އިމާޖް ޕްރައިވެޓް ލިމިޓެޑް ވ. ރަނާ ޙަމީދު

ނަތީޖާ: ބައެއް ބަދަލުކުރި (ދައްކަންޖެހޭ ޢަދަދު 1,335,700ރ. އިން 1,076,349.98ރ. އަށް ބަދަލުކުރި)

ކީވޯޑުތައް: މަދަނީ، އެއްބަސްވުމާ މެދު ޚިލާފު އުފެދިގެން

ދަށު ކޯޓު: ސިވިލް ކޯޓު 2984/Cv-C/2019

ކޯޓުން ނިންމަން ޖެހުނު ސުވާލު

އެޕާޓްމަންޓެއް ކުއްޔަށް ދިނުމުގެ އެއްބަސްވުމުގެ މުއްދަތު ހަމަވުމުގެ ކުރިން ކުއްޔަށް ހިފި ފަރާތް ތަނުން ނިކުންނަން ޖެހުމުން ދޭންޖެހޭ ބަދަލު ގުނަންވީ 5 އަހަރުގެ މުއްދަތަށްތޯ ނުވަތަ ޑިރެކްޓަރަކު ސޮއިކުރި ލިޔުމަކުން އިތުރުކުރިކަމަށް ބުނާ 7 އަހަރުގެ މުއްދަތަށްތޯ، އަދި ބަދަލުގެ ޢަދަދު ކަނޑައަޅާނެ ގޮތް.

ކަނޑައެޅި ޤާނޫނީ އުޞޫލުތައް

1. ކުލީގެ އެއްބަސްވުމުގައި ކަނޑައަޅާފައިވާ ތާރީޚަށް ތަން ޙަވާލު ނުކުރެވިއްޖެނަމަ މުއްދަތު ގުނަންވާނީ ތަން ޙަވާލުކުރި ތާރީޚުން ފެށިގެން ކަމަށް އެއްބަސްވުމުގައި ބަޔާންކޮށްފައިވާނަމަ، އެ ޙާލަތުގައިވެސް ހަމަކުރަންޖެހެނީ އެއްބަސްވުމުގައިވާ ޖުމްލަ މުއްދަތު (5 އަހަރު) ކަމުން، މުއްދަތު ގުނަންވާނީ ޙަވާލުކުރި ތާރީޚުން ފެށިގެންނެވެ. (ޕެރ. 20، 21)
2. އެއްބަސްވުމުގެ މުއްދަތު އިތުރުކުރެވޭނީ އެއްބަސްވުމުގައި ބަޔާންކުރާ ގޮތުގެ މަތިން ކަމުން (މި މައްސަލާގައި މުއްދަތު ހަމަވުމަށްފަހު ދެފަރާތް އެއްބަސްވެގެން)، އެއްބަސްވުމުގައިވާ މުއްދަތަށްވުރެ ދިގު މުއްދަތަކަށް ކުލީގެ މުއްދަތު އިތުރުކުރިކަން ސާބިތުކުރުމުގެ ބުރަ އޮންނަނީ އެކަން ބުނާ ފަރާތުގެ މައްޗަށެވެ. (ޕެރ. 21)
3. މުއްދަތު ހަމަވުމުގެ ކުރިން ތަނުން ނިކުންނަންޖެހޭ ގޮތް ކުއްޔަށްދިން ފަރާތުން މެދުވެރިކޮށްފިނަމަ އެއްބަސްވުމުގެ ދަށުން ދޭންޖެހޭ ބަދަލު ގުނަންވާނީ އެއްބަސްވުމުގައިވާ މުއްދަތުގެ ތެރެއިން ބާކީ އޮތް މުއްދަތަށް، އެއްބަސްވުމުގައި ކަނޑައަޅާފައިވާ މަހަކަށް ޖެހޭ ރޭޓުންނެވެ. (ޕެރ. 22، 23)
4. ކުލީގެ ގޮތުގައި ފައިސާ ބަލައިގަނެ ދީފައިވާ ޕޭމަންޓް ވައުޗަރަކުން އެކަނި، އެއްބަސްވުމުގެ މުއްދަތު އިތުރުކުރިކަން ސާބިތެއް ނުވެއެވެ. (ޕެރ. 24، 25)
5. ކުންފުނީގެ ބޯޑު ރިޒޮލިއުޝަނަކުން އެއްބަސްވުމުގައި ސޮއިކުރާނެ ފަރާތެއް ކަނޑައަޅާފައިވާނަމަ، އެ އެއްބަސްވުމަށް ބަދަލެއް ގެންނަން ވާނީ ސޮއިކުރުމުގެ ބާރު ދީފައިވާ ފަރާތުންނެވެ؛ އެ ބާރު ނެތް ޑިރެކްޓަރަކު ސޮއިކުރި ލިޔުމަކުން އެއްބަސްވުމުގެ މުއްދަތު އިތުރެއް ނުވާނެއެވެ. އަދި އެކަން އެއްބަސްވުމުގެ އަނެއް ފަރާތަށް އެނގިފައިވާނެ ކަމެއްކަމަށް ބަލަންޖެހެއެވެ. (ޕެރ. 26)
6. އިތުރު މުއްދަތެއްގެ ކުލީގެ ގޮތުގައި ކުންފުނިން ނަގާފައިވާ ފައިސާ، އެ މުއްދަތު އިތުރުކުރިކަން ސާބިތުނުވާނަމަ، ބަދަލާއެކު އަނބުރާ ދައްކަންޖެހޭނެއެވެ. (ޕެރ. 27)

ބަލާފައިވާ ޤާނޫނުތައް

• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 262 ވަނަ މާއްދާ (ފައިސާ ދައްކަންޖެހޭ ތާވަލް)