ވިލިނގިލި އެޑްވާންސް ސިސްޓަމް އޮފް ހޯމް އިމްޕްރޫވްމަންޓް (ޕ) ލޓޑ ވ. މޫސާ ޢަލީ

ނަތީޖާ: ދަށުކޯޓުގެ ޙުކުމް ބާޠިލު

ދަށު ކޯޓު: އއ. މަތިވެރި މެޖިސްޓްރޭޓް ކޯޓު 63/U-5-C/2017

ކޯޓުން ނިންމަން ޖެހުނު ސުވާލު

ގެސްޓްހައުސް ކުއްޔަށް ހިފި ފަރާތުން އެއްބަސްވުމުގައިވާ 2 މަސްދުވަހުގެ ނޯޓިސް ދީފައިވާކަމަށް ބެލެވޭތޯ، އަދި ކުއްޔަށްދޭ ފަރާތް ތަޅުދަނޑިއާ ހަވާލުވި ފަހުގެ މުއްދަތު ހިމެނޭ ކަރަންޓު ބިލުގެ މުޅި ޢަދަދަށް ކުއްޔަށް ހިފި ފަރާތް ޒިންމާވޭތޯ.

ކަނޑައެޅި ޤާނޫނީ އުޞޫލުތައް

1. ކުއްޔަށް ހިފި ތަން ދޫކޮށްލުމަށް އެއްބަސްވުމުގައިވާ ގޮތަށް ލިޔުމުން ނޯޓިސް ހަވާލުކުރުމަށް ކުއްޔަށް ހިފި ފަރާތުން މަސައްކަތްކޮށް، ނޯޓިސްގެ ލިޔުން ހުށަހަޅާ، އެކަން ކުއްޔަށްދޭ ފަރާތަށް އެނގިފައިވާކަން ހެކިބަހުން އެނގޭނަމަ، ތަން ދޫކޮށްލިކަމަށް ފޮނުވި ސިޓީއަކީ ނޯޓިސް ދިނުމެއްނެތި ފޮނުވި ސިޓީއެއް ކަމަށް ނުބެލޭނެއެވެ.
2. ނޯޓިސް ދެވިފައިނުވާ ކަމަށް ބެލިޔަސް، ކުއްޔަށްދޭ ފަރާތް ތަނުގެ ތަޅުދަނޑިއާ ހަވާލުވުމުން ކުއްޔަށް ހިފި ފަރާތަށް ތަން ބޭނުންކުރުމުގެ ފުރުޞަތު ގެއްލިގެންދެއެވެ.
3. ތަން ހަވާލުކުރުމުގެ ކުރީގެ މުއްދަތަށް އަރާފައިވާ ޢަދަދު ވަކިން ނޭނގޭ، ހަވާލުކުރުމަށް ފަހުގެ މުއްދަތު ހިމެނޭ ކަރަންޓު ބިލަކަށް ހަމައެކަނި ބަލައި، ކުއްޔަށް ހިފި ފަރާތް ބިލުގެ މުޅި ޢަދަދަށް ޒިންމާ ނުކުރުވޭނެއެވެ.
4. ތަން ހަވާލުކުރުމުގެ ކުރީގެ މުއްދަތުގައި ބޭނުންކުރި ކަރަންޓަށް ފައިސާ ނުދައްކާ ހުރިނަމަ، އެ ފައިސާ ހޯދުމަށް ވަކި ދަޢުވާއެއް ކުރުމުގެ ޙައްޤު ކުއްޔަށްދޭ ފަރާތަށް ލިބިގެންވެއެވެ.