—

މުވައްޒަފަކު ވަޒީފާއިން ވަކިކުރުމާއި ގުޅިގެން، އެމުވައްޒަފަކު ހުށައަޅާ ޝަކުވާއެއް ނުވަތަ ދަޢުވާއެއްގައި، އޭނާ ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށް ދިނުމަކީ ވަޒީފާއާބެހޭ ޤާނޫނުގެ 29 ވަނަ މާއްދާގައި ބަޔާންކޮށްފައިވާ ޙާލަތްތައް ފިޔަވައި، އެހެނިހެން ޙާލަތްތަކުގައި ވަޒީފާދޭ ފަރާތުގެ ޒިންމާއެކެވެ. (ޕެރ. 03 ހ)

މުވައްޒަފަކު ވަޒީފާއިން ވަކިކުރުމުގެ ކުރިން، އެމުވައްޒަފަކު ވަޒީފާއިން ވަކިކުރުމަކީ ޢަދުލުވެރިކަމާއެކު ކުރެވޭ ކަމެއްކަން ކަށަވަރުކުރުމަށްޓަކައި ވަޒީފާދޭ ފަރާތުން ޢަމަލުކުރަންޖެހޭ ގޮތްތަކެއް ނުވަތަ އަޅަންޖެހޭ ފިޔަވަޅުތަކެއް ހުންނައިރު، ވަޒީފާއާބެހޭ ޤާނޫނު ހިންގޭނެ ދާއިރާގެ ތެރޭގައި ހިމެނޭ މުވައްޒަފަކު ވަޒީފާއިން ވަކިކުރެވޭނީ، އެމުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަމާއި އިޖުރާއީ ޢަދުލުވެރިކަން ޤާއިމުކުރުމަށް ފަހުގައެވެ. (ޕެރ. 03 ށ)

މައުޟޫޢީ ޢަދުލުވެރިކަމަކީ، މުވައްޒަފަކު ވަޒީފާއިން ވަކިކރެވުނު ސަބަބަކީ ޢަދުލުވެރި ނުވަތަ އެކަށީގެންވާ ސަބަބަކަށްވުމެވެ. އިޖުރާއީ ޢަދުލުވެރިކަމަކީ، މުވައްޒަފަކު ވަޒީފާއިން ވަކިކުރުމުގެ ކުރިން ފުރިހަމަކޮށްފައިވާ އިޖުރާއާތުތަކަކީ ޢަދުލުވެރި އިޖުރާއާތުތަކަކަށްވުމެވެ. (ޕެރ. 03 ށ)

ވަޒީފާއާއިބެހޭ މިފަދަ މައްސަލަތަކުގައި މީހެއްގެ މައްޗަށް ހުށަހެޅޭ ޝަކުވާތައް ސާބިތުކުރުމުގައި ބަލަންޖެހޭނީ ހުށަހެޅޭ ހެކިތަކާއި ޤަރީނާތައް ވަޒަންކޮށް ބަލާއިރު، ބޮޑަށް ބުރަވެވޭ ގޮތެއްގެ މައްޗަށް ބިނާކޮށްގެންނެވެ. (ޕެރ. 03 ނ)

ތަޙްޤީޤުގައި ދިން ބަޔާނުގައި ތުހުމަތުކުރެވޭ ފަރާތުގެ މައްޗަށް ކުރެވުނު ޝަކުވާތަކުގައި ހިމެނޭ ބައެއް ކަންކަމަކީ އޭނާއަށް ކުރެވިފައިވާ ކަންތައްތަކެއްކަމަށް އެއްބަސްވެ އެކަމަށް މަޢާފަށްވެސް އެދިފައިވާނަމަ، ތުހުމަތުކުރެވުނު ކަންކަމަކީ އެގޮތުގައި ހިނގާފައިވާކަމެއްކަން ބޮޑަށްބުރަވެވޭ މިންގަނޑަށް ބެލުމުން އެނގެން އޮންނާނެއެވެ. އަދި އެކަން އިތުރަށް ބަލައި ތަޙްޤީޤުކުރުމަކީ ވަޒީފާދޭ ފަރާތުން ކުރަންޖެހޭނެކަމެއް ނޫނެވެ. (ޕެރ. 03 ނ)

ތަޙްޤީޤަށް ދިން ބަޔާނަކީ ބިރުދެއްކުމާއި އޮޅުވާލުމުގެ މައްޗަށް ދީފައިވާ ބަޔާނެއްކަމަށް ބުނިނަމަވެސް، އެފަދަ މަޖުބޫރެއް އޮވެގެން ނުވަތަ ތުހުމަތުކުރެވެނީ ކޮން މައްސަލައެއްކަން ނޭނގި އޮޅުމެއްގެ ތެރޭގައި ހުރެގެން ބަޔާންދީފައިވާކަމުގައި ބެލެވޭފަދަ ޙުއްޖަތްތަކެއް ހުށަހެޅިފައި ނެތްނަމަ އެ ދަޢުވާ ބަލައެއް ނުގަނެވޭނެއެވެ. (ޕެރ. 03 ރ)

ޝަކުވާގައި ހިމެނޭ ޢަމަލަކީ މަޖަލަކަށްކުރިކަމަކަށްވާތީ މާބޮޑުމައްސަލައެއް ނޫންކަމަށް ބުނިނަމަވެސް، އެކަން ރައްދުވާފަރާތަށް އެއީ މައްސަލައެއްކަމުގައިދެކިގެން ޝަކުވާ ހުށަހެޅިފައިވާއިރު، އެ ޢަމަލަކީ ޖިންސީ ގޯނާގެ ޢަމަލުތަކުގެ ތެރޭގައި ހިމެނޭ ކަމެއްގެ ގޮތުގައި ނޫނީ ބެލެވެން ނެތެވެ. (ޕެރ. 03 ރ)

ޝަކުވާ ހުށަހެޅި ފަރާތަކުން އެއީ މަޖުބޫރުވެގެން ހުށަހެޅި ޝަކުވާތަކެއް ކަމަށް ފަހުން ބުނިނަމަވެސް، ވަޒީފާއިން ވަކިކުރުމުގެ ކުރިން އެ ޝަކުވާތައް އަނބުރާގެނެސް އެއީ މަޖުބޫރުވެގެން ހުށަހަޅަން ޖެހުނު ޝަކުވާތަކެއްކަމުގައި ބުނެފައި ނެތްނަމަ، އެކަމަކީ ކުރިން ހުށަހެޅި ޝަކުވާތަކުގެ މައްޗަށް ބިނާކޮށް އޭރު އެޅި ފިޔަވަޅު ބާތިލުކުރަންޖެހޭ ޤާނޫނީ ސަބަބެއްކަމުގައި ބެލެވެން ނެތެވެ. (ޕެރ. 03 ރ)