ދ. މީދޫ ކައުންސިލް އިދާރާ ވ. އަޙްމަދު ޢަލީ

ނަތީޖާ: އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ދަށު ކޯޓު: ވަޒީފާއާބެހޭ ޓްރައިބިއުނަލް 159/VTR/2021

ކޯޓުން ނިންމަން ޖެހުނު ސުވާލު

ކައުންސިލުން ހިންގާ ތެޔޮ ވިއްކާ ފިހާރައަކަށް ކައުންސިލުން ވަޒީފާ ދިން މީހަކީ ކައުންސިލުގެ މުވައްޒަފެއްތޯ، އަދި މުސާރަ ނުދީ ހިފެހެއްޓުމުން ޓްރައިބިއުނަލުން މުސާރަ ނަގައިދިނުމަށް ކުރި އަމުރު ރަނގަޅުތޯ؛ ހެކިވެރިޔާއާ ސުވާލުކުރުމުގެ ފުރުޞަތު ހަނިކުރިތޯ އަދި ހެކިބަހަށް ރިޢާޔަތްކުރިތޯ.

ކަނޑައެޅި ޤާނޫނީ އުޞޫލުތައް

1. ވަޒީފާ ދޭ ފަރާތުގެ އަމިއްލަ ލިޔުންތަކުން (ވަޒީފާގެ ބަޔާނާއި ފޮނުވި ސިޓީ) މީހަކު ވަޒީފާއަށް ނަގައި މަސައްކަތް ކުރިކަން ފެންނަން އޮތްއިރު، އެ ފަރާތް މުވައްޒަފެއްކަމުގެ އެއްވެސް ރެކޯޑެއް ނެތްކަމަށް ބުނެ މައްސަލައިގެ އަސްލަށް އިންކާރުކުރުމަކީ ފެންނަން ހުރި ޙަޤީޤަތާ އެއްގޮތް ވާހަކައެއް ނޫނެވެ. (ޕެރ. 13-17)
2. ކައުންސިލެއްގެ ބެލުމުގެ ދަށުން ހިންގާ ވިޔަފާރިއެއްގައި މަސައްކަތްކުރަން ކައުންސިލުން ޙަވާލުކުރާ މީހުންނަކީ ކޮންމެހެން ކައުންސިލް އިދާރާގެ މުވައްޒަފުން ނޫނެވެ؛ ނަމަވެސް އެ މަސައްކަތް "ވަޒީފާއެއް" ގެ ގޮތުގައި ޙަވާލުކޮށްފިނަމަ، އެމީހަކީ އެ ވިޔަފާރީގައި ވަޒީފާ އަދާކުރާ މީހެއް ނޫންކަމަށް ކަނޑައެއް ނޭޅޭނެއެވެ؛ ވަޒީފާ ދިނީ އެ ވިޔަފާރި ޤާނޫނީ ގޮތުން ބަލަހައްޓާ ކައުންސިލުން ކަމަށްވާނަމަ، އޭގެ ޤާނޫނީ ނަތީޖާތަކާ ކުރިމަތިލާންޖެހޭނީ ކައުންސިލުންނެވެ. (ޕެރ. 19-22)
3. އެއް ފަރާތުން ހުށަހަޅާ ހެކިވެރިޔާއާ އަނެއް ފަރާތުން ކުރާ ސުވާލުތަކަކީ މައުޟޫޢުން ބޭރުން ކުރާ ސުވާލުތަކެއްނަމަ ހެކި ހުށަހެޅި ފަރާތަށް އިޢުތިރާޟް ކުރެވޭނެއެވެ؛ އެ އިޢުތިރާޟް ބަލައިގަތުމާއި ނުގަތުމަކީ މައްސަލަ ބަލާ ފަރާތުގެ އިޚްތިޔާރެއް ކަމަށްވާއިރު، އެ އިޚްތިޔާރު ބޭނުންކުރާނީ ހެކި ހުށަހެޅުނު ބޭނުމާއި ހެކިބަސް ޠަޢުނުކުރުމާ ގުޅުން ހުރި ގޮތަށް ބަލައިގެންނެވެ. (ޕެރ. 26-27)
4. ލިޔުމުން ފެންނަން ހުރި ހެކިތައް (އިޢުލާނު، އިންޓަވިއު ރެކޯޑު، ސޮއިކުރި ވަޒީފާގެ ބަޔާން) ނަފީ ކުރެވޭނެ ބުރަދަނެއް، މީހަކީ މުވައްޒަފެއްކަން އެނގޭނެ ރެކޯޑެއް ނެތްކަމަށް ބުނާ ޝަފަހީ ހެކިބަހަކަށް ނެތެވެ. (ޕެރ. 29-30)
5. ކައުންސިލެއްގެ ޒިންމާގެ ދަށުން ބަލަހައްޓަންޖެހޭ ލިޔެކިޔުމާއި ޙާޟިރީގެ އިންތިޒާމު ބެލެހެއްޓުމަކީ ވަޒީފާ ދޭ ކައުންސިލުގެ ޒިންމާއެވެ، އެއީ ވަޒީފާއަށް ހޮވޭ ފަރާތުގެ ޒިންމާއެއް ނޫނެވެ؛ އެ ޒިންމާ އަދާނުކުރުމުގެ ނަތީޖާ އުފުލަންޖެހޭނީ ކައުންސިލުންނެވެ. (ޕެރ. 32، 37)
6. ކުރީގެ ކައުންސިލުން ކޮރަޕްޝަނަށް މަގުފަހިވާ ގޮތަށް ކަމެއް ކޮށްފައިވާނަމަ ޤާނޫނީ އިޖުރާއަތުގެ ތެރެއިން ޒިންމާ ކުރުވަންވީ ނަމަވެސް، މުވައްޒަފަކު މުސާރައާއި ޢިނާޔަތްތަކަށް ދަޢުވާ ކުރުމުން، ކުރީގެ ކައުންސިލުން ވަޒީފާ ދިނީ ނާޖާއިޒު ފައިދާ ހޯދައިދިނުމަށްކަމަށް ބުނުމަކުން އެ ދިފާޢު ފުރިހަމަ ނުވެއެވެ. (ޕެރ. 33)
7. ވަޒީފާގެ ގުޅުން ލިޔުންތަކުން ސާފުކޮށް ސާބިތުވާ ޙާލަތުގައި، ވަޒީފާގެ އެއްބަސްވުމެއް ނެތް ޙާލަތަށް 2012/HC-A/271 ޤަޟިއްޔާގައި ބަޔާންކުރާ މިންގަނޑު ތަޠުބީޤުކޮށް ވަޒީފާގެ ގުޅުން ވުޖޫދުވޭތޯ ބަލަންޖެހޭ ތަނެއް ނެތެވެ. (ޕެރ. 36)

ބަލާފައިވާ ޤާނޫނުތައް

• ޤާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގެ 136 ވަނަ މާއްދާ
• ޤާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގެ 70 ވަނަ މާއްދާ، 76 ވަނަ މާއްދާ އަދި 22 ވަނަ މާއްދާގެ (ދ)
• ޤާނޫނު ނަންބަރު 2021/32 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާ (އިސްތިއުނާފުގެ އިޖުރާއަތު)
• ހައިކޯޓުގެ 2012/HC-A/271 (ތަފާތުކުރި)