މުޙައްމަދު މުޚްތާރު ވ. ސްޓޭޓް ޓްރޭޑިންގ އޮގަނައިޒޭޝަން ޕލކ ލޓޑ

ނަތީޖާ: ސިވިލް ކޯޓުގެ ޙުކުމް ބާޠިލުކޮށް އަލުން ބެލުމަށް ފޮނުވި

ދަށު ކޯޓު: ސިވިލް ކޯޓު 1595/Cv-C/2017

ކޯޓުން ނިންމަން ޖެހުނު ސުވާލު

ރާއްޖެއިން ބޭރަށް ދަތުރުކުރާ ބޯޓެއްގައި ވަޒީފާ އަދާކުރި މުވައްޒަފަކީ ވަޒީފާއާބެހޭ ޤާނޫނުގެ 13 ވަނަ މާއްދާގެ ޙިމާޔަތް ނުލިބޭ ފަރާތެއްކަމަށް ބުނެ ސިވިލް ކޯޓުން ދަޢުވާ ނިންމުމަކީ ޞައްޙަ ނިންމުމެއްތޯ؛ އަދި 2 އަހަރަށްވުރެ ގިނަ ދުވަހު ވަކި މުއްދަތެއްގެ އެއްބަސްވުންތަކުގެ ދަށުން ވަޒީފާ އަދާކުރި މުވައްޒަފުގެ ވަޒީފާ ދާއިމީ ވަޒީފާއެއްގެ ގޮތުގައި ބަލަންޖެހޭތޯ ދަށުކޯޓުން ކަނޑައަޅަންޖެހޭތޯ.

ކަނޑައެޅި ޤާނޫނީ އުޞޫލުތައް

1. ޢާންމު އުޞޫލެއްގެ ގޮތުން ވަޒީފާއިން ވަކިކުރުމާމެދު ހިތްހަމަނުޖެހޭ ފަރާތުން މައްސަލަ ހުށަހަޅަންޖެހެނީ ވަޒީފާއާބެހޭ ޓްރައިބިއުނަލަށް ނަމަވެސް، ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގެ 2 ގެ ދަށުން ޓްރައިބިއުނަލުގެ އިޚްތިޞާޞް ނުހިނގާ ފަރާތްތަކުގެ (ރާއްޖެއިން ބޭރަށް ދަތުރުކުރާ ބޯޓުތަކުގައި ވަޒީފާ އަދާކުރާ ފަރާތްތައް) މައްސަލަ ބެލުމުގެ އިޚްތިޞާޞް ލިބިގެންވަނީ ޢާންމުކޮށް މަދަނީ މައްސަލަތައް ބަލާ ކޯޓަށެވެ؛ ދެބަސްވުންތައް ދިވެހިރާއްޖޭގެ ކޯޓުތަކުން ނިންމާނެކަމަށް ވަޒީފާގެ އެއްބަސްވުމުގައި ބަޔާންވުމުން ސިވިލް ކޯޓުގެ އިޚްތިޞާޞް އިތުރަށް ކަށަވަރުވެއެވެ. (ޕެރ. 12)
2. ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގެ 2 ގައިވާ ފަރާތްތައް އެ ޤާނޫނުގެ 4 ވަނަ ބާބުން އިސްތިސްނާކުރެވިފައިވީނަމަވެސް، އެފަރާތްތަކާއި ވަޒީފާދޭ ފަރާތާ ދެމެދުގެ އެއްބަސްވުމުން އުފެދޭ މައްސަލަތައް ބެލުމުގައި، ވަޒީފާގެ ތަބީޢަތުން އިސްތިސްނާކުރަންޖެހޭ ކަންކަން ފިޔަވައި، 4 ވަނަ ބާބުގައިވާ ވަޒީފާއާގުޅޭ ޙައްޤުތަކާއި އުޞޫލުތަކާއި ހަމަތައް ތަޠްބީޤުކުރުމަށް ހުރަހެއް އޮތްކަމަށް ނުދެކެއެވެ. (ޕެރ. 16)
3. ވަކި މުއްދަތެއްގެ އެއްބަސްވުންތަކުގެ ދަށުން 2 އަހަރަށްވުރެ ގިނަ ދުވަހު ވަޒީފާ އަދާކުރިކަމަށް ބުނެ ވަޒީފާއަކީ ދާއިމީ ވަޒީފާއެއްގެ ގޮތުގައި ބަލަންޖެހޭނެކަމަށް (ވަޒީފާއާބެހޭ ޤާނޫނުގެ 13 ވަނަ މާއްދާގެ (ޅ)) ދަޢުވާކުރާ ފަރާތުން ބުނާނަމަ، އެ ވަޒީފާއަކީ ދާއިމީ ވަޒީފާއެއްތޯއާއި ވަކިކުރީ ޤާނޫނާ އެއްގޮތަށްތޯ ދަށުކޯޓުން ކަނޑައަޅަންޖެހޭނެއެވެ؛ ބަދަލާމެދު ގޮތެއް ކަނޑައެޅެނީ އެ ނުކުތާއާމެދު ކަނޑައެޅޭ ގޮތުގެ މައްޗަށެވެ. (ޕެރ. 15)
4. ދިވެހިރާއްޖޭގެ ކޯޓުތަކުގެ ޤާނޫނުގެ 46 ވަނަ މާއްދާގެ ދަށުން، މައްސަލައިގައި ކަންހިނގާފައިވާ ގޮތް އަލުން ބަލަންޖެހޭ ގޮތަކަށް އޮތް މައްސަލައެއް އަލުން ބެލުމަށް ހައިކޯޓުން ދަށުކޯޓަށް ތަޙުވީލުކުރެވިދާނެއެވެ. (ޕެރ. 17)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 13 ވަނަ މާއްދާ (ހ)، (ށ)، (ޅ)، (ކ)
• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 28 ވަނަ މާއްދާގެ (ހ)
• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 34 ވަނަ މާއްދާގެ (ހ) ގެ 2
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 46 ވަނަ މާއްދާގެ (ހ) އަދި (ށ)
• ހައިކޯޓުގެ ނަންބަރު 2010/HC-A/62 (ލެޝަރ ހޮލިޑޭސް ޕވޓ ލޓޑ ވ. މުޙައްމަދު ޝަރީފް)
• އައި.އެލް.އޯ މެރިޓައިމް ލޭބަރ ކޮންވެންޝަން 2006 (2010/HC-A/62 ގައި ޙަވާލާދީފައިވާ)