—

ވަޒީފާއާބެހޭ މައްސަލައެއް ވަޒީފާގެ އެއްބަސްވުމުގެ މައްޗަށް ބިނާކޮށް ދަޢުވާކުރާނަމަ، ދަޢުވާކުރެވޭނީ ވަޒީފާއާބެހޭ މައްސަލަތައް ހުށަހެޅުމަށް އޮންނަ މުއްދަތުގައި، އެފަދަ މައްސަލަތައް ހުށަހެޅުމަށް ކަނޑައެޅިފައިވާ އުޞޫލުން، އެފަދަ މައްސަލަތައް ބެލުމުގެ އިޚްތިޞާޞް އޮންނަ ފަރާތަށް ހުށަހަޅައިގެންނެވެ. އެއާ ޚިލާފަށް އެފަދަ މައްސަލައެއް، ދެފަރާތެއްގެ ދެމެދުގައި ވެވޭ އެއްބަސްވުމަކާމެދު ޚިލާފު އުފެދިގެން ނުވަތަ އެއްބަސްވުމަކާ ޚިލާފުވެގެން ހުށަހެޅޭ މައްސަލައެއްގެ ގޮތުގައި ސިވިލް ކޯޓަށް ނުވަތަ ކަމާބެހޭ ދަށު ކޯޓަށް ހުށަނޭޅޭނެއެވެ. (ޕެރ. 3.1)

ދެފަރާތުގެ ދެމެދުގައި އޮތް ވަޒީފާގެ ގުޅުން ނިމޭފަހުން ދެފަރާތުން ވެވޭ އެއްބަސްވުންތަކުގެ މައްޗަށް ބިނާކޮށް އުފެދޭ މައްސަލަތައް، ވަޒީފާއާބެހޭ ޓްރައިބިއުނަލުން ނުބެލުނު ކަމުގައިވިޔަސް، އެފަދަ މައްސަލަތައް ހުށަހެޅުމަށް އޮންނަ އުޞޫލުތަކާ އެއްގޮތަށް ސިވިލް ކޯޓަށް ނުވަތަ އެނޫންވެސް ކަމާބެހޭ ދަށު ކޯޓަށް ހުށަހެޅިދާނެއެވެ. (ޕެރ. 3.1)

އެފަދަ މައްސަލަތައް ބެލެވޭގޮތަށް އޮތުމަކީ ވަޒީފާ އަދާކުރި މުވައްޒަފު ވަޒީފާއިން ވަކިކުރާއިރު ނުވަތަ ވަކިވާއިރު، އެފަރާތަށް ލިބެންވާ ޙައްޤުތައް ލިބިދިނުމަށް މުހިއްމު ކަމެކެވެ. އެހެން ނޫންނަމަ، މުވައްޒަފަށް ދޭންޖެހޭ މުސާރަ ނުވަތަ ވަޒީފާއާ ގުޅިގެން ލިބެންވާ ޙައްޤެއް ނުވަތަ ބަދަލެއް ދިނުމަށް އެއްބަސްވެ، 03 މަސް ފާއިތުވަންދެން މުވައްޒަފު އިންތިޒާރުގައި ބެހެއްޓުމަށްފަހު އެ ޙައްޤު ދިނުމަށް ފަހުން އިންކާރުކޮށް، މުވައްޒަފުންނަށް ލިބެންވާ ޙައްޤުތަކުން އޮޅުވާލައިގެން މަޙުރޫމުކުރުމަށް ނުޙައްޤު މަގެއް ހުޅުވޭގޮތްވާނެއެވެ. މިއީ އިންޞާފުގެ ހަމަތަކުން ބަލާއިރު ޤަބޫލުކުރެވޭނެ ކަމެއް ނޫނެވެ. (ޕެރ. 3.1)

ވަޒީފާއިން ވަކިކުރިކަން އަންގައި ފޮނުވި ސިޓީގައި، އެއްބަސްވުމުގެ ބާކީ މުއްދަތަށް ދޭންޖެހޭ މާލީ މަންފާތައް (Remunerations) ނުވަތަ މާލީ ބަދަލު (Compensation) ދޭނެކަމަށް ބުނެ އެކަމަށް އެއްބަސްވުމަށްފަހު، އެ ބަދަލު ދިނުމަށް ފަހުން އިންކާރުކޮށްފައިވުމުން، އެ ބަދަލު ހޯދުމަށް ހުށަހަޅާ މައްސަލައަކީ ސިވިލް ކޯޓުން ބެލޭނެ މައްސަލައެކެވެ. (ޕެރ. 3.1)

މައްސަލައަކީ ވަޒީފާގެ މައްސަލައެއްގެ ގޮތުގައި ސިވިލް ކޯޓުން ބަލައިގަނެފައިވާ މައްސަލައަކަށް ނުވާއިރު، މުވައްޒަފު ވަޒީފާއިން ވަކިކުރެވިފައިވަނީ ރަނގަޅަށްކަން ނުވަތަ ނޫންކަން ކަނޑައަޅަންޖެހޭ މައްސަލައެއް ނޫނެވެ. އެފަދަ މައްސަލައެއް ވަޒީފާގެ މައްސަލައެއްގެ ގޮތުގައި ބައްލަވައި ފާހަގަކުރައްވާފައިވާ ކަންކަމަކީ، ސިވިލް ކޯޓަށް ބަލައިގަނެފައިވާ މައްސަލައާއި ތަފާތުކޮށް ސިވިލް ކޯޓުގެ އިޚްތިޞާޞުގެ ބޭރުން ފާހަގަކުރައްވާފައިވާ ބާޠިލު ކަންތައްތަކެކެވެ. (ޕެރ. 3.2، 3.4)

ވަޒީފާއިން ވަކިކޮށް ފޮނުވި ސިޓީގައި އެއްބަސްވުމުގެ ބާކީ އޮތް މުއްދަތަށް ބަދަލެއްގެ (Compensation) ގޮތުގައި މުސާރައާއި އިނާޔަތްތައް (Remunerations) ދިނުމަށް ވަޒީފާދޭ ފަރާތުން އެއްބަސްވެފައިވާނަމަ، ވަޒީފާގެ އެއްބަސްވުމުގައި "Compensation" ބަޔާންކުރެވިފައިވާ ގޮތަށް ރިޢާޔަތްކުރުމަކީ ލާޒިމު ކަމެއްކަމަށް ނުބެލެވޭނެއެވެ. (ޕެރ. 3.4)