—

ޤާނޫނު ނަންބަރު 1/2013 (ސުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނު) ގެ 24 ވަނަ މާއްދާގެ 7 ވަނަ ނަންބަރުގައި ދިވެހިރާއްޖޭގެ އެއްވެސް ވައިގެ ބަނދަރަކަށް ހުއްދަނެތި އެއްވުމަކީ މަނާކަމެއްކަމަށް ބަޔާންވެގެން އޮންނައިރު، އެޤާނޫނުގެ 7 ވަނަ މާއްދާގައި އެފަދަ އެއްވުމަކީ 'އެކަކަށްވުރެ ގިނަ މީހުން އެއް މަޤްސަދެއްގެ ޤަސްދުގައި ޢާއްމުތަނަކަށް ނުވަތަ އަމިއްލަ ތަނަކަށް ވަގުތީ ގޮތުން ޙާޟިރުވެ ނުވަތަ ޖަމާވެތިބެ ސުލްޙަވެރިކަމާއިއެކު ޝުޢޫރު ފާޅުކުރުން' ކަމަށް ބަޔާންކޮށްފައިވެއެވެ. (ޕެރ. 3(ހ))

ދަޢުވާގެ ސީޣާއަށް ބަލާއިރު، އަމުރަށް ނުކިޔަމަންތެރިވުމުގެ ދަޢުވާ އުފުލާފައިވަނީ މުޒާހަރާކޮށްގެން އެސަބަބުގެ މައްޗަށް އެކަނި ނޫން، އެއް މަޤްސަދެއް ޙާސިލުކުރުމުގެ ޤަސްދުގައި އެއްވުން މަނާ ސަރަޙައްދެއްގައި އޮތް އެއްވުމެއްގައި ބައިވެރިވެ އަޑު އުފުލާ މުޒާހަރާކޮށްފައިވާތީއެވެ. (ޕެރ. 3(ހ))

ތުހުމަތުކުރެވޭ ފަރާތުން ދަޢުވާއަށް އިންކާރުކުރާއިރު، ދައުލަތުން ހުށަހެޅި ހެކިންނާއި އެހެކިބަސްތަކާއި ގުޅުވައިދޭގޮތަށް ލިބެން ހުރި ޤަރީނާތަކަށް ބެލުމުން، ދަޢުވާގައި ބަޔާންކޮށްފައިވާ ފަދައިން ކަން ހިނގާފައިވާކަން ޤާނޫނުއަސާސީގެ 51 ވަނަ މާއްދާގެ (އ) ގައި ބުނާ އެކަށީގެންވާ ޝައްކެތްނެތް މިންވަރަށް ސާބިތުވާ މިންވަރުގެ ކާފީ ހެކި ދައުލަތުން ހުށަހަޅާފައިވާނަމަ، އަދި އެ ހެކިބަސްތަކާއި ޤަރީނާތަކުން ފެންނަން ހުރިކަންކަން ނަފީކުރެވޭ ވަރުގެ އެއްވެސްކަމެއް ދިފާޢީ ހެކިންގެ ހެކިބަހުން ސާބިތުނުވާނަމަ، ދަޢުވާ ސާބިތުވެއެވެ. (ޕެރ. 3(ށ))

ކުށަކާއި ގުޅިގެން ކަނޑައަޅަން އޮންނަ އަދަބެއްގައި ތަފާތު ބާވަތްތަކުގެ އަދަބު ކަނޑައެޅިފައިވާނަމަ، އަދި އެ އަދަބުގެ ބާވަތްތަކުގެ ތެރެއިން ބާވަތެއް އިޚުތިޔާރުކުރުމުގެ ތަޤްދީރީ ބާރު ފަނޑިޔާރަށް ލިބިގެންވާނަމަ، އެކުށަކާއި ގުޅޭ ގޮތުން އޮންނަ އަދަބުގެ ބާވަތްތަކުގެ ތެރެއިން ފަނޑިޔާރު އިޚުތިޔާރުކުރާ އަދަބެއް ކަނޑައެޅިދާނެއެވެ. (ޕެރ. 3(ނ))

ޝަރުޢީ ނުވަތަ ޤާނޫނީ ގޮތުން ކުރާ އަމުރަށް ނުކިޔަމަންތެރިވުމުގެ ކުށަށް ކުރިން ޢަމަލުކުރެވެމުންދިޔަ ޤާނޫނުލްޢުޤޫބާތުގައި ކަނޑައަޅާފައިވާ އަދަބަކީ ގިނަވެގެން 6 މަސްދުވަހަށް ޖަލަށްލުން، ނުވަތަ އަރުވާލުން، ނުވަތަ ގޭގައި ބަންދުކުރުން ނުވަތަ 150 ރުފިޔާއިން ޖޫރިމަނާކުރުން ކަމުގައިވާއިރު، މިހާރު ޢަމަލުކުރަމުން އަންނަ ޤާނޫނުލްޢުޤޫބާތުގެ 1002 ވަނަ މާއްދާގެ އަސާސީ މިންގަނޑަށް ބެލުމުން މިފަދަ ކުށަކަށް ދެވޭ އަދަބަކީ 04 މަހާއި 24 ދުވަހު ޖަލަށްލުން ކަމުން، 3 މަސްދުވަހުގެ މުއްދަތަށް ޖަލަށްލުމަށް ޙުކުމްކޮށް ޝަރީޢަތްކުރުމާއިބެހޭ ގޮތުން ހެދިފައިވާ ޤަވާޢިދު 06 ގެ 292 ވަނަ މާއްދާގެ 03 ވަނަ ނަންބަރަށް ރިޢާޔަތްކޮށް 03 އަހަރު ދުވަހުގެ މުއްދަތަށް ޙުކުމް ފަސްކުރުމަކީ ޤާނޫނުއަސާސީގެ 59 ވަނަ މާއްދާއާއި ޚިލާފަށް ކުރާ ޙުކުމެއް ކަމުގައި ނުބެލެވޭނެއެވެ. (ޕެރ. 3(ނ))