ފައުޒިއްޔާ ޢަލީ ވ. ޝާރިދާ އިބްރާހީމް

ނަތީޖާ: އިސްތިއުނާފު ބެލުމުގެ އިޚްތިޞާޞް ހައިކޯޓަށް ނުލިބޭކަމަށް ކަނޑައަޅައި ނިންމި

ދަށު ކޯޓު: ހދ. މަކުނުދޫ މެޖިސްޓްރޭޓް ކޯޓު B17C-A/2021/01

ކޯޓުން ނިންމަން ޖެހުނު ސުވާލު

މެޖިސްޓްރޭޓް ކޯޓެއްގެ ޗީފް އެޑްމިނިސްޓްރޭޓަރ، ދަޢުވާ ފޯމެއް ބަލައިނުގަތުމަށް އިދާރީގޮތުން ދިން ޖަވާބަކީ ހައިކޯޓަށް އިސްތިއުނާފުކުރެވޭނެ ނިންމުމެއްތޯ.

ކަނޑައެޅި ޤާނޫނީ އުޞޫލުތައް

1. ކޯޓުތަކުގެ ޤާނޫނުގެ 36 ވަނަ މާއްދާއިން ހައިކޯޓަށް ލިބިދޭ އިސްތިއުނާފީ އިޚްތިޞާޞް ހިމެނެނީ ދަށު ކޯޓުތަކުން ނިންމާ މައްސަލަތައް ކަމަށާއި، 38 ވަނަ މާއްދާއާއި 43 ވަނަ މާއްދާއަށް ބަލާއިރު އެއީ ދަށު ކޯޓުތަކުގެ ފަނޑިޔާރަކު ކުރާ ޙުކުމްތަކާއި، ނިންމާ ނިންމުންތަކާއި، ނެރޭ އަމުރުތަކާއި، ކޯޓަށް ހުށަހަޅާފައިވާ މައްސަލައަކާމެދު ފަނޑިޔާރަކު ކަނޑައަޅާ ކަނޑައެޅުންތަކެވެ. (ޕެރ. 13-16)
2. ކޯޓެއްގެ ޗީފް އެޑްމިނިސްޓްރޭޓަރ (އިދާރީ މުވައްޒަފަކު) ދަޢުވާ ފޯމެއް ބަލައިނުގަތުމަށް ދީފައިވާ ޖަވާބާމެދު ފަނޑިޔާރަކު ގޮތެއް ނިންމާފައި ނުވާނަމަ، އެ ޖަވާބަކީ ހައިކޯޓަށް އިސްތިއުނާފުކުރެވޭނެ މައްސަލައެއް ނޫނެވެ؛ އެފަދަ ޖަވާބެއް ހައިކޯޓުން އިސްތިއުނާފީ ނަޒަރަކުން ވަޒަންކުރުމަކީ ޤާނޫނު ދަންނަ ކަމެއްވެސް ހަމަޖެހޭ ގޮތެއްވެސް ނޫނެވެ. (ޕެރ. 17-18)
3. އެފަދަ ޖަވާބަކާމެދު ހިތްހަމަނުޖެހޭނަމަ ހުށަހަޅަންވާނީ އެ ކޯޓުގެ ފަނޑިޔާރަށެވެ؛ އިސްތިއުނާފުކުރެވޭނީ ފަނޑިޔާރުގެ ނިންމުމެވެ. (ޕެރ. 19)
4. އިސްތިއުނާފުކޮށްފައިވާ ޖަވާބު ދިން ދުވަސްވަރު ޢަމަލުކުރަމުން ދިޔަ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުގެ ސަރކިއުލަރ ނަންބަރު 2021/16 ގެ ދަށުން، މެޖިސްޓްރޭޓް ކޯޓެއްގެ ޗީފް އެޑްމިނިސްޓްރޭޓަރ ނިންމާ ގޮތަކާމެދު ހިތްހަމަނުޖެހޭނަމަ އެ ނިންމުން މުރާޖަޢާކުރުމަށް ކޯޓުގެ މެޖިސްޓްރޭޓަށް ހުށަހެޅިދާނެއެވެ. (ފުޓްނޯޓް)

ބަލާފައިވާ ޤާނޫނުތައް

• ޤާނޫނު ނަންބަރު 22/2010 (ކޯޓުތަކުގެ ޤާނޫނު) ގެ 36 ވަނަ މާއްދާ
• ޤާނޫނު ނަންބަރު 22/2010 (ކޯޓުތަކުގެ ޤާނޫނު) ގެ 38 ވަނަ މާއްދާ
• ޤާނޫނު ނަންބަރު 22/2010 (ކޯޓުތަކުގެ ޤާނޫނު) ގެ 43 ވަނަ މާއްދާ
• ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ "މެޖިސްޓްރޭޓް ކޯޓުތަކަށް މައްސަލަ ބަލައިގަތުމުގައި ޢަމަލުކުރާނެ އިޖުރާއަތު ބަޔާންކުރާ އުޞޫލު" (ސަރކިއުލަރ ނަންބަރު 2021/16، 31 އޮގަސްޓް 2021)