ފާރޫޤް ޙަސަން ވ. ހޮޓެލްސް އެންޑް ރިސޯޓް ކޮންސްޓްރަކްޝަން ޕްރައިވެޓް ލިމިޓެޑް

ނަތީޖާ: އިސްތިއުނާފީ ދަޢުވާ ކުރިއަށް ނުގެންދެވޭނެކަމަށް ނިންމި (ދަޢުވާ ފޯމް ބާޠިލު)

ދަށު ކޯޓު: ސިވިލް ކޯޓު 1745/Cv-C/2016

ކޯޓުން ނިންމަން ޖެހުނު ސުވާލު

ދަށުކޯޓުގެ ނިންމުން ޚިލާފުވި ޤާނޫނީ އުޞޫލެއް ބަޔާންނުކޮށް ހުށަހަޅާފައިވާ އިސްތިއުނާފީ ނުކުތާތަކުގެ މައްޗަށް އިސްތިއުނާފީ ދަޢުވާ ކުރިއަށް ގެންދެވޭނެތޯ.

ކަނޑައެޅި ޤާނޫނީ އުޞޫލުތައް

1. ޤާނޫނަކުން އިސްތިސްނާނުކުރާހާ ހިނދަކު ދަށު ކޯޓުތަކާއި ޓްރައިބިއުނަލްތަކުން ނިންމާ އެންމެހައި ނިންމުންތައް އިސްތިއުނާފުކުރާނީ ހައިކޯޓުގައެވެ؛ އަދި ޤާނޫނުއަސާސީއާ ނުވަތަ ޤާނޫނަކާ ނުވަތަ ގަވާއިދަކާ ޚިލާފުކަމަށް ޤަބޫލުކުރެވޭ ދަށުކޯޓުގެ ނިންމުމެއް ކަމުގެ މަޞްލަޙަތު އޮތް ފަރާތަކުން ހުށަހެޅުމުން ބެލުމުގެ އިޚްތިޞާޞް ހައިކޯޓަށް ލިބިގެންވެއެވެ. (ޕެރ. 9–11)
2. ދަށުކޯޓުގެ ނިންމުމެއް އިސްތިއުނާފުކުރެވޭނެ ޙާލަތްތަކުގެ ތެރޭގައި، ނިންމުން ބިނާކުރެވިފައިވަނީ ޤާނޫނާ ޚިލާފަށްކަމަށް ޤަބޫލުކުރެވޭނެ ސަބަބުތައް ހުރުމާއި، ޤާނޫނު ތަޠުބީޤުކުރުމުގައި ނުވަތަ މާނަކުރުމުގައި ކުށެއް ހެދިފައިވުން ހިމެނެއެވެ. (ޕެރ. 12)
3. ދަށުކޯޓުގެ ޙުކުމް ޤާނޫނާ ޚިލާފަށް ނިންމާފައިވާކަމަށް ބުނާނަމަ އިސްތިއުނާފީ ނުކުތާގައި ޚިލާފުވި ޤާނޫނީ އުޞޫލު ބަޔާންކުރަންވާނެއެވެ؛ ނިންމުން ރަނގަޅު ނޫންކަމަށް ހަމައެކަނި ބުނުމާއި، އެއްބަސްވުމުގެ އެއްވެސް މާއްދާއަކަށް ޙަވާލާނުދީ ނުވަތަ މާނަކުރުމުގެ ކޮން ހަމައަކާ ޚިލާފުވީކަން ބަޔާންނުކޮށް އެއްބަސްވުން މާނަކުރީ ރަނގަޅަށް ނޫންކަމަށް ބުނުމަކީ ފުދޭ ނުކުތާއެއް ނޫނެވެ. (ޕެރ. 13)
4. ދަށުކޯޓުން ވަކި ކަމަކަށް ރިޢާޔަތްނުކުރާ ކަމަށް ބުނާ ނުކުތާއެއް، ދަށުކޯޓުގެ ނިންމުމުގައި އެކަމަށް ރިޢާޔަތްކޮށްފައިވާކަން އެނގެން އޮތްނަމަ ބިނާނުވެއެވެ. (ޕެރ. 13)
5. އިސްތިއުނާފީ ނުކުތާތަކަކީ ހަރުދަނާ ޤާނޫނީ އަސާސްތަކެއްގެ މައްޗަށް ބިނާވެފައިވާ ނުކުތާތަކެއްކަން އެނގޭގޮތަށް ހުށަހަޅާފައި ނުވާނަމަ، އެ ނުކުތާތަކުގެ މައްޗަށް އިސްތިއުނާފީ ދަޢުވާ ކުރިއަށް ނުގެންދެވޭނެ ކަމުން ދަޢުވާ ފޯމު ބާޠިލުކުރަންޖެހެއެވެ. (ޕެރ. 14–15)

ބަލާފައިވާ ޤާނޫނުތައް

• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 31 ވަނަ މާއްދާ
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 36 ވަނަ މާއްދާގެ (ނ)
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 38 ވަނަ މާއްދާ
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 43 ވަނަ މާއްދާ