ޕްލެޓިނަމް ކެޕިޓަލް ހޯލްޑިންގްސް ޕވޓ ލޓޑ ވ. މަޝޭ އިންވެސްޓްމެންޓް ލިމިޓެޑް

ނަތީޖާ: އިސްތިއުނާފު ބާޠިލް، ސިވިލް ކޯޓުގެ އަމުރު ޤާއިމް

ދަށު ކޯޓު: ސިވިލް ކޯޓު 144-B5-CR2/CA/2021/945

ކޯޓުން ނިންމަން ޖެހުނު ސުވާލު

ތަންފީޛީ ޤަޟިއްޔާއެއްގެ ތެރެއިން، ޙުކުމުން ސާބިތުވި ދަރަނީގެ ޢަދަދު ދަރަނިވެރިޔާގެ ބޭންކް އެކައުންޓުން ކޯޓަށް ޖަމާކުރުމަށް ބޭންކަށް ސިވިލް ކޯޓުން ކުރި އަމުރަކީ، ހައިކޯޓުގެ 2014/HC-A/119 ގައި ކަނޑައެޅި އުޞޫލާ ޚިލާފަށް ނެރެފައިވާ އަމުރެއްތޯ.

ކަނޑައެޅި ޤާނޫނީ އުޞޫލުތައް

1. ޙުކުމް ތަންފީޛުކުރުމުގެ މައްސަލައެއްގެ ތެރެއިން، އަމުރު ނެރުމުގެ މަޤްޞަދު ގެއްލިނުދާނެ ގޮތަށް، އެކައުންޓު ނިސްބަތްވާ ފަރާތުގެ ބަހެއް ނުހޯދައި އެކައުންޓް ފްރީޒްކުރުން ފަދަ އަމުރުތައް ނެރުމުގެ ބާރު ކޯޓަށް ލިބިގެންވެއެވެ. (ޕެރ. 11، 13)
2. ޙުކުމުން ސާބިތުވި ދަރަނީގެ ޢަދަދު އެކައުންޓުގައިވާ ފައިސާއިން ކޯޓަށް ޖަމާކުރުމަށް ބޭންކަށް އަންގާ އަމުރަކީ އެކައުންޓް ފްރީޒްކުރުމުގެ އަމުރެއް ނޫނެވެ. (ޕެރ. 12)
3. ތަންފީޛީ އަމުރެއްގައި އަމުރު ނެރެންޖެހުނު ސަބަބު ތަފްޞީލުކޮށް ބަޔާންކޮށްފައި ނެތަސް، އެ އަމުރު ނެރެފައިވަނީ ޙުކުމާ އެއްގޮތަށް ނުދައްކާ ހުރި ސާބިތު ދަރަނި ކޯޓަށް ޖަމާކުރުމަށްކަން އެނގެން އޮވެ، ޖަމާކުރަން އެންގި ޢަދަދަކީ ދަރަނީގެ ޢަދަދު ކަމަށްވެ، ފައިސާ ޖަމާކުރުމަށްފަހު އެކައުންޓުތައް ދޫކޮށްލާފައިވާނަމަ، ދެފަރާތުގެ ޙައްޤުތަކަށް ފަނޑިޔާރު ބަލާފައިވާ ކަމަށް ބެލެވެއެވެ. (ޕެރ. 13)
4. ތަންފީޛީ އަމުރެއް ނެރުމުގައި ދަރަނިވެރިޔާގެ ޙައްޤުތަކަށް ބެލުމަކީ، ދަރަނިވެރިޔާ ދަރަނި އަދާނުކޮށް އަމިއްލަ މަޞްލަޙަތު ނުވަތަ ވިޔަފާރީގެ މަޞްލަޙަތު ކުރިއެރުވުމަށް މަސައްކަތްކުރުމުގެ ފުރުޞަތު ދިނުމެއް ނޫނެވެ. (ޕެރ. 13)

ބަލާފައިވާ ޤާނޫނުތައް

• ހައިކޯޓުގެ ނަންބަރު 2014/HC-A/119 ޤަޟިއްޔާ