ސަމީރު އަޙްމަދު ވ. ސިވިލް ސަރވިސް ކޮމިޝަން

ނަތީޖާ: އިސްތިއުނާފު ބާޠިލް، ޓްރައިބިއުނަލްގެ ނިންމުން ޤާއިމް

ކީވޯޑުތައް: ވަޒީފާއާބެހޭ، ޓްރައިބިއުނަލްއިން ބެލެން ނެތް މައްސަލަ، ވަޒީފާއާބެހޭ ޓްރައިބިއުނަލްގެ ޤަވާއިދުގެ 8 ވަނަ މާއްދާ- މުއްދަތު ގުނުން، ކޮވިޑް-19 އާ ގުޅިގެން އިޢުލާން ކޮށްފައިވާ އާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ވަޒީފާއާބެހޭ، ޓްރައިބިއުނަލްގެ މަސައްކަތްތައް ކުރިއަށް ގެންދިއުމުގައި ޢަމަލުކުރާނެ ޚާއްޞަ އުސޫލު

ދަށު ކޯޓު: ވަޒީފާއާބެހޭ ޓްރައިބިއުނަލް 245/VTR/2020

ކޯޓުން ނިންމަން ޖެހުނު ސުވާލު

ވަޒީފާއާބެހޭ ޓްރައިބިއުނަލަށް މައްސަލަ ހުށަހެޅުމުގެ 6 މަހުގެ މުއްދަތު ގުނުމުގައި ކޮވިޑް-19 ގެ ޚާއްޞަ އުޞޫލުގެ 5 ވަނަ މާއްދާގެ (ހ) ގެ ދަށުން ކުއްލި ޙާލަތުގެ ދުވަސްތައް އުނިކުރަންޖެހޭތޯ؛ ލަސްވި ސަބަބު ބަޔާންކުރުމުގެ ފުރުޞަތު ދޭންޖެހޭތޯ؛ އަދި ފިޔަވަޅު ރަސްމީކޮށް ނާންގާތީ މުއްދަތު ހަމަނުވާކަމަށް ބެލެވޭތޯ.

ޚުލާޞާ

ވާޤިޢާ: ސްކޫލެއްގެ ޓީޗަރަކު ލީޑިންގ ޓީޗަރުގެ މަސްއޫލިއްޔަތުން 2020 ފެބްރުއަރީގައި އަނގަބަހުން ދުރުކުރުމުން، ނޮވެމްބަރު 2020 ގައި ސިވިލް ސަރވިސް ކޮމިޝަނަށް ރައްދުކޮށް ވަޒީފާއާބެހޭ ޓްރައިބިއުނަލަށް މައްސަލަ ހުށަހެޅިއެވެ.

ދަށު ކޯޓުގެ ނިންމުން: ޓްރައިބިއުނަލުން ނިންމީ ޚިލާފު އުފެދުނު ތާރީޚުން 6 މަސް ފާއިތުވުމަށްފަހު ހުށަހެޅި މައްސަލައެއްކަމުން، ގަވާއިދުގެ 8 (ހ) ގެ ދަށުން ޓްރައިބިއުނަލުން ބެލެން ނެތް މައްސަލައެއްކަމަށެވެ.

ޚަޞްމުންގެ ހުށަހެޅުންތައް: އިސްތިއުނާފުކުރި ފަރާތުން ބުނީ ކޮވިޑް ކުއްލި ޙާލަތުގެ މުއްދަތު އުނިކުރަންޖެހޭކަމަށާއި، ލަސްވި ސަބަބު ބުނުމުގެ ފުރުޞަތު ނުދިންކަމަށާއި، ފިޔަވަޅު ރަސްމީކޮށް ނާންގާތީ މުއްދަތު ހަމަނުވާކަމަށެވެ. ސިވިލް ސަރވިސް ކޮމިޝަނުން ބުނީ 5 (ހ) ތަޠުބީޤުވަނީ އެ މުއްދަތުގައި ހަމަވާ މައްސަލަތަކަށްކަމަށާއި، ލަސްވި ސަބަބު ބަޔާންކޮށްފައި ނުވާކަމަށެވެ.

ކޯޓުގެ ސަބަބުތައް: މުއްދަތު ހަމަވީ 2020 އޮގަސްޓުގައި ކަމުން 5 (ހ) ތަޠުބީޤު ނުވާކަމަށާއި، ފޯމުގައި ލަސްވި ސަބަބު ބަޔާން ނުކުރާތީ 8 (ނ) ގެ އިޚްތިޔާރު ބޭނުންކުރަން ނުޖެހޭކަމަށާއި، ރަސްމީ އެންގުމާ ބެހޭ ބަހުސަކީ ޙުޞޫމާތު ނަފީކުރާ ބަހުސެއްކަމަށް ކޯޓުން ނިންމި.

ކަނޑައެޅި ޤާނޫނީ އުޞޫލުތައް

1. ކޮވިޑް-19 ގެ ޚާއްޞަ އުޞޫލުގެ 5 ވަނަ މާއްދާގެ (ހ) ގެ ދަށުން 30 ދުވަހުގެ އިތުރު މުއްދަތެއް ލިބެނީ، 19 މާރިޗު 2020 އާއި 5 ޖުލައި 2020 ގެ ދެމެދު ވަޒީފާއާބެހޭ ޓްރައިބިއުނަލްގެ ގަވާއިދުގެ 8 ވަނަ މާއްދާގެ މުއްދަތު ހަމަވާ މައްސަލަތަކަށް އެކަނިއެވެ؛ އެ އުޞޫލަކީ ކުއްލި ޙާލަތުގައި ކޮންމެހެން އަޅަންޖެހުނު ޟަރޫރީ ކަންކަން ބަޔާންކުރާ އުޞޫލަކަށްވުމާއެކު، މުއްދަތު ހިނގާ ތާރީޚު ސަރީޚަކޮށް ކަނޑައެޅިފައިވާއިރު، އެއަށްފަހު މުއްދަތު ހަމަވާ މައްސަލަތަކުގައި ކުއްލި ޙާލަތުގެ ދުވަސްތައް އުނިކުރާ ގޮތަށް އެނޫން ގޮތަކަށް މާނަކުރަންޖެހޭ ސަބަބެއް ނެތެވެ.
2. ވަޒީފާއާބެހޭ ޓްރައިބިއުނަލްގެ ގަވާއިދުގެ 8 ވަނަ މާއްދާގެ (ނ) ގެ ދަށުން 6 މަސް ފަހުން ހުށަހަޅާ މައްސަލައެއް ބަލައިގަތުމުގެ އިޚްތިޔާރު ޓްރައިބިއުނަލަށް ލިބެނީ، މުއްދަތުގައި ހުށަނާޅާ ސަބަބު ބަޔާންކޮށް ހުށަހެޅުމުން އެއީ މަޤްބޫލު ސަބަބެއްކަމަށް ޓްރައިބިއުނަލަށް ފެނުމުންނެވެ.
3. މައްސަލަ ބަލައިގަތުމުގެ ބެލުންތައް (އިޚްތިޞާޞް، މުއްދަތު، ޚަޞްމުން) ބިނާވަނީ މައްސަލަ ހުށަހަޅާ ފޯމުގެ މަޢުލޫމާތަށެވެ؛ ފޯމުގައި ލަސްވި ސަބަބު ބަޔާންކޮށްފައި ނުވާނަމަ، ހުށަހަޅާ ފަރާތުގެ ޒިންމާ އަދާނުކުރުމުން، ލަސްވި ސަބަބެއް އޮތްތޯ ޓްރައިބިއުނަލުން އަމިއްލަ އިސްނަގައި ބަލަންޖެހޭކަމަށް ނުދެކެމެވެ.
4. ޚިލާފު އުފެދުނީ މަސްއޫލިއްޔަތުން ދުރުކުރެވުނު ކަމާމެދުކަމަށް ބުނަމުން، އެ ފިޔަވަޅު ރަސްމީކޮށް ނާންގާތީ ޚިލާފު އުފެދުނު ފަހުން 6 މަސް ނުވާކަމަށް ބުނުމަކީ ޙުޞޫމާތު އުފައްދާ ވާޤިޢާ އަމިއްލައަށް ނަފީކުރާ ބަހުސެއް ކަމުން، އެއީ ގޮތެއް ކަނޑައަޅަންޖެހޭ ޤާނޫނީ ބަހުސެއް ނޫނެވެ.

ބަލާފައިވާ ޤާނޫނުތައް

• ގަވާއިދު ނަންބަރު R-20/2015 (ވަޒީފާއާބެހޭ ޓްރައިބިއުނަލްގެ ގަވާއިދު 2015) ގެ 8 ވަނަ މާއްދާގެ (ހ) އާއި (ނ)
• ކޮވިޑް-19 އާ ގުޅިގެން އިޢުލާން ކޮށްފައިވާ އާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ވަޒީފާއާބެހޭ ޓްރައިބިއުނަލްގެ މަސައްކަތްތައް ކުރިއަށް ގެންދިއުމުގައި ޢަމަލުކުރާނެ ޚާއްޞަ އުޞޫލުގެ 5 ވަނަ މާއްދާގެ (ހ)
• ޤާނޫނު ނަންބަރު 20/2020 (ޢާންމު ޞިއްޙަތުގެ ކުއްލި ނުރައްކަލުގެ ޤާނޫނު 2020) ގެ 3 ވަނަ މާއްދާ އަދި 23 ވަނަ މާއްދާގެ (ނ)
• ޤާނޫނު ނަންބަރު 2021/32 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާ