—

ދަޢުވާކުރާ ފަރާތުން ދަޢުވާގައި ހޯދުމަށް އެދިފައިވާ ޢަދަދާމެދު، ދަޢުވާލިބޭ ފަރާތުން އިންކާރު ކުރާ ޙާލަތުގައި، ނުވަތަ ދެފަރާތަށް ވަކި އަގަކާމެދު އެއްބަސްވެވިފައިނުވާ ޙާލަތުގައި މިޘްލީ އަގެއް ކަނޑައެޅުމަކީ ދެފަރާތުގެ މެދުގައި އުފެދިފައިވާ ޚިލާފު ފައިޞަލާ ކުރުމަށްޓަކައި ޝަރުޢީ ޤާނޫނީ ގޮތުން ޢަމަލު ކުރެވެމުންދާ ގޮތެވެ؛ އެގޮތުން މިޘްލީ އަގެއް ކަނޑައެޅެނީ ޝަރުޢީ އަގުކޮމެޓީ މެދުވެރިކޮށެވެ. (ޕެރ. 3(ށ))

ޤާނޫނު ނަންބަރު 4/91 (ކޮންޓްރެކްޓާބެހޭ ޤާނޫނު) ގެ 23 ވަނަ މާއްދާގެ ދަށުން، ކޮންޓްރެކްޓްގެ ބައިވެރިޔަކު ކޮންޓްރެކްޓާ ޚިލާފުވުމުގެ ސަބަބުން ލިބޭ ސީދާ ގެއްލުމާއި، ކޮންޓްރެކްޓްގެ ބައިވެރިޔަކު ކޮންޓްރެކްޓާ ޚިލާފު ޢަމަލެއް ކުރުމުން ކޮންޓްރެކްޓްގެ ބައިވެރިންނަށް އެނގިފައިވާ ގެއްލުމުގެ ބަދަލު ކަނޑައެޅެއެވެ. (ޕެރ. 3(ށ))

އިސްތިއުނާފީ މަރުޙަލާގައި ހައިކޯޓުން މައްސަލަތައް ބެލުމުގައި އަސާސެއްކަމަށް ބަލާނީ، ދަށުކޯޓަށް ހުށަހެޅިފައިވާ ހެކިތަކާއި ދިފާޢުތަކެވެ. (ޕެރ. 3(ށ))

އިސްތިއުނާފީ މަރުޙަލާގައި އާ ހެއްކެއް ހުށަހެޅުމުގެ ފުރުޞަތު ލިބޭނީ، އެ ހެއްކަކީ ދަށުކޯޓަށް ހުށަހެޅުމުގެ ފުރުޞަތު ލިބިފައިނުވާ ހެއްކެއްކަމުގައި ވާނަމައެވެ؛ ދަށުކޯޓަށް ހުށަހެޅުމުގެ ފުރުޞަތު އޮވެމެ އެފުރުޞަތުގެ ބޭނުން ހިފުމަކާ ނުލައި އެ ހެއްކެއް އިސްތިއުނާފީ މަރުޙަލާގައި ބަލައިނުގަނެވޭނެއެވެ. ދަށުކޯޓަށް މައްސަލަ ހުށަހެޅި އިރުވެސް ވުޖޫދުވެފައިވާ ހެއްކަކީ ދަށުކޯޓުގެ ޝަރީޢަތުގެ މަޖިލީހަށް ހުށަހެޅުމުގެ ފުރުޞަތާއި މަގު ފަހިވެފައިއޮތް ހެއްކެވެ. (ޕެރ. 3(ށ))

ކުއްޔަށް ގެންދާ ތަކެތީގެ ކުއްޔާގުޅޭ މައްސަލަތައް ފިޔަވައި އެހެން މައްސަލަތަކުގައި، ޤާނޫނީ ވަކީލުންގެ ފީ، މައްސަލައިގެ އަނެއް ޚަސްމުގެ އަތުން ނަގައިދެވޭނެ ގޮތްތަކެއް ބަޔާންކުރާ ޤާނޫނެއް އަދި ގަވާއިދެއްވިޔަސް ނެތެވެ. ދެޚަސްމުންގެ ދެމެދުގައި މިފަދަ ޚަރަދުތަކާ ގުޅޭގޮތުން ކުރިން ވަކިގޮތަކަށް އެއްބަސްވެފައިނުވާއިރު، މައްސަލައެއް ޝަރީޢަތަށް ހުށަހެޅުމަށްފަހު ވަކީލާއި މުވައްކިލާ ދެމެދު އެއްބަސްވާ ފީއާއި ޚަރަދުތަކުގެ އިލްތިޒާމް އުފުލަންޖެހޭ ފަރާތަކީ މައްސަލައިގެ އަނެއް ޚަސްމުކަމަށް ކަނޑައެޅުމަކީ، ޢަމަލުކުރެވޭނެ އެންމެ އިންސާފުވެރި ގޮތެއް ނޫނެވެ. (ޕެރ. 3(ނ))

ވަކީލު ފީ، މައްސަލައިގެ އަނެއް ޚަސްމުގެ އަތުން ނަގައިދިނުމުގައި ކޯޓުތަކުން ޢަމަލުކުރަމުން އަންނަ ގޮތަކީ، ދެޚަސްމުންގެ ދެމެދު މިކަމާގުޅޭ ގޮތުން އޮތް އެއްބަސްވުމެއް އޮތްނަމަ އެއާ އެއްގޮތަށް ޤާނޫނީ ވަކީލުންގެ ފީ ނަގައިދިނުމެވެ؛ އަދި އެފަދަ އެއްބަސްވުމެއް ނެތްނަމަ، ޤާނޫނީ ވަކީލުންގެ ފީ ނަގައިދެވޭނެ ތަނެއް ނެތެވެ. (ޕެރ. 3(ނ))