—

HN1 އިސްތިއުނާފުކުރެވިފައިވާ ކޯޓު އަމުރަކީ ހައްޔަރުކުރުމަށް ނެރުއްވާފައިވާ ހައްޔަރުކުރުމުގެ އަމުރެއްނޫން، ބަންދުގެ މުއްދަތު އިތުރުކޮށް ދެއްވައި ނެރުއްވާފައިވާ އަމުރެއްކަން އެނގޭއިރު، ތުހުމަތުކުރެވިފައިވާ މައްސަލާގައި ހަވާލާދީފައިވާ ޤާނޫނާއި މާއްދާ އެނގެނީ އެއަމުރު ނެރެދެއްވުމަށް އެދި ކޯޓަށް ހުށަހެޅި "ބަންދުގެ މުއްދަތު އިތުރުކުރުމަށް ހުށަހަޅާ ފޯމް" އަށް ބަލާއިރުއެވެ.)

HN2 ޤާނޫނުއަސާސީގެ 49 ވަނަ މާއްދާއާ އެއްގޮތަށް މީހަކު ބަންދުކުރުމުގައި، ތުހުމަތުކުރެވޭ ކުށް ސާބިތުކުރުމަށް ކާފީ ހެކިތަކެއް ނެތްކަމުގައި ވިޔަސް، ޝައްކުކުރެވޭ ކުށުގެ ނުރައްކާތެރިކަމަކީ ކޮބައިކަމާއި، އަދި އެކުށް ތަޙްޤީޤުކުރުމުގައި ހުރީ ކިހާ މިންވަރެއްގެ އުނދަގޫތަކެއްތޯއާއި، އެކަމުގައި ހިމެނޭ މީހުންގެ އަދަދަކީ ކޮބައިކަމާއި، ކުށުގެ ޠަބީޢަތަކީ ކޮބައިކަމާއި، ކުށުގެ ކުޑަބޮޑު މިނަކީ ކޮބައިކަމާއި، އެކުށަށް ޤާނޫނުގައި ކަނޑައެޅިފައިވާ އަދަބަކީ ކޮބައިކަމާއި، ޝައްކުކުރެވޭ މީހާ ފިލައި ރައްކާވުމުގެ ބިރު އޮތީ ކިހާވަރަކަށްކަމާއި، އަދި ހެކިތަކާކުޅެ ހެކިތައް ނައްތާލުމުގެ ބިރު އޮތީ ކިހާ ވަރަކަށްކަން ފަނޑިޔާރު ވަޒަންކުރަންޖެހޭނެއެވެ.)

HN3 ޤާނޫނުއަސާސީގެ 49 ވަނަ މާއްދާއާއި [ކުށެއްގެ ތުހުމަތުގައި ބަންދުކުރެވޭ މީހުން ފަނޑިޔާރެއްގެ ކުރިމައްޗަށް ޙާޟިރުކޮށް ބަންދާމެދު ގޮތެއް ނިންމުމުގެ ޤަވާޢިދު] ގެ 7 ވަނަ މާއްދާގެ (ހ) އަށް ބަލާއިރު، އެމީހަކާމެދު ތުހުމަތުކުރެވިފައިވާ މައްސަލައެއްގެ ހެކި ފޮރުވުމަށް ނުވަތަ ހެކިބަސްދޭން ހުރި މީހަކަށް ނުފޫޒެއް ފޯރުވުމަށް މަސައްކަތް ކޮށްފާނެކަމަށް، ނުވަތަ ކޯޓަށް ހާޒިރު ނުވެދާނެކަމަށް، ނުވަތަ ފިލާފާނެކަމަށް، ނުވަތަ ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެކަމަށް ފަނޑިޔާރަށް ފެނިއްޖެނަމަ، އެމީހަކު ބަންދުގައި ބެހެއްޓުމުގެ އަމުރެއް ނެރުމުގެ ބާރު ފަނޑިޔާރަށް ލިބިގެންވެއެވެ.)

HN4 ކުށެއްގެ ތަޙްޤީޤަށް މައްސަލައެއް ހުށަހެޅުމުން ލަސްނުކޮށް އެމައްސަލައެއްގެ ތަޙްޤީޤު ނިންމަންވާނެއެވެ.)

HN5 ކުށެއްގެ ތަޙްޤީޤު މަރުޙަލާގައި މީހަކު ބަންދުގައި ބެހެއްޓުމަށް އަމުރުކުރުމުގައި، އެކުށް ތަޙުޤީޤުކުރުމުގައި ހުރީ ކިހާ މިންވަރެއްގެ އުނދަގޫތަކެއްތޯއާއި، އެކަމުގައި ހިމެނޭ މީހުންގެ އަދަދަކީ ކޮބައިކަމާއި، ކުށުގެ ޠަބީޢަތަކީ ކޮބައިކަން ބަލަންޖެހެއެވެ. ތަޙްޤީޤުކުރުމުގައި ދަތިއުނދަގޫތަކެއް ހުރިކަމާއި ގިނަ ޢަދަދެއްގެ ބަޔަކާ ގުޅިފައިވާ މައްސަލައެއްކަން އެނގެން އޮތުމުން، ބަންދުން ދޫކޮށްލައިފިނަމަ ހެކިންނަށް ނުފޫޒު ފޯރުވައި ހެކި ފޮރުވުމަށް އަދި ހެކި ނައްތާލުމަށް މަސައްކަތް ކޮށްފާނެ ކަމަށް ބެލެވެން އޮވެއެވެ.)