އެޓޯލްޕެރެޑައިސް ޕްރައިވެޓް ލިމިޓެޑް ވ. ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް

ދަށު ކޯޓުތަކަކީ ފުރަތަމަ މަރުޙަލާގައި މައްސަލަ ބެލުމަށް ޤާނޫނުއަސާސީން ނުވަތަ ޤާނޫނުން އެހެން ކޯޓަކާ ޙަވާލުކޮށްފައިނުވާ މައްސަލަތައް ފުރަތަމަ މަރުޙަލާގައި ބެލުމަށް އުފައްދާފައިވާ ކޯޓުތަކެކެވެ. ދަށު ކޯޓުތަކުގެ ތެރެއިން މަތީ ގިންތީގެ ކޯޓުތަކަކީ ދިވެހިރާއްޖޭގެ ކޯޓުތަކުގެ ޤާނޫނުގެ ދަށުން އުފައްދާ ސުޕީރިއަރ ކޯޓުތަކާއި އެހެން ޤާނޫނަކުން ވަކި ކަމަކަށް ޚާއްޞަކޮށް އުފައްދާ ސުޕީރިއަރ ކޯޓުތަކާ އެއް ދަރަޖައެއްގެ ކޯޓުތަކެވެ؛ ތިރީ ގިންތީގެ ކޯޓުތަކަކީ ދިވެހިރާއްޖޭގެ ކޯޓުތަކުގެ ޤާނޫނުގެ ދަށުން އުފައްދާ މެޖިސްޓްރޭޓް ކޯޓުތަކެވެ. (ޕެރ. 3 (ށ))

މެޖިސްޓްރޭޓް ކޯޓުތަކުގެ އިޚްތިޞާޞުގެ ތެރޭގައި އެކޯޓެއް ހިމެނޭ ޖުޑިޝަލް ދާއިރާގައި ހިނގާ އެންމެހައި ޖިނާއީ، މަދަނީ އަދި ޢާއިލީ މައްސަލަތައް ހިމެނެއެވެ؛ މިއިން އިސްތިސްނާ ކޮށްފައިވަނީ އެ ޖަދުވަލުގައި ނުވަތަ އެޤާނޫނުގެ އެހެން މާއްދާއެއްގައި ނުވަތަ އެހެން ޤާނޫނެއްގައި އިސްތިސްނާ ކޮށްފައިވާ މައްސަލަތައް އެކަނިއެވެ. (ޕެރ. 3 (ނ))

5,000,000 (ފަސް މިލިއަން) ރުފިޔާއިން ފެށިގެން މަތީގެ ޢަދަދުގެ ފައިސާ ހިމެނޭ ނުވަތަ އެއަގުގެ މުދާ ހިމެނޭ މައްސަލަތައް ފިޔަވައި އެހެނިހެން އެންމެހައި މަދަނީ މައްސަލަތައް ބެލުމުގެ އިޚްތިޞާޞް އުޞޫލެއްގެގޮތުން މެޖިސްޓްރޭޓް ކޯޓުތަކަށްވެސް ލިބިފައިވެއެވެ. މަދަނީ މައްސަލަތަކުގެ ތެރެއިން ސިވިލް ކޯޓަށް ވަކި އިޚްތިޞާޞެއް ލިބިފައިވާ މައްސަލައަކީ އެފަދަ މައްސަލަތައް އެކަނި ކަމުން، މުދަލުގެ މައްސަލަތަކާއި، ވިޔަފާރީގެ މައްސަލަތަކާއި، ރަހުނުގެ މައްސަލަތަކާއި، ދަރަނީގެ މައްސަލަތަކާއި އަދި އެނޫންވެސް މަދަނީ މައްސަލަތަކަކީ، އެފަދަ މައްސަލައެއްގައި ހިމެނޭ ފައިސާގެ ޢަދަދު ނުވަތަ މުދަލުގެ އަގު 5,000,000 ރުފިޔާއިން ފެށިގެން މަތީގެ ޢަދަދަކަށް ނުވާނަމަ މެޖިސްޓްރޭޓް ކޯޓުތަކުގައިވެސް ބެލޭނެ މައްސަލަތަކެކެވެ. (ޕެރ. 3 (ނ))

އެއްބަސްވުމެއްގެ ދަށުން އެއްފަރާތުން އަދާކުރަންޖެހޭ ޒިންމާތައް އަދާ ނުކުރުމުން އަނެއް ފަރާތުގެ ޙައްޤުތައް އެއެއްބަސްވުމުގައިވާ ގޮތުގެމަތިން ހޯދުމަށް ވަކިން ދަޢުވާކުރުމަށް ހުރަސްއަޅާފަދަ މާއްދާއެއް ނުވަތަ ޝަރުޠެއް އެއެއްބަސްވުމުގައި ނުވަތަ ދެފަރާތުގެ ދެމެދުގައިވެފައިވާ އެހެން އެއްބަސްވުމެއްގައި ބަޔާންކޮށްފައި އޮތްކަން ދައްކާފައި ނުވާނަމަ، ދެފަރާތުގެ ދެމެދުގައި ވެފައިވާ އެހެން އެއްބަސްވުންތަކާ ވަކިން އެ އެއްބަސްވުމުގައި ބަޔާންކޮށްފައިވާ ކަންކަން ތަންފީޛުކުރުމަށް ހުރަސް އެޅޭފަދަ ސަބަބެއް ނެތެވެ. (ޕެރ. 3 (ރ))

ރަށެއްގައިވާ ބިމެއް ކުއްޔަށް ދިނުމުގެ އެއްބަސްވުމެއްގެ ދަށުން އުފެދޭ ޚުޞޫމަތްތަކާގުޅިގެން މައްސަލަ ހުށަހަޅަން ޖެހޭ ވަކި ކޯޓެއް އެއެއްބަސްވުމުގައި ކަނޑައަޅާފައި ނުވާނަމަ، އަދި މައްސަލާގައި ހިމެނޭ ފައިސާގެ އަދަދަށް ބަލާއިރު އެއީ އެރަށެއްގެ މެޖިސްޓްރޭޓް ކޯޓަށް ދިވެހިރާއްޖޭގެ ކޯޓުތަކުގެ ޤާނޫނުގެ ދަށުން އިޚްތިޞާޞް ލިބިގެންވާ މައްސަލައެއްނަމަ، އެ މައްސަލަ ފުރަތަމަ މަރުޙަލާގައި އެ މެޖިސްޓްރޭޓް ކޯޓުގައި ބެލިބެލުން ޞައްޙަ ނޫންކަމަށް ކަނޑައެޅެން ނެތެވެ. (ޕެރ. 3 (ރ))