—

ޤާނޫނުއަސާސީގެ 49 ވަނަ މާއްދާއާއި "ކުށެއްގެ ތުހުމަތުގައި ބަންދުކުރެވޭ މީހުން ފަނޑިޔާރެއްގެ ކުރިމައްޗަށް ޙާޟިރުކޮށް ބަންދާމެދު ގޮތެއް ނިންމުމުގެ ޤަވާޢިދު" ގެ 7 ވަނަ މާއްދާގެ (ހ) އަށް ބަލާއިރު، ކުށެއްގެ ތުހުމަތުގައި ހައްޔަރުކުރެވޭ މީހަކު ބަންދުގައި ބެހެއްޓުމަށް އަމުރުކުރުމުގެ ބާރު ފަނޑިޔާރަށް ލިބިދީފައިވާ ޙާލަތްތަކުގެ ތެރޭގައި، އެމީހަކާމެދު ތުހުމަތުކުރެވިފައިވާ މައްސަލައެއްގެ ހެކި ފޮރުވުމަށް ނުވަތަ ހެކިބަސް ދޭން ހުރި މީހަކަށް ނުފޫޒެއް ފޯރުވުމަށް މަސައްކަތްކޮށްފާނެކަމަށް، ނުވަތަ ކޯޓަށް ޙާޟިރު ނުވެދާނެކަމަށް، ނުވަތަ ފިލާފާނެކަމަށް، ނުވަތަ ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެކަމަށް ފަނޑިޔާރަށް ފެނިއްޖެނަމަ، އެމީހަކު ބަންދުގައި ބެހެއްޓުމުގެ އަމުރެއް ނެރުމުގެ ބާރު ފަނޑިޔާރަށް ލިބިދީފައިވެއެވެ. (ޕެރ. 4 (ހ))

ސުޕްރީމް ކޯޓުގެ ނަންބަރު 2010/SC-A/19 ޤަޟިއްޔާގެ 9 ވަނަ ނުކުތާގައިވާ ގޮތުން، ޤާނޫނުއަސާސީގެ 49 ވަނަ މާއްދާއާ އެއްގޮތަށް މީހަކު ބަންދުކުރުމުގައި، ތުހުމަތުކުރެވޭ ކުށް ސާބިތުކުރުމަށް ކާފީ ހެކިތަކެއް ނެތްކަމުގައިވިޔަސް، ޝައްކުކުރެވޭ ކުށުގެ ނުރައްކާތެރިކަމަކީ ކޮބައިކަމާއި، އެކުށް ތަޙުޤީޤު ކުރުމުގައި ހުރީ ކިހާ މިންވަރެއްގެ އުނދަގޫތަކެއްތޯއާއި، އެކަމުގައި ހިމެނޭ މީހުންގެ އަދަދަކީ ކޮބައި ކަމާއި، ކުށުގެ ޠަބީޢަތަކީ ކޮބައި ކަމާއި، ކުށުގެ ކުޑަބޮޑުމިނަކީ ކޮބައިކަމާއި، އެކުށަށް ޤާނޫނުގައި ކަނޑައެޅިފައިވާ އަދަބަކީ ކޮބައިކަމާއި، ޝައްކު ކުރެވޭ މީހާ ފިލައި ރައްކާވުމުގެ ބިރު އޮތީ ކިހާވަރަކަށް ކަމާއި، ހެކިތަކާކުޅެ ހެކިތައް ނައްތާލުމުގެ ބިރު އޮތީ ކިހާ ވަރަކަށް ކަން ފަނޑިޔާރު ވަޒަންކުރަންޖެހޭނެއެވެ. (ޕެރ. 4 (ށ))

ޤާނޫނުއަސާސީގެ 49 ވަނަ މާއްދާގައި ބަޔާންކޮށްފައިވާ ޙާލަތްތަކުންކުރެ ޙާލަތެއްގައި މެނުވީ އެއްވެސް މީހަކު ބަންދުގައި ބަހައްޓައިގެން ނުވާނެކަމަށް ބަޔާންކޮށްފައިވާ އުޞޫލަށް ބަލާއިރު، ކުށެއްގެ ތުހުމަތުކުރެވިފައިވާ މީހަކު ބަންދުގައި ބެހެއްޓުމަށް އަމުރު ނެރެންވާނީ، އެމީހަކާ ދެކޮޅަށް ލިބިފައިވާ ހެކި/ޤަރީނާތަކުގެ އަލީގައި އެމީހަކު ބަންދުގައި ބަހައްޓަން ޖެހޭފަދަ ކުށެއްކުރިކަމުގެ ތުހުމަތު ކުރުމަށް ފުދޭ ހެކި ހުރުމާއި އަދި އެފަދަ މީހަކު ބަންދީގައި ބެހެއްޓުމަކީ ޟަރޫރަތަކަށްވާނަމައެވެ. (ޕެރ. 4 (ނ))

ބަންދުގައި ބެހެއްޓުމުގެ އަމުރެއް ކޯޓުން ނެރުއްވަނިވާނީވެސް އެއަމުރު ނިސްބަތްވާ މީހަކީ އެމީހެއްގެ މައްޗަށް ކުރެވިފައިވާ ކުށުގެ ބާވަތަށާއި، އެމީހަކާ އިދިކޮޅަށް އެހާތަނަށް ލިބިފައިވާ ހެކި/ޤަރީނާތަކަށާއި، ކަމާގުޅުންހުރި ވަށައިގެންވާ ޙާލަތަށް ބަލާއިރު އެމީހަކު ބަންދުގައި ބެހެއްޓުމުގެ ޟަރޫރަތެއް އޮތްކަމަށް ކަމާބެހޭ ކޯޓަށް ފެންނަ ޙާލަތުގައި އެކަނިއެވެ. (ޕެރ. 4 (ނ))

ތުހުމަތުކޮށްފައިވާ ކުށަށް ޤާނޫނުގައި ކަނޑައެޅިފައިވާ އަދަބުގެ މިންވަރަށާއި، މައްސަލައިގެ ތަޙްޤީޤު ގޮސްފައިވާ ހިސާބަށާއި، ބަންދުގައި ހޭދަވެފައިވާ މުއްދަތަށާއި، ކުށުގެ ރެކޯޑަށާއި، މައްސަލައިގެ ވަށައިގެން ހުރި މިފަދަ އެންމެހައި ކަންކަމުގެ މައްޗަށް ބެލުމުން އަދި ހައިކޯޓުން ކުރި ޝަރުޠުތަކާ އެއްގޮތަށް ޢަމަލުކުރުމަށް ތުހުމަތުކުރެވޭ ފަރާތް އެއްބަސްވެފައިވާތީ، އެޝަރުޠުތަކާ އެއްގޮތަށް ޢަމަލުކުރުމަށް އަންގައި ބަންދުން ދޫކޮށްލުމަށް ހައިކޯޓަށް ފެނުނެވެ. (ޕެރ. 4 (ނ))