އަންޑްރެއި ޕޮލްޓޮރަކިސް ވ. އަޙްމަދު އާޔަތުﷲ

ނަތީޖާ: ދަށުކޯޓުގެ ނިންމުންތައް ބާޠިލުކޮށް އަލުން ބެލުމަށް ފޮނުވި

ދަށު ކޯޓު: ބ. ފުޅަދޫ މެޖިސްޓްރޭޓް ކޯޓު 12/F14C/2019

ކޯޓުން ނިންމަން ޖެހުނު ސުވާލު

ދަށުކޯޓުން ޚަޞްމުންނަށް ދޫކުރި 'ޝަރީޢަތް ނިމުނުގޮތުގެ ޚުލާޞާ ރިޕޯޓު' ގެ ޙުކުމާއި 'ޝަރީޢަތް ނިމުނުގޮތުގެ ރިޕޯޓު' ގެ ޙުކުމް (ގެއްލުމުގެ ބަދަލާ ބެހޭ ބައި) ތަފާތުވާއިރު، އެ ކުށަކީ އިސްލާޙުކުރެވޭ އަތުކުށެއްތޯ، ނޫނީ ދަށުކޯޓުގެ ނިންމުން ބާޠިލުކޮށް އަލުން ބެލުމަށް ފޮނުވަންޖެހޭ ކުށެއްތޯ.

ކަނޑައެޅި ޤާނޫނީ އުޞޫލުތައް

1. މައްސަލައިގެ ޙުކުމްކުރުމަށް ފަހު ތައްޔާރުކުރާ ޝަރީޢަތް ނިމުނުގޮތުގެ ރިޕޯޓަކީ ޙުކުމް އިއްވާ ދުވަހު ފަނޑިޔާރު ސޮއިކޮށް ޚަޞްމުންނާ ޙަވާލުކުރާ ޖަޖްމެންޓް ހިމަނައިގެން ތައްޔާރުކުރަންޖެހޭ ރިޕޯޓެކެވެ. (ޕެރ. 22)
2. ސުޕްރީމް ކޯޓުގެ 02/2021-SCPD ޕްރެކްޓިސް ޑައިރެކްޝަނާ އެއްގޮތަށް، ޙުކުމްކުރި ދުވަހު ދޫކުރި ޖަޖްމެންޓަށް ގެނެވޭނީ އަތުކުށް، ހިސާބު ހެދުމުގެ ކުށް، ޢަދަދެއް، ތާރީޚެއް ނުވަތަ މީހެއްގެ ކާކުކަން އަންގައިދޭ މަޢުލޫމާތުގައިވާ ކުށް ނުވަތަ އޮޅިގެން ވެއްޓިފައިވާ އަކުރެއް ނުވަތަ ބަހެއް އިޞްލާޙުކުރުން ފިޔަވައި އެހެން ބަދަލެއް ނުގެނެވޭނެއެވެ. (ޕެރ. 23)
3. ޚުލާޞާ ރިޕޯޓުގެ ޙުކުމާއި ފުރިހަމަ ރިޕޯޓުގެ ޙުކުމުގެ ދެމެދު ގެއްލުމުގެ ބަދަލު ނަގައިދިނުމާ ބެހޭ ގޮތުން ހުރި ތަފާތަކީ ލިޔުމުގެ ކުށަކުން ނުވަތަ ކޯޓުގެ އިދާރީ އޮޅުމަކުން ވެފައިވާ ކުށެއް ނޫން ކަމާއި، މައްސަލައިގެ މައުޟޫޢަށް ސީދާ އަސަރުފޯރާ ފުށުއެރުމެކެވެ. (ޕެރ. 24)
4. އިސްތިއުނާފީ ކޯޓުގެ ދައުރަކީ ދަށުކޯޓުން މައްސަލަ ނިންމާފައިވަނީ ޤާނޫނާ ޚިލާފަށްތޯ ކަނޑައެޅުން ކަމުން، ދަށުކޯޓުގެ ދެ ތަފާތު ޙުކުމުގެ ތެރެއިން ޞައްޙަ ޙުކުމަކީ ކޮބައިކަން ކަނޑަނޭޅި ދަށުކޯޓުގެ ނިންމުމާ މެދު ގޮތެއް ކަނޑައެޅޭކަށް ނެތް ކަމާއި، އެ ކުށް އިސްތިއުނާފީ މަރުޙަލާގައި އިޞްލާޙުކޮށްގެން ޢަދުލުވެރި ފައިޞަލާއެއް ނުކުރެވޭނެއެވެ. (ޕެރ. 25)
5. ދަށުކޯޓުގެ ނިންމުމުގައިވާ ކުށަކީ އިސްލާޙުކުރެވޭ ފަދަ ކުށެއް ނޫންނަމަ، އެންމެ ޢަދުލުވެރި ގޮތަކީ ދަށުކޯޓުގެ ނިންމުންތައް ބާޠިލުކޮށް، ހުށަހެޅުނު ދަޢުވާއާއި ހެކިތަކާއި ބަޔާންތަކަށް ރިޢާޔަތްކޮށް ފައިޞަލާކުރަނިވި ޙުކުމެއް ކުރުމަށް މައްސަލަ ދަށުކޯޓަށް ތަޙުވީލުކުރުމެވެ. (ޕެރ. 26)

ބަލާފައިވާ ޤާނޫނުތައް

• ސުޕްރީމް ކޯޓުގެ ނަންބަރު 02/2021-SCPD ޕްރެކްޓިސް ޑައިރެކްޝަން