—

މުވައްޒަފަކު ވަޒީފާއިން ވަކިކުރުމާ ގުޅިގެން އެމުވައްޒަފަކު ހުށައަޅާ ޝަކުވާއެއް ނުވަތަ ދަޢުވާއެއްގައި، އޭނާ ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށްދިނުމަކީ ވަޒީފާދޭ ފަރާތުގެ ޒިންމާއެކެވެ. (ޕެރ. 3(ހ))

ވަޒީފާއާބެހޭ ޤާނޫނު ހިންގޭ ދާއިރާގެ ތެރޭގައި ހިމެނޭ މުވައްޒަފަކު ވަޒީފާއިން ވަކިކުރެވޭނީ، އެމުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަމާއި އިޖުރާއީ ޢަދުލުވެރިކަން ޤާއިމުކުރުމަށް ފަހުގައެވެ. (ޕެރ. 3(ށ))

މައުޟޫޢީ ޢަދުލުވެރިކަމަކީ، މުވައްޒަފަކު ވަޒީފާއިން ވަކިކުރެވުނު ސަބަބަކީ ޢަދުލުވެރި ނުވަތަ އެކަށީގެންވާ ސަބަބަކަށް ވުމެވެ. އިޖުރާއީ ޢަދުލުވެރިކަމަކީ، މުވައްޒަފަކު ވަޒީފާއިން ވަކިކުރުމުގެ ކުރިން ފުރިހަމަކޮށްފައިވާ އިޖުރާއާތުތަކަކީ ޢަދުލުވެރި އިޖުރާއާތުތަކަކަށް ވުމެވެ. (ޕެރ. 3(ށ))

ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުން މުވައްޒަފަކު ވަޒީފާއިން ވަކިކުރުމުގައި އިޖުރާއީ ޢަދުލުވެރިކަން ޤާއިމުކުރެވިފައިވާކަމަށް ޢާންމު އުޞޫލެއްގެ ގޮތުން ބެލެވޭނީ، އަންނަނިވި ކަންކަން ފުރިހަމަވެފައިވާނަމައެވެ: ވަކިކުރުމުގެ ކުރިން، އޭނާގެ މައްޗަށް ތުހުމަތުކުރެވިފައިވާ ކަންކަމާބެހޭ މަޢުލޫމާތު (އޭރަކު ދެވެން ހުންނަ ހުރިހާ ތަފްޞީލަކާއެކު) ވަޒީފާދޭ ފަރާތުން މުވައްޒަފަށް ދިނުން؛ އެ ތުހުމަތުތަކާމެދު ޖަވާބުދާރީވުމުގެ ފުރުޞަތު ދިނުން؛ މައްސަލަ ތަޙުޤީޤުކޮށް، 23 ވަނަ މާއްދާގެ ދަށުން ފުރިހަމަވާންޖެހޭ ދެ ޝަރުތު ފުރިހަމަވާކަމަށް އެ ތަޙުޤީޤަށް ފެނުން؛ އަދި އޭނާ އެދިފައިވާނަމަ، އޭނާ ކަނޑައަޅާ މީހެއްގެ އެހީތެރިކަން ހޯދުމުގެ ފުރުޞަތު ދިނުމެވެ. (ޕެރ. 3(ނ))

މުވައްޒަފަކަށް ނަޞޭޙަތް/އިންޒާރު ދިނުމަށް ބައްދަލުކުރަން ބުނުމުން އޭނާ ޖަދަލުކޮށްފައިވުމަކީ، ވަޒީފާއިން ވަކިކުރުމުގެ ކުރިން އޭނާގެ މައްޗަށް ކުރެވޭ ތުހުމަތުތަކުގެ ތަޙްޤީޤެއް ހިންގައި އިޖުރާއީ ޢަދުލުވެރިކަން ޤާއިމުކުރުމަށް އޮތް ހުރަހެއް ނުވަތަ އެކަން ނުވާނޭފަދަ ކަމެއްކަމުގައި ބެލެވޭނެ ކަމެއް ނޫނެވެ. (ޕެރ. 3(ނ))

އިޖުރާއީ ޢަދުލުވެރިކަން ފުރިހަމައަށް ޤާއިމުނުކުރެވި ވަޒީފާއިން ވަކިކުރެވޭ ޙާލަތުގައި ނަގައިދެވޭ ބަދަލުގެ މިންވަރު ކަނޑައެޅުމަކީ ވަޒީފާއާބެހޭ ޓްރައިބިއުނަލަށް ލިބިދީފައިވާ ބާރެކެވެ. މިގޮތުން ބަދަލުގެ މިންވަރު ކަނޑައަޅާއިރު، ވަކިކުރެވުނު މުވައްޒަފުގެ ޢުމުރަށާއި، ވަކިކުރެވުނުއިރު ހުރި މަޤާމަށާއި، އެ މަޤާމުގެ ޒިންމާތަކަށާއި، ތަޖުރިބާއަށާއި، ވަޒީފާގައި ޖުމްލަ ހޭދަކޮށްފައިވާ މުއްދަތަށާއި، މަސައްކަތު އަޚްލާޤާބެހޭ ރެކޯޑަށާއި، ވަކިކުރިއިރު އިޖުރާއީ ޢަދުލުވެރިކަން ޤާއިމުކޮށްފައިވާ މިންވަރަށް ބަލަންޖެހޭނެއެވެ. (ޕެރ. 3(ރ))

އެފަދަ މައްސަލަތަކުގައި ވަޒީފާއާބެހޭ ޓްރައިބިއުނަލުން ބަދަލުގެ މިންވަރު ކަނޑައަޅާއިރު، އެ ނިންމުމަށް ވާޞިލުވި ގޮތް ސާފުވާންޖެހޭނެއެވެ. ބަދަލުގެ ޢަދަދު ކަނޑައަޅާފައިވަނީ ކޮން އުޞޫލެއްގެ ދަށުންކަން ސާފުނުވާނަމަ، އެ ނިންމުން ބާޠިލުކޮށް ޓްރައިބިއުނަލަށް އަލުން ބެލުމަށް ފޮނުވެއެވެ. (ޕެރ. 3(ރ))