ދިލާސާ ފާއިޒް ވ. ެޓަރނީ ޖެނެރަލްގެ އޮފީސް (އައްޑޫ ސިޓީ ކައުންސިލްގެ އިދާރާ

މުދަލެއް ތަރިކައިގައި ހިމެނޭ ތަކެތި ނޫންކަމަށް ކޯޓުން ނިންމާފައިވާއިރު، އެ ނިންމުން ރަނގަޅުނޫންކަމަށް ބުނެ އެނިންމުން އިސްތިއުނާފު ކުރުމަށް ހުށަހަޅާފައިނުވާނަމަ، އެނިންމުން އެގޮތުގައި ވުޖޫދުވެ އޮތްކަމުގައި ބަލަންޖެހެއެވެ. (ޕެރ. 3(ށ))

ޤާނޫނުގައިވާ ގޮތުގެ މަތިން ދައުލަތުގެ ކަމާބެހޭ އިދާރާއަކުން، މީހެއްގެ ނަމުގައި މުދަލެއް ރަޖިސްޓްރީކޮށް އެކަން ކަށަވަރު ކުރުމަށް އެފަދަ އިދާރާއަކުން ދޫކޮށްފައިވާ ރަސްމީ ރަޖިސްޓްރީއަކީ، އެ މުދަލުގެ މިލްކުވެރިކަން އެ މުދަލެއް އެ މީހެއްގެ ނަމުގައި ރަޖިސްޓްރީ ކުރެވިފައިވާ މީހަކަށް އޮތްކަން ކަށަވަރުކަމާއި ޔަޤީންކަމާއެކު ހާމަކޮށްދެނިވި، އެންމެންގެ މައްޗަށް އޮތް ދަލީލެކެވެ. ޤާނޫނީ ގޮތުން ރަޖިސްޓްރީ ކުރުން ލާޒިމުވާ ފަދަ މުދަލެއް ރަސްމީ ގޮތުން ރަޖިސްޓްރީ ކުރެވިއްޖެ ނަމަ، އެކަން ކަށަވަރުކޮށްދޭ ރަސްމީ ރަޖިސްޓްރީއަކީ، އެއްވެސް ޝައްކެއް ނެތި އެ މުދާ އެ މީހެއްގެ ނަމުގައި ރަޖިސްޓްރީކޮށްފައިވާ މީހަކީ އެ މުދަލުގެ މިލްކުވެރި ފަރާތްކަން އެނގޭ ޔަޤީނީ ދަލީލެކެވެ. (ޕެރ. 3(ނ))

މިލްކެއް މީހެއްގެ ނަމުގައި ދައުލަތުގެ ކަމާބެހޭ އިދާރާއަކުން ޤާނޫނުގައިވާ ގޮތުގެ މަތިން ރަޖިސްޓްރީކޮށް އެކަން ކަށަވަރުކޮށްދިނުމުގެ ގޮތުން ދޫކުރާ ރަސްމީ ރަޖިސްޓްރީގެ ލިޔުމަކީ، ޝަރީޢަތުން ކަންކަން ސާބިތު ކުރުމުގެ މުޠުލަޤު ބާރު އެއަށް ލިބިފައިވާ ވަޞީލަތްތަކުގެ ތެރޭގައި ހިމެނޭ ވަޞީލަތެކެވެ. އެފަދަ ލިޔުމަކީ ޙަޤީޤަތާއި ޚިލާފު ދޮގު (ފޯރޖް) ލިޔުމެއްކަން ނުވަތަ އެނޫން އެހެން ގޮތެއް ޝަރުޢީ އަދި ޤާނޫނީ ހަމަތަކުގެ މަތިން ސާބިތު ނުވާހާ ހިނދަކު އޭގެ ޙުއްޖިއްޔަތު ވެއްޓިގެން ނުދާނޭ ލިޔުމެކެވެ. (ޕެރ. 3(ނ))

ޔަޤީނީ ޢިލްމު ޙާޞިލު ކުރެވޭ ގޮތަށް ފެންނަން ހުންނަ ޤާނޫނީ ޙުއްޖަތްތައް ބާޠިލުވެގެން ދާނީ އެފަދަ ޔަޤީނީ ޙުއްޖަތަކުންނެވެ. ސަރުކާރުގެ ރަސްމީ އިދާރާތަކަށް ތިމާ އަމިއްލައަށް މަޢުލޫމާތު ދީގެން އެ މަޢުލޫމާތުތަކުގެ މައްޗަށް ބިނާކޮށްގެން ހެދޭ ރަސްމީ ލިޔުންތަކަކީ ޔަޤީނީ ޢިލްމު ޙާޞިލު ކުރެވޭ ގޮތަށް ހުންނަ ޤާނޫނީ ޙުއްޖަތެއް ކަމުގައި ބަލަންޖެހެއެވެ. (ޕެރ. 3(ނ))

ޝަރީޢަތުން ކަންކަން ސާބިތު ކުރުމުގެ ވަޞީލަތްތަކުގެ ތެރެއިން ކިތާބީ (ޑޮކިއުމެންޓަރީ) ހެއްކާއި ޝަފަހީ (އޯރަލް) ހެއްކާއި މި ދެ ވަޞީލަތުގެ ތެރެއިން، ޝަފަހީ ހެއްކަކީ ކިތާބީ ހެއްކަށް ވުރެ، ސާބިތު ވުމުގެ ބާރުގެ ޙައިޘިއްޔަތުން ބަލި ވަޞީލަތެކެވެ. (ޕެރ. 3(ނ))

ސަރުކާރުގެ ރަސްމީ އިދާރާއެއްގައި ރެކޯޑް ކުރެވިފައިވާ މަޢުލޫމާތުގެ މައްޗަށް ބިނާކޮށް ސަރުކާރުގެ އިދާރާއަކުން ހަދާދީފައިވާ ރަޖިސްޓްރީއަކީ ޞައްޙަ ރަޖިސްޓްރީއެއް ނޫން ކަމުގައި ބުނާ ބުނުން ޝަރުޢީ ހަމަތަކުގެ މަތިން ސާބިތުކޮށް ދޭންޖެހޭނީ އެ ބުނާ ފަރާތަށެވެ. ޝަރީޢަތުގެ މަޖިލީހުގައި ބުނެފައިވާ ބުނުމަކީ، ހަމައެކަނި އެ ބުނުމުގެ މައްޗަށް ބިނާކޮށް، ރަޖިސްޓްރީ ޞައްޙަ ނޫން ރަޖިސްޓްރީއެއް ކަމުގައި ބަލައި، ބާޠިލް ރަޖިސްޓްރީއެއް ކަމުގައި ކަނޑައެޅޭ ފަދަ ޝަރުޢީ އަދި ޤާނޫނީ ސަބަބެއް ނޫނެވެ. (ޕެރ. 3(ނ))