރަ އުފުލަންޖެހޭނީ ދަޢުވާލިބޭ ފަރާތުންނެވެ. (ޕެރ. 03(ށ))

ދަޢުވާލިބޭ ފަރާތާއި ތިންވަނަ ފަރާތެއްކަމުގައިވާ ކުންފުންޏަކާއެކު ސޮއިކޮށްފައިވާ ލިޔުމެއްގެ ދަށުން ވެފައިވާ އެއްބަސްވުމަކީ ދަޢުވާކުރާ ފަރާތާއިއެކު ވެފައިވާ އެއްބަސްވުމެއް ނޫނެވެ؛ އެއީ ޤާނޫނީ އެހެން ޝަޚްޞަކާ ވެފައިވާ އެއްބަސްވުމެކެވެ. (ޕެރ. 03(ނ))

ގަންނަ ޓިކެޓްގެ އިންވޮއިސް ލިބުމުން އެ އިންވޮއިސްގައިވާ ޢަދަދަށްވާ ފައިސާ ކްރެޑިޓް ލިމިޓަށް ބެލުމެއްނެތި އިންވޮއިސް ލިބޭތާ 10 ދުވަހުގެ ތެރޭގައި ދައްކަންޖެހޭނެކަމަށް އެއްބަސްވުމުގައި ބަޔާންވެގެން އޮވެ، އިންވޮއިސްގައި ފައިސާދައްކަންޖެހޭކަމަށް ބުނާ މުއްދަތުގައި ޝަކުވާއެއް ހުށަހަޅާފައިނުވާ ހިނދު، އަދި ކްރެޑިޓް ލިމިޓަށްވުރެ އިތުރަށް ޓިކެޓް ދޫކުރެވިފައިވަނީ ގަތް ފަރާތުގެ އެދުމުގެ މަތިންކަމާމެދު އެފަރާތުން އިންކާރުކޮށްފައިނުވާނަމަ، އެފަރާތުގެ އެދުމުގެ މަތިން ވިއްކާފައިވާ އެންމެހައި ޓިކެޓްތަކަށް އިންވޮއިސް ކުރެވިފައިވާ ފައިސާއަކީ އެފަރާތުން ދައްކަންޖެހޭ ފައިސާކަން މަދަނީ މިންގަނޑުން ސާބިތުވާނެއެވެ. (ޕެރ. 03(ރ))

ޢާއްމު އުޞޫލެއްގެ ގޮތުން ވިޔަފާރީގެ މުޢާމަލާތްތަކާއި ގުޅިގެން ފައިސާ ދެއްކުމުގައި ޢަމަލުކުރަމުންދާ ގޮތަކީ ފައިސާ ދެއްކުމަށް އެއްބަސްވެފައިވާ ކުންފުންޏަކަށް އަދި އެފައިސާ ހޯދުމަށް އެދި އިންވޮއިސް ފޮނުވާ ކުންފުންޏަކަށް އެފައިސާއެއް ދައްކަންޖެހުމެވެ. އެނޫންގޮތަކަށް އެކަން ކުރާނީ ފައިސާ ލިބެންޖެހޭ ފަރާތުން އެނޫންގޮތަކަށް ޢަމަލުކޮށް ދިނުމަށް އެދި ފައިސާ ދައްކަންޖެހޭ ފަރާތުގައި އެދޭ އެދުމެއްގެ މައްޗަށް ބިނާކޮށްގެންނެވެ. (ޕެރ. 03(ބ))

ފައިސާ ލިބެންޖެހޭ ފަރާތުގެ އެދުމުގެ މަތިން ތިންވަނަ ފަރާތަކަށް ފައިސާ ދެއްކިކަން އެނގެން ނެތް ހިނދު، އަދި އެ ތިންވަނަ ފަރާތަށް ދެއްކިކަމަށް ބުނެ ހުށަހަޅާ ޕޭމަންޓް ވައުޗަރގައި އެއީ އެ ތިންވަނަ ފަރާތުން ފޮނުވި އިންވޮއިސްއަކަށް ދައްކާ ޕޭމަންޓެއްކަމަށް ބަޔާންވެގެން އޮތްނަމަ، އެ ލިޔުމުގައިވާ ފައިސާއަކީ ފައިސާ ލިބެންޖެހޭ ފަރާތުން ފޮނުވި އިންވޮއިސްތަކާއި ގުޅިގެން ދެއްކި ފައިސާއެއްކަން ސާބިތުވާން ނެތެވެ. (ޕެރ. 03(ބ))