—

މުވައްޒަފަކު ވަޒީފާއިން ވަކިކުރުމާއި ގުޅިގެން އެމުވައްޒަފަކު ހުށަހަޅާ ޝަކުވާއެއް ނުވަތަ ދަޢުވާއެއްގައި، އޭނާ ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށް ދިނުމަކީ ވަޒީފާއާބެހޭ ޤާނޫނުގެ 29 ވަނަ މާއްދާގައި ބަޔާންކޮށްފައިވާ ޙާލަތްތައް ފިޔަވައި، އެހެނިހެން ޙާލަތްތަކުގައި ވަޒީފާދޭ ފަރާތުގެ ޒިންމާއެކެވެ. (ޕެރ. 3(ހ))

ނޯޓިހެއް ދިނުމަކާއި ނުލައި މުވައްޒަފަކު ވަޒީފާއިން ވަކިކުރެވޭނީ އޭނާގެ މަސައްކަތުގެ އަޚްލާޤު އެކަށީގެން ނުވުމާއެކު، އޭނާ ވަޒީފާގައި އިތުރަށް ބެހެއްޓުމަކީ އެކަށީގެންވާ ހަމަތަކަށް ބަލާއިރު ކުރެވޭނެކަމެއްކަމަށް ވަޒީފާދޭފަރާތަށް ނުފެންނަ ޙާލަތުގައެވެ. މަސައްކަތުގެ އަޚްލާޤު އެކަށީގެން ނުވާކަމަށް ކަނޑައެޅޭނީ، ވަޒީފާގައި އިތުރަށް ބެހެއްޓުމުން ވަޒީފާދޭ ފަރާތަށް ނުވަތަ ވަޒީފާ އަދާކުރާ ތަނަށް ގެއްލުންތަކެއް ލިބިދާނެކަމަށް ވަޒީފާދޭ ފަރާތަށް ފެންނަ ޙާލަތުގައި ނުވަތަ އެމުވައްޒަފަކު ޚިޔާނާތްތެރި ވެފައިވާ ޙާލަތުގައެވެ. (ޕެރ. 3(ށ))

މުވައްޒަފެއްގެ މަސައްކަތުގެ އަޚްލާޤު ރަނގަޅު ނޫންކަމަށް ވަޒީފާދޭ ފަރާތުން ނިންމުމުގައި، އެނިންމުމަށް ވާސިލުވުމަށް ވަޒީފާދޭ ފަރާތުން ތަޠްބީޤުކުރި ހަމައަކީ އެކަށީގެންވާ ހަމައެއްކަމަށް ވާންޖެހޭނެއެވެ. އަދި އެ ހަމައަކީ އެކަށީގެންވާ ހަމައެއްކަން ސާބިތުކުރުމަކީ ވަޒީފާދޭ ފަރާތުގެ ޒިންމާއެކެވެ. (ޕެރ. 3(ށ))

ޢާންމު އުޞޫލެއްގެ ގޮތުން މުވައްޒަފަކު ވަޒީފާއިން ވަކިކުރެވޭނީ، އެމުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަން (substantive fairness) އާއި އިޖްރާއީ ޢަދުލުވެރިކަން (procedural fairness) ޤާއިމުކުރުމަށް ފަހުގައެވެ. (ޕެރ. 3(ށ))

މުވައްޒަފަކު ވަޒީފާއިން ވަކިކުރުމުގައި، މުވައްޒަފުގެ ފަރާތުން ކުޅަ ޢަމަލުތައް ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކޮށްފައިވާ ޖިނާއީ މިންގަނޑުން ސާބިތުވުމަކީ ލާޒިމުކަމެއް ނޫނެވެ. ވަޒީފާދޭ ފަރާތުން ބަލަންޖެހޭނީ މަދަނީ އަދި އިދާރީ ފިޔަވަޅެއް އެޅުމަށްޓަކައި ސާބިތުކުރަން އޮންނަ މިންގަނޑުން، އެބަހީ ހެކިތަކާއި ޤަރީނާތައް ވަޒަންކޮށް ބަލާއިރު ބޮޑަށް ބުރަވެވޭ ގޮތުން (balance of probabilities) އެކަމެއް ސާބިތުވޭތޯއެވެ. (ޕެރ. 3(ނ))

ރިސޯޓަށް އަންނަ ގެސްޓުންގެ ޚިދުމަތުގައި ތިބޭ މުވައްޒަފުން، އެ ގެސްޓުންނަށް ޚިދުމަތް ދޭންތިބޭ ގަޑީގައި އެ ޚިދުމަތަށް ބުރޫ އަރާގޮތަށް ޢަމަލުކުރުމަކީ މަސައްކަތުގެ އަޚްލާޤާ އެކަށީގެން ނުވާ ކަމެއްކަމުގައި ބެލެވެން އޮވެއެވެ. (ޕެރ. 3(ނ))

މުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަމުގެ އިތުރަށް އިޖްރާއީ ޢަދުލުވެރިކަންވެސް ޤާއިމުވެފައިވާންޖެހޭނެއެވެ. އިޖްރާއީ ޢަދުލުވެރިކަމަކީ، ވަޒީފާއިން ވަކިކުރުމުގެ ކުރިން ފުރިހަމަ ކޮށްފައިވާ އިޖްރާއާތަކީ ޢަދުލުވެރި އިޖްރާއާތަކަށްވުމެވެ. (ޕެރ. 3(ރ))

ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުން މުވައްޒަފަކު ވަކިކުރުމުގައި އިޖްރާއީ ޢަދުލުވެރިކަން ޤާއިމުކުރެވިފައިވާކަމަށް ޢާންމު ޙާލަތުތަކުގައި ކަނޑައެޅޭނީ، ވަޒީފާދޭ ފަރާތުން އެންމެ ކުޑަމިނުން: (1) ތުހުމަތުކުރެވިފައިވާ ކަމަކާބެހޭ މަޢުލޫމާތު އެމުވައްޒަފަކަށް ދިނުމަށްފަހު، (2) އެ ތުހުމަތަކާމެދު ޖަވާބުދާރީވުމުގެ ފުރުސަތު ދިނުމަށްފަހު، (3) އެމައްސަލައެއް އިދާރީގޮތުން ތަޙްޤީޤުކުރުމަށްފަހު، (4) 23 ވަނަ މާއްދާގެ ދެ ޝަރުޠު ފުރިހަމަވާކަމަށް ތަޙްޤީޤަށް ފެނިގެން ވަކިކުރަން ނިންމައިފިނަމަ ވަކިކުރި ސަބަބުތަކާއެކު އެމުވައްޒަފަކަށް އަންގާފައިވާނަމައެވެ. އަދި ޖަވާބުދާރީވުމަށް ދެވޭ ފުރުސަތުގައި، މުވައްޒަފަކު އެދިއްޖެނަމަ، އޭނާ ކަނޑައަޅާ މީހެއްގެ އެހީތެރިކަން ހޯދުމުގެ ފުރުޞަތުވެސް ދެވެންޖެހޭނެއެވެ. (ޕެރ. 3(ރ))