ނިޒާރު އަޙްމަދު ވ. ފައިނަލްޓަޗް ޕްރައިވެޓް ލިމިޓެޑް

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ސިވިލް ކޯޓު 4379/Cv-C/2018

ކޯޓުން ނިންމަން ޖެހުނު ސުވާލު

ކުލަލުމުގެ މަސައްކަތު އެއްބަސްވުމުގެ މުއްދަތާ ގުޅޭ މާއްދާތައް (5.4–5.6) ސިވިލް ކޯޓުން މާނަކުރި ގޮތާއި، ވޮރަންޓީ އެއްބަސްވުމަށް ނުބެލުމާއި، ބެލެންސް އޮފް ޕްރޮބަބިލިޓީގެ މިންގަނޑު ތަޠުބީޤުކުރި ގޮތުގައި ކުށެއް ހުރިތޯ؛ މަސައްކަތް ނުނިމުނީ ކޮން ފަރާތެއްގެ ސަބަބުންތޯ.

ކަނޑައެޅި ޤާނޫނީ އުޞޫލުތައް

1. (ޕެރ. 12) ދެފަރާތުގެ މެދުގައި ޚިލާފު އުފެދިފައިވާ ކަންކަމާމެދު އިސްތިއުނާފީ ޝަރީޢަތުން ގޮތެއް ކަނޑައަޅަންޖެހޭނީ އިސްތިއުނާފުކުރާ ފަރާތުން ފާހަގަކޮށްފައިވާ އިސްތިއުނާފީ ނުކުތާތަކުގެ ތަރަހައިގެ ތެރެއިންނެވެ.
2. (ޕެރ. 12.4-12.7) އެއްބަސްވުމުގެ އަސާސީ މުއްދަތު ކަނޑައެޅެނީ އެ މުއްދަތު ބަޔާންކުރާ މާއްދާތައް (މާނަކުރުމުގެ މާއްދާ ހިމެނޭ ގޮތަށް) އެކުގައި ކިޔައިގެންނެވެ. މަސައްކަތް ނިމެންދެން އެއްބަސްވުން ދެމިއޮންނާނެ ކަމަށް ބުނާ މާއްދާތައް، މަސައްކަތްކުރުވާ ފަރާތުން ޤަބޫލުކުރާ މަޤްބޫލު ޢުޒުރެއް ބަޔާންކުރާ މާއްދާއާ ގުޅުވައި ކިޔާއިރު، އެއީ މަސައްކަތްކުރާ ފަރާތަށް ދިމާވާ މަޤްބޫލު ޢުޒުރަކާ ގުޅޭ މާއްދާތަކެއް ކަމަށް ބެލެވޭއިރު، މަސައްކަތް ކުރުވާ ފަރާތަށް ދިމާވާ ޢުޒުރެއްގެ ސަބަބުން މުއްދަތު ދިގުކުރުމުގެ މަޤްޞަދުގައި ހިމަނާފައިވާ މާއްދާތަކެއް ކަމަށް ނުބެލެވޭނެއެވެ.
3. (ޕެރ. 12.9-12.10) މަސައްކަތަށް ބޭނުންވާ ތަކެތި ފޯރުކޮށްދިނުމަކީ އެއްބަސްވުމުގެ ދަށުން މަސައްކަތްކުރުވާ ފަރާތުގެ ޒިންމާއަކަށް ވާއިރު، އެ ތަކެތި ފޯރުކޮށް ނުދިނުމުގެ ސަބަބުން މަސައްކަތް ލަސްވެއްޖެނަމަ އެއީ މަސައްކަތްކުރުވާ ފަރާތުގެ ސަބަބުން ވާ ލަސްވުމެކެވެ. އެއްބަސްވުމުގައި މަސައްކަތް ނިންމަން ވަކި ތާރީޚެއް ބަޔާންކޮށް، އެ ތަކެތި ފޯރުކޮށް ނުދެވިގެން މުއްދަތު ދެމިގެންދާނެ ކަމަށް ބަޔާންކޮށްފައި ނުވާނަމަ، ތަކެތި ގެންނަން ވަކި މުއްދަތެއް ބަޔާންކޮށްފައި ނެތުމުން މުއްދަތު ދިގުނުވާނެއެވެ.
4. (ޕެރ. 12.13-12.16) ދަޢުވާގައި އެއްބަސްވުމެއް ޛިކުރުކުރެވިފައި ވީނަމަވެސް، ހޯދަން އެދޭ ގެއްލުމުގެ ބަދަލު ހިސާބުކޮށްފައިވަނީ އަނެއް އެއްބަސްވުމުގެ މައްޗަށް ކަމަށްވެ، އެ އެއްބަސްވުމާ ޚިލާފުވުމުން ގެއްލުމެއްގެ ގޮތުގައި އެއްވެސް މިންވަރެއް ހިމަނާފައި ނުވާނަމަ، ދަށުކޯޓުން އެ އެއްބަސްވުމަށް ރިޢާޔަތްކޮށް މައްސަލަ ނިންމަންޖެހޭ ޝަރުޢީ ޤާނޫނީ ސަބަބެއް ނެތެވެ.
5. (ޕެރ. 12.18) މަސައްކަތްކުރާ މިންވަރަކުން އެއްބަސްވުމާ އެއްގޮތަށް ދޫކުރެވޭ އެޑްވާންސް ފައިސާއަކީ ކުރެވިފައިވާ މަސައްކަތަށް ދޫކުރި ފައިސާއެއް ކަމަށް ބަލަންޖެހެއެވެ. މަސައްކަތްކުރާ ފަރާތުން އިލްތިޒާމެއް އަދާނުކުރާތީ މަސައްކަތް ނުނިމުނުކަން ނޭނގި، މަސައްކަތްކުރުވާ ފަރާތުން ފޯރުކޮށްދޭންޖެހޭ ތަކެތި ފޯރުކޮށް ނުދިންކަން އެނގޭނަމަ، ގެއްލުމުގެ ބަދަލު ނަގައިނުދިނުމަކީ ޝަރުޢީ ޤާނޫނީ އުޞޫލުތަކާ ޚިލާފު ނިންމުމެއް ނޫނެވެ.
6. (ޕެރ. 12.19) ބެލެންސް އޮފް ޕްރޮބަބިލިޓީ އަކީ މަދަނީ މައްސަލަތައް ސާބިތުކުރުމުގައި ޝަރީޢަތުން ބަލާ މިންގަނޑެވެ؛ އެއީ ހުށަހެޅިފައިވާ ހެކިތަކަށް ބަލައި ބޮޑަށް ބުރަވާ ކޮޅެއްގެ މައްޗަށް މައްސަލަ ނިންމުމުގެ އުޞޫލެވެ.