—

ކޯޓަށް ހުށަހެޅިފައިވާ ޚުސޫމާތަކާއި ގުޅިގެން ފުރަތަމަ މަރުޙަލާގެ ކޯޓުން ފައިޞަލާ ކުރަންވާނީ ޚަސްމުންގެ ފަރާތުން ހުށަހަޅާފައިވާ ވަޤާއިޢުތަކުގެ މައްޗަށް ބިނާކޮށް ފައިޞަލާ ކުރުމަށް އެދިފައިވާ ކަންތައްތަކަށެވެ. ޚަސްމުންގެ ފަރާތުން ފައިޞަލާ ކުރަން އެދިފައިނުވާ، އަދި ކޯޓަށް ހުށަހެޅި ބަލާފައިނުވާ ވަޤާއިޢުތަކަކަށް ފައިޞަލާކޮށްގެން ނުވާނެއެވެ. (ސުޕްރީމް ކޯޓުގެ 2013/SC-A/44 ޤަޟިއްޔާ) (ޕެރ. 3 (ށ))

ނިންމުމުގެ ސީދާ އަސަރު ފޯރާނެ ފަރާތެއްގެ ބަހެއް ހޯދުމަކާއި ނުލައި، އެފަރާތުގެ ނަމުގައި ރަޖިސްޓްރީ ކުރެވިފައިވާ ގޯތީގެ ރަޖިސްޓްރީއަކީ ބާޠިލް ރަޖިސްޓްރީއެއްކަމަށް ކަނޑައެޅުމަކީ، މަސްލަޙަތު ހިމެނޭ ފަރާތުގެ ބަހެއް ހޯދުމަކާއި ނުލައި ކަނޑައެޅުމުން، ހައިކޯޓުގެ 2011/HC-A/183 ޤަޟިއްޔާގައި ކަނޑައަޅުއްވާފައިވާ އުޞޫލާ ޚިލާފު ކަމެކެވެ. (ޕެރ. 3 (ށ))

ޤާނޫނު ނަންބަރު 21/98 (މީހުން އުޅޭ ރަށްރަށުގެ ރުއްގަހާ ބެހޭ ޤާނޫނު) ގެ 5 ވަނަ މާއްދާގައި ބަޔާންކުރެވިފައިވާ ގޮތުގައި މީހުން އުޅޭ ރަށްރަށުގެ ރުއްގަހުގެ ރަޖިސްޓްރީ ބަލަހައްޓާނީ އެރަށެއްގެ ރަށު އޮފީހުންނެވެ. ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) އަށް ޢަމަލު ކުރަންފެށުމާއެކު ރަށު އޮފީސްތަކުގެ ބެލުމުގެ ދަށުން ބަލަހައްޓަމުންދިޔަ އެފަދަ ވަޞީލަތްތައް ރަށު ކައުންސިލްގެ ބެލުމުގެ ދަށަށް ބަދަލުވެފައިވާކަން އެ ޤާނޫނުގެ 139 ވަނަ މާއްދާއިން އެނގެއެވެ. (ޕެރ. 3 (ނ))

ދައުލަތުގެ މުއައްސަސާތަކާއި އިދާރާތައް ޝަރުޢީ ކޯޓުތަކުގައި ތަމްސީލުކުރާނީ ދައުލަތުގެ ބަންޑާރަނައިބެވެ. (ސުޕްރީމް ކޯޓުގެ 2015/09 ޢާންމު ސިޓީ) (ޕެރ. 3 (ނ))

މީހުން ދިރިއުޅޭ ރަށްރަށުގެ ރުއްގަހުގެ ރަޖިސްޓްރީއަކީ އެރަށެއްގެ ކައުންސިލް އިދާރާއިން ބަލަހައްޓާ ރަޖިސްޓްރީއެއްކަމަށް ވާއިރު، ރުއްތަކުގެ ޞައްޙަ މަޢުލޫމާތު ހުންނަންޖެހޭ ރަސްމީ އިދާރާއެއްގެ ހައިސިއްޔަތުން ރަށު ކައުންސިލްގެ އިދާރާގެ ފަރާތުން އެ ރުއްތަކަކީ ވަކި ފަރާތެއްގެ ރުއްތަކެއްކަމަށް ޤަބޫލުކޮށް އެ ރުއްތަކަށް ބަދަލު ދިނުމަށް ބަދަލުގެ ފައިސާ ބަލައިގެންފައިވުމުންނާއި، ދައުލަތުގެ ފަރާތުން ޝަރީޢަތުގެ މަޖިލީހުގައި ވެފައިވާ އިޢުތިރާފަށް ބަލާއިރު، އެރުއްތަކަކީ އެފަރާތުގެ ރުއްތަކެއްކަމަށް ބަލަންޖެހެއެވެ. (ޕެރ. 3 (ނ))

ބަންޑާރަ ގޯއްޗާއި އިމާރާތް ރަޖިސްޓަރީ ކުރުމާއި ބެހޭ ޤަވާޢިދުގެ 5 ވަނަ މާއްދާގައިވާގޮތުން ދިރިއުޅުމަށް ގޯތި ދޫކުރާތާ 1 އަހަރު ދުވަހުގެ ތެރޭގައި އެ ގޯތި ރަޖިސްޓަރީކުރުމަށް އެދި ހުށަހަޅަން ޖެހޭނެއެވެ. އަދި އެ ޤަވާޢިދުގެ 6 ވަނަ މާއްދާގައިވާގޮތުން ދިރިއުޅުމަށް ދޫކުރެވޭ ބަންޑާރަ ގޯތީގެ ރަޖިސްޓަރީ ހަދައިދެވެންވާނީ އެ ގޯތީގައި ހުރި ރުއްގަހުގެ ބަދަލު އޭގެ ވެރިފަރާތަށް ދިނުމަށްފަހުގައެވެ. (ޕެރ. 3 (ރ))

ރުއްގަހުގެ ވެރިފަރާތަށް އޮތް ޙައްޤަކީ އޭނާގެ ރުއްތަކުގެ ބަދަލު ލިބުންކަމަށްވާ ޙާލަތުގައި، އެ ބަދަލު ޞުލްޙަވެރިކޮށް ހަމަޖައްސައި އެ ބަދަލު ލިބިގަތުމަކީ އެންމެ ރަނގަޅު ގޮތެވެ. ނަމަވެސް އެ ބަދަލާމެދު އެއްބަސް ނުވެވިއްޖެނަމަ އެ ބަދަލުގެ ކަންތައް ހަމަޖެއްސުމަށް ކަމާބެހޭ ކޯޓަށް ހުށަހެޅުމުގެ ޙައްޤު އޭނާއަށް ލިބިގެންވެއެވެ. (ޕެރ. 3 (ރ))