—

ކޯޓަށް މީހުން ހާޒިރު ކުރުމުގައި ޢަމަލު ކުރާނޭ ގޮތުގެ ގަވާއިދުގެ 10 ވަނަ މާއްދާއަކީ ކޯޓަށް ހާޒިރުވުމުގެ އަމުރު ރައްދުކުރާނެ ގޮތް ބަޔާންކުރާ މާއްދާއެވެ. ކޯޓަށް ހާޒިރުވާންޖެހޭ ފަރާތަކަށް ހާޒިރުވުމުގެ އަމުރު ރައްދުކުރެވެން އޮތްނަމަ، ޙަވާލު ކުރަންވާނީ އެމީހާއަށެވެ. (ޕެރ. 3 (ހ))

ހާޒިރުވާންޖެހޭ ފަރާތް ދިރިއުޅޭ ގޭގައި އުޅޭ ތަޞައްރަފު ފުދިފައިވާ މީހަކާ ނުވަތަ ކޯޓަށް ހާޒިރުވާންޖެހޭ ވަކީލާ، ނުވަތަ ބަދަލުގެ ގޮތުގައި ހަމަޖައްސާފައިވާ މީހާއާ އަމުރު ޙަވާލު ކުރުމުން ހާޒިރުވުމުގެ އަމުރު ރައްދުކުރެވުނީ ކަމަށް ބެލެވޭނެ ކަމާއި، މިގޮތަށް ޢަމަލުކުރަންވާނީ އެފަރާތް ހޯދުމަށް އެކަށީގެންވާ މަސައްކަތްތަކެއް ކުރުމަށްފަހުގައިވެސް އެފަރާތެއް ނުފެނިއްޖެ ހިނދެއްގައި އަދި އެމީހަކީ ބަންދުގައި ހުރި މީހަކަށް ނުވާނަމަ ކަމެވެ. (ޕެރ. 3 (ހ))

އެގޮތަށް ޢަމަލު ކުރެވެން ނެތް ޙާލަތެއްގައި، ހާޒިރުވުމުގެ އަމުރު ފޮނުވޭ ފަރާތް ޢާންމު ގޮތެއްގައި ދިރިއުޅޭ ގެއެއް ނުވަތަ ތަނެއްގެ ދޮރާށީގައި ނުވަތަ އުޅަނދެއްގައި އަމުރު ހިއްޕުމުން ނުވަތަ އެއަމުރު ފަސޭހައިން ފެންނާނެ ގޮތަކަށް އެއިން ތަނެއްގައި ބެހެއްޓުމުން، ހާޒިރުވުމުގެ އަމުރު ރައްދު ކުރެވުނީ ކަމަށް ބެލެވޭނެއެވެ. (ޕެރ. 3 (ހ))

ކޯޓަށް ހުށަހެޅިފައިވާ މައްސަލައެއްގައި ދަޢުވާ ލިބޭ ފަރާތަކީ ދިވެއްސެއްކަމަށްވެފައި އޭނާ ރާއްޖެއިން ބޭރުގައިވާނަމަ، އަދި އެފަރާތެއް ރާއްޖެއިން ބޭރުގައި އުޅޭ އެޑްރެސް ނޭނގޭނަމަ، ކޯޓަށް ހާޒިރުވުމުގެ އަމުރު ރައްދުކުރަންވާނީ އެމީހަކު ހުރި ގައުމެއްގައި ހުރި ދިވެހި ސަރުކާރުގެ ކަމާބެހޭ އޮފީހެއް މެދުވެރިކޮށް، ނުވަތަ އެމީހަކު ހުރި ގައުމެއްގެ ސަރުކާރުގެ ކަމާބެހޭ ފަރާތެއް ނުވަތަ ކޯޓު މެދުވެރިކޮށެވެ. (ޕެރ. 3 (ށ))

ޝަރުޢީ ކޯޓުތަކަށް ހުށަހެޅޭ މަދަނީ މައްސަލަތަކުގައި ދަޢުވާ ލިބޭ ފަރާތް ކޯޓަށް ހާޒިރުކުރުމުގެ މަސައްކަތަކީ ކޯޓުތަކުގެ އިދާރީ މަސައްކަތްތަކުގެ ތެރޭގައި ހަމަޖެހި، ކޯޓުތަކުގެ މުވައްޒަފުން ނުވަތަ ސަރުކާރުގެ ކަމާބެހޭ ފަރާތެއް މެދުވެރިކޮށް ކޯޓުތަކުން ކުރަމުން އަންނަ ކަމެކެވެ. (ޕެރ. 3 (ނ))

ދަޢުވާ ލިބޭ ފަރާތް ދިރިއުޅޭނެ ކަމަށް ދީފައިވާ އެޑްރެހުގައި ނޫޅުމުގެ ސަބަބުން ހާޒިރުވުމުގެ އަމުރު ރައްދުކުރެވިފައި ނުވާއިރު، އެފަރާތް ހޯދުމަށް އެކަށީގެންވާ ގޮތެއްގައި ކޯޓުން މަސައްކަތްކޮށް، ރާއްޖެއިން ބޭރުގައި ދިރިއުޅޭ ފަރާތެއްނަމަ ގަވާއިދުގައި ބަޔާންކޮށްފައިވާ ގޮތަށް ޢަމަލުކުރުމުގެ ބަދަލުގައި، ދަޢުވާލިބޭ ފަރާތް ދިރިއުޅޭ އެޑްރެސް ދަޢުވާކުރި ފަރާތަށް ސާފުކޮށްދެވިފައި ނުވާކަމަށް ނިންމައި ދަޢުވާ ފޯމް ބާޠިލްކުރުމަކީ ކޯޓަށް މީހުން ހާޒިރުކުރުމުގައި ޢަމަލުކުރަންޖެހޭ ގޮތުގެ ގަވާއިދުގެ 10 ވަނަ މާއްދާއާއި 19 ވަނަ މާއްދާއާ ޚިލާފު ކަމެކެވެ. (ޕެރ. 3 (ނ))