—

ޢާއިލާއާބެހޭ ޤާނޫނުގައި ބަޔާންކޮށްފައިވާ ގޮތުގެ މަތީން ކުއްޖެއްގެ ޙަޟާނަތު ހަވާލުކުރުން އެންމެ އިސްވެގެންވަނީ އެކުއްޖެއްގެ މަންމައާ ކަމަށް ޤާނޫނު ނަންބަރު 4/2000 (ޢާއިލާއާބެހޭ ޤާނޫނު) ގެ 40 ވަނަ މާއްދާގެ (ހ) ގައި ބަޔާންކޮށްފައިވާއިރު، އެޤާނޫނުގެ 42 ވަނަ މާއްދާގައި ޙަޟާނަތުގެ ޙައްޤު ގެއްލޭނެ ގޮތްތައް ބަޔާންކޮށްފައިވެއެވެ. އެއީ، ޙަޟާނަތު ޙަވާލުކޮށްފައިވާ މަންމަ ކުއްޖާގެ މަޙްރަމަކާ ނޫން ފިރިހެނަކާ ކާވެނިކުރުމާއި، ފާޙިޝް ޢަމަލު ފާޅުގައި ކުރުމާއި، ބައްޕަގެ ނުވަތަ ބަލަދުވެރިޔާގެ ރުހުމަކާނުލައި ދިރިއުޅޭ ރަށް ބަދަލުކުރުމާއި ނުވަތަ ބައްޕައަށް ޒިޔާރަތްކުރުމަށް ލިބިފައިވާ ޙައްޤަށް އުނިކަމެއް ލިބޭ ފަދަ ގޮތަކަށް ދިރިއުޅޭގެ ބަދަލުކުރުމާއި، މުރުތައްދުވުމާއި، ކުއްޖާއާ އަޅާނުލުން ނުވަތަ ކުއްޖާއަށް އަނިޔާވެރިވުމެވެ. (ޕެރ. 03 (ށ))

ކުއްޖާގެ މަންމަ ކިބައިން ޙަޟާނަތު ގެއްލޭފަދަ ކަމެއް މެދުވެރިވެފައިވޭތޯ ބަލާއިރު، 42 ވަނަ މާއްދާގައި ބަޔާންކުރާ ކަންކަމުން ކުރެ ކަމެއް ކުއްޖާގެ މަންމަ ކޮށްފައިވާކަން ނުވަތަ މެދުވެރިވެފައިވާކަން ޝަރީޢަތަށް ސާބިތުވާފަދަ ހެކި ހުށަހަޅަންޖެހޭނީ ޙަޟާނަތަށް ދަޢުވާކުރާ ފަރާތުންނެވެ. (ޕެރ. 03 (ށ))

ޢާއިލާއާބެހޭ ޤަވާޢިދުގެ 71 ވަނަ މާއްދާގައި ކުއްޖާގެ ޙަޟާނަތު ޙަވާލުކުރާނެ ފަރާތެއް ކަނޑައެޅުމުގައި އިސްކަން ދޭންޖެހޭ ތަރުތީބުގައި، ފުރަތަމަ ފަރާތަކީ ކުއްޖާގެ މަންމަ، ދެވަނަ ފަރާތަކީ ކުއްޖާގެ މާމަ (ކުއްޖާގެ މަންމަގެ މަންމަ)، ތިންވަނަ ފަރާތަކީ ކުއްޖާގެ ބައްޕައެވެ. ކުއްޖާގެ ޙަޟާނަތުގެ ތަރުތީބުން އެންމެ އިސްކަންދެވޭ މީހާއާ ކުއްޖާގެ ޙަޟާނަތު ޙަވާލުކޮށްފިނަމަ ކުއްޖާގެ މަޞްލަޙަތަށް އުނިކަމެއް އަންނާނޭކަމަށް ބެލެވޭ ޤަރީނާތަކެއް ހުރިނަމަ، ކުއްޖާގެ މަޞްލަޙަތަށް ރިޢާޔަތްކޮށް ޙަޟާނަތުގައި އިސްކަންދެވިފައިވާ ތަރުތީބުގެ މަތީން އެހެން ފަރާތަކާ ޙަވާލުކުރެވިދާނެކަމަށް ޢާއިލާއާބެހޭ ޤަވާޢިދުގެ 72 ވަނަ މާއްދާގައި ބަޔާންކޮށްފައިވެއެވެ. (ޕެރ. 03 (ނ))

ޙަޟާނަތުގެ ކޮންމެ މައްސަލައަކީވެސް އެ މައްސަލައެއްގެ ވަށައިގެންވާ އެންމެހާ ކަންތައްތަކަށް ރިޢާޔަތްކުރެވި ކުއްޖާގެ މަޞްލަޙަތަށް އޮތް އެންމެ ހެޔޮގޮތް އިޚްތިޔާރު ކުރަންޖެހޭ މައްސަލައެއްކަން ޤާނޫނު ނަންބަރު 4/2000 (ޢާއިލާއާބެހޭ ޤާނޫނު) ގެ 40 ވަނަ މާއްދާގެ (ބ) އިން އެނގެން އޮވެއެވެ. (ޕެރ. 03 (ރ))

ދަރިންގެ ޙަޟާނަތުގެ ޙައްޤަކީ އެ ދަރިންގެ ޙައްޤަށްޓަކައި އެ ދަރިންގެ މަޞްލަޙަތަށް ރިޢާޔަތްކޮށް އެ ދަރިންގެ މަޞްލަޙަތު އެންމެ ބޮޑަށް ރައްކާތެރިވާ ފަރާތަކާ ޝަރުޢީ އަދި ޤާނޫނީ ގޮތުން ޙަވާލުކުރަންޖެހޭ ޙައްޤެކެވެ. މިހެންކަމުން ޙަޟާނަތުގެ ޙައްޤު ލިބިދިނުމުގައި ރިޢާޔަތްކުރަންޖެހޭނީ އެ ދަރިންގެ މަޞްލަޙަތުގައި އޮތް އެންމެ ރަނގަޅު ގޮތަކީ ކޮބައިކަން ބަލާ އެގޮތަށެވެ. (ޕެރ. 03 (ރ))

ކުއްޖާގެ މަންމަގެ ކިބައިން ޙަޟާނަތު ގެއްލޭފަދަ ކަމެއް މެދުވެރިވެފައިވާކަން ޝަރީޢަތަށް ސާބިތުވެފައިނުވާއިރު، އަދި މަންމައާ ޙަވާލުކުރުމަކީ ކުއްޖާގެ މަޞްލަޙަތަށް އުނިކަމެއް ލިބޭފަދަ ކަމެއްކަން އެސެސްމަންޓު ރިޕޯޓުތަކުން އެނގެން ނެތްއިރު، ކުއްޖާގެ ޙަޟާނަތު ކުއްޖާގެ މަންމައާ ޙަވާލުކުރުމަކީ އެކުއްޖާގެ ޙައްޤުގައި ކުއްޖާގެ މަޞްލަޙަތަށް އެންމެ ރަގަޅުގޮތް ނޫންކަމަށް ބެލެވެން ނެތެވެ. (ޕެރ. 03 (ރ))