—

ކުށެއްގެ ތުހުމަތުގައިވާ މީހެއްގެ ބަންދާމެދު ގޮތެއް ނިންމުމުގައި ފަނޑިޔާރު ބަލަންޖެހޭނީ ޤާނޫނުއަސާސީގެ 49 ވަނަ މާއްދާއާއި [ކުށެއްގެ ތުހުމަތުގައި ބަންދުކުރެވޭ މީހުން ފަނޑިޔާރެއްގެ ކުރިމައްޗަށް ޙާޟިރުކޮށް ބަންދާމެދު ގޮތެއް ނިންމުމުގެ ޤަވާޢިދު] ގެ 7 ވަނަ މާއްދާގެ (ހ) ގައި ބަޔާންކޮށްފައިވާ 5 ސަބަބުންކުރެ ސަބަބެއް އޮތްތޯއެވެ. (ޕެރ. 03 (ހ))

ކުށެއްގެ ތުހުމަތުގައިވާ މީހެއްގެ ބަންދާމެދު ގޮތެއް ނިންމުމުގައި، [ކުށެއްގެ ތުހުމަތުގައި ބަންދުކުރެވޭ މީހުން ފަނޑިޔާރެއްގެ ކުރިމައްޗަށް ޙާޟިރުކޮށް ބަންދާމެދު ގޮތެއް ނިންމުމުގެ ޤަވާޢިދު] ގެ 7 ވަނަ މާއްދާގެ (ހ) ގައިވާ ސަބަބުތަކުން ސަބަބެއް އޮތްކަން ނުވަތަ ނެތްކަމާމެދު ގޮތެއް ނިންމުމުގެ ބާރު ލިބިދީފައިވަނީ ފަނޑިޔާރަށްކަން ޤާނޫނުއަސާސީގެ 48 ވަނަ މާއްދާގެ (ރ) އަށާއި 49 ވަނަ މާއްދާއަށް ބެލުމުން އެނގެން އޮވެއެވެ. (ޕެރ. 03 (ހ))

ތުހުމަތުކުރެވިފައިވާ މައްސަލައެއްގެ ހެކި ފޮރުވުމަށް ނުވަތަ ހެކިބަސްދޭން ހުރި މީހަކަށް ނުފޫޒެއް ފޯރުވުމަށް މަސައްކަތް ކޮށްފާނެކަމަށް، ނުވަތަ ކޯޓަށް ހާޒިރު ނުވެދާނެކަމަށް، ނުވަތަ ފިލާފާނެކަމަށް، ނުވަތަ ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެކަމަށް ފަނޑިޔާރަށް ފެނިއްޖެނަމަ، އެމީހަކު ބަންދުގައި ބެހެއްޓުމުގެ އަމުރެއް ނެރުމުގެ ބާރު ފަނޑިޔާރަށް ލިބިގެންވެއެވެ. (ޕެރ. 03 (ހ))

ޤާނޫނު ނަންބަރު 12/2009 ގެ ދަށުން ކުށުގެ ތުހުމަތު ކުރެވޭ މީހާ ތަޙުޤީޤުގެ މަރުޙަލާއާއި ޝަރީޢަތުގެ މަރުޙަލާ ނިމެންދެން ބަންދުގައި ބަހައްޓަން ބޭނުންވާ ޙާލަތުގައި ޢަމަލުކުރަންޖެހޭ ގޮތް އެޤާނޫނުގެ 30 އަދި 31 ވަނަ މާއްދާގައި ބަޔާންކުރެވިފައިވާއިރު، އެޤާނޫނުގައި ބަޔާންވެފައިވާ ކުށެއްގެ ތުހުމަތުގައިވާ މީހާއަކީ ހެކި ފޮރުވުމަށް މަސައްކަތް ކޮށްފާނެ، ނުވަތަ ހެކިންނަށް ނުފޫޒު ފޯރުވުމަށް މަސައްކަތް ކޮށްފާނެ މީހެއްކަމަށް، ނުވަތަ އެމީހާގެ ސަބަބުން މުޖުތަމަޢުގެ ސަލާމަތަށް ނުރައްކާވެދާނެ ކަމަށް ޤަބޫލުކުރެވޭނަމަ، އެ ޤާނޫނުގައި ބަޔާންކޮށްފައިވާ އިޖުރާއާތުތައް ނެގެހެއްޓުމަށް މޯލްޑިވްސް ޕޮލިސް ސަރވިސްގެ ފަރާތުންވެސް އަދި ޕްރޮސިކިއުޓަރ ޖެނެރަލްގެ ފަރާތުން މަސައްކަތްކުރަންޖެހޭނެއެވެ؛ އެ އިޖުރާއާތުތައް ނެގެހެއްޓުމަކީ މުޖުތަމަޢުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި ކޮންމެހެން ބޭނުންތެރި ކަމެކެވެ. (ޕެރ. 03 (ނ))

ޤާނޫނު ނަންބަރު 12/2009 އިން ލިބިދޭ ޚާއްޞަ އުޞޫލުތަކާ އެއްގޮތަށް ޢަމަލުކުރުމަށް އެޤާނޫނުގައި ބަޔާންކޮށްފައިވާ އިޖްރާއާތުތައް ފުލުހުން ފުރިހަމަކޮށް އެއާ އެއްގޮތަށް ޢަމަލުކޮށްފައިވާކަން އެނގެންނެތި، ޖިނާއީ ތުހުމަތެއްކުރެވިފައިވާ މީހަކު ބަންދުގައި ބެހެއްޓުމުގައި ޢަމަލުކުރަންޖެހޭ ޢާންމު އިޖްރާއާތުތަކާ އެއްގޮތަށް ޢަމަލުކޮށްފައިވާއިރު، އެ ޤާނޫނުގައި ބުނެފައިވާ ޚާއްޞަ އިޖްރާއާތާ އެއްގޮތަށް ޕްރޮސިކިއުޓަރ ޖެނެރަލްގެ ފަރާތުން ހުށަހަޅާފައިނުވާނަމަ، ތުހުމަތުކުރެވިފައިވާ ކުށަކީ އެ ޤާނޫނުގައި ކަނޑައެޅިފައިވާ ކުށަކަށްވުމުން، ބަންދުން ދޫކޮށްލުމަށް ކުރި އަމުރު ޝަރުޢީ ނުވަތަ ޤާނޫނީ އުޞޫލަކާވިޔަސް ޚިލާފަށް ކަމަށް ބަލާނެ ހަމައެއް ނެތެވެ. (ޕެރ. 03 (ނ))