—

މިފަދަ މުޢާމަލާތްތައް ހިނގަމުން އަންނަނީ އެއްފަރާތުން އަނެއް ފަރާތަށް ކުރާ އިތުބާރުގެ މައްޗަށް ކަމާއި، އެ އިތުބާރު ބިނާވެފައިވަނީ އެފަދަ މުޢާމަލާތްތައް ކުރުމަށް މެދުވެރިވާ ފަރާތްތަކުގެ އަމާނާތްތެރިކަމާ ތެދުވެރިކަމުގެ މައްޗަށް ކަމާއި، އެހެންކަމުން ގިނަ ފަހަރަށް މިފަދަ މުޢާމަލާތްތައް ކުރެވިފައި ހުންނަނީ އަނގަބަހުން ކަމެވެ. (ޕެރ. 3.4)

ވިއްކުމަށް ޙަވާލުކުރާ މަސް ވިއްކާނެ ފަރާތެއް ކަނޑައެޅުމަކީ މަސް ހަވާލުވާ ފަރާތުގެ ފުރިހަމަ އިޚްތިޔާރުގައި އޮންނަ ކަމެއްކަމާއި، މަސް ހަވާލުވާ ފަރާތް އެ މަސް ގެންދަނީ، އެފަދަ ކަންކަން ކުރަން އޮންނަ އެންމެ ރައްކާތެރި ކަމާއެކު އެ މަސް ގެންގޮސް، ރަގަޅު އިތުބާރު ހިފޭ ފަރާތަކަށް އެމަސް ވިއްކުމަށްފަހު، ލިބޭ ފައިސާ އަމާނާތްތެރި ކަމާއެކު މަހުގެ ވެރިފަރާތާ ހަވާލުކުރުމުގެ ޒިންމާ އުފުލުމަށް އެއްބަސްވެގެންނެވެ. (ޕެރ. 3.4)

މަހާ ހަވާލުވެ މަސް އުފުލަދޭ ފަރާތުން، މަހުގެ އަގު ދައްވެދާފަދަ ނުވަތަ މަސް ހަލާކުވުން ފަދަ ކަމެއް މެދުވެރި ނުވުމަށްޓަކައި ރައްކާތެރިވެވެން އޮތް އެންމެ މަތީ ދަރަޖައަކަށް ރައްކާތެރިކަމުގެ ފިޔަވަޅުތައް އަޅަންޖެހޭނެއެވެ؛ މިކަންކަމުގެ މުޤާބިލުގައި މަހާ ހަވާލުވެގެން މަސް އުފުލަދޭ ފަރާތަށް ލިބޭ މަންފާއަކީ އެހެން ގޮތަކަށް އެއްބަސްވެފައި ނުވާނަމަ ބޯޓުގެ ނާލު ކަމާއި، އެހެން ގޮތަކަށް އެއްބަސްވެފައިވާނަމަ ބޯޓުގެ ނާލުގެ އިތުރުން އެ އެއްބަސްވި ގޮތެއްގެ މަތިން ލިބޭ މަންފާއެކެވެ. (ޕެރ. 3.4)

މަސް ހަވާލުވި ފަރާތުގެ އަތުން މަސް ގަތް ފަރާތަކީ ކޮންމެ ފަރާތެއް ކަމުގައިވިޔަސް، އެފަރާތެއްގެ މައްޗަށް މަސް ހަވާލުކުރި ފަރާތްތަކުން ދަޢުވާ ނުކުރެވޭނެއެވެ؛ މަހާ ހަވާލުވި ފަރާތުގެ މައްޗަށް ސީދާ ކުރާ ދަޢުވާގައި ގޮތެއް ކަނޑައެޅުމުގެ މިޞްރާބު ހިފަން ޖެހޭނީ، ނުލިބިވާ ފައިސާ މަހުގެ ވެރިފަރާތްތަކަށް ދިނުމަކީ އޭނާގެ ޒިންމާއެއްކަން ނުވަތަ ނޫންކަން ކަނޑައެޅުމުގެ މައްޗަށެވެ؛ މަސް ގަތް ފަރާތުން ފައިސާ ނުދީފައިވާކަމަށް ބުނާ ބުނުމަކީ އެ ދަޢުވާގެ ތެރެއިން ބަލަންޖެހޭ މައްސަލައެއް ނޫން، ވަކި މައްސަލައެކެވެ. (ޕެރ. 3.4)

ޝަރުޢީ ހަމަތަކުގެ މަތިން ހުވާ ލާޒިމްވާ ފަރާތަށް ހުވާދިނުމުން އެފަރާތުން ހުވާކުރުމަށް އިންކާރުކޮށްފިނަމަ ނުވަތަ ހުވާ ރައްދުކޮށްފިނަމަ، ރައްދުގެ ހުވާ ކުރުވާ ފަރާތުގެ ހުވާގެ ޢިބާރާތްވެސް ވާންޖެހޭނީ ސީދާ އެ މުޢާމަލާތު ކުރެވުނު ފަރާތް ޒިންމާ ކުރުވައި އުޞޫލުން އެކުލަވާލެވިފައިވާ ޢިބާރާތަކަށެވެ؛ ތިންވަނަ ފަރާތަކުން އެފައިސާ ލިބުމުން ފައިސާ ދިނުމުގެ އިލްތިޒާމު އޮތްކަން ދޭހަވާގޮތަށް އެކުލަވާލެވޭ ޞީޣާއެއްގެ މައްޗަށް ހުވާކުރުވުމާއި، އެފަދަ ޞީޣާއަކުން ޙުކުމް ކުރުމަކީ ޝަރުޢީ އުޞޫލާ އެއްގޮތް ކަމެއް ނޫނެވެ؛ އެހެނީ އެފަދަ ޞީޣާތަކުން ކުރައްވާ ޙުކުމްތައް ތަންފީޒު ކުރުމަކީ އެކަށީގެންވާ ކަމެއް ކަމުގައި ނުވާތީއެވެ. (ޕެރ. 3.4)