ޙަސަން މުޣުނީ

ނަތީޖާ: އިސްތިއުނާފު ބާޠިލް، ސިވިލް ކޯޓުގެ އެންގުން ޤާއިމް

ދަށު ކޯޓު: ސިވިލް ކޯޓު 145-B5-CR-4/INDIV/2022/01

ކޯޓުން ނިންމަން ޖެހުނު ސުވާލު

ވަގުތީ އަމުރެއް ތަންފީޛުކުރުމަށް ހުށަހެޅި ތަންފީޛީ މައްސަލައެއްގައި، އެ އަމުރު ރައްދުނުވާ ތިންވަނަ ފަރާތެއް ތަދައްޚުލްކުރުވައި، އެ ފަރާތުގެ ކުލީގެ އެއްބަސްވުންތަކާއި ލިޔެކިޔުންތައް ހުށަހެޅުމަށް ސިވިލް ކޯޓުން އެންގުން ޝަރުޢީ އަދި ޤާނޫނީ އުޞޫލުތަކާ ޚިލާފުވޭތޯ.

ކަނޑައެޅި ޤާނޫނީ އުޞޫލުތައް

1. ތަންފީޛުކުރަން އެދޭ ވަގުތީ އަމުރު ރައްދުވާ ކުންފުންޏާއި ތިންވަނަ ފަރާތާ ދެމެދު އަމުރުގައި ބުނެވޭ މުދަލާ ގުޅޭ ތަޢާޤުދީ ގުޅުމެއް އުފެދިފައިވާއިރު، އަދި ވަގުތީ އަމުރު ހޯދި ފަރާތުގެ މަޞްލަޙަތު ބިނާވެފައިވަނީ އެ މުދަލުން ލިބޭ މާލީ މަންފާގެ މައްޗަށްކަމަށްވާއިރު، އެ ތިންވަނަ ފަރާތް ތަދައްޚުލްކުރުވައި ލިޔެކިޔުންތައް ހުށަހެޅުމަށް އެންގުމަށް ބަދަލު ގެންނަންޖެހޭ ސަބަބެއް ނެތެވެ. (ޕެރ. 11.4–11.5)
2. ޝަރީޢަތަށް ހުށަހެޅިފައިވާ މައްސަލައަކާ ގުޅިގެން މަޞްލަޙަތު އޮތް ކަމަށް ޤަބޫލުކުރެވޭ ފަރާތެއް ތަދައްޚުލްކުރުވުމަކީ ފަނޑިޔާރުގެ ތަޤްދީރީ ބާރުގެ ތެރެއިން ކުރެވިދާނެ ކަމެކެވެ. (ފަނޑިޔާރު ފާޠިމަތު ފަރްހީޒާގެ ރައުޔު، ޕެރ. 12)
3. ޢާންމު އުޞޫލުން ވަގުތީ އަމުރަކީ އެ އަމުރު ރައްދުވާ ފަރާތެއް ޢަމަލުކުރުން ލާޒިމުވާ in personam އަމުރުތަކެއް ކަމުން، އެފަދަ އަމުރަކާ ޚިލާފުވުމުން އެޅޭ ފިޔަވަޅެއް އަޅަންވާނީ އަމުރު ރައްދުވާ ފަރާތަކަށެވެ. (ފަނޑިޔާރު ފާޠިމަތު ފަރްހީޒާގެ ރައުޔު، ޕެރ. 12)
4. ކޯޓުގައި ހިނގަމުންދާ ތަންފީޛީ މައްސަލައެއްގައި އެ މައްސަލައާ ގުޅުންހުރި މުދަލާއި ފައިސާ ފަދަ ތަކެތި ޙިމާޔަތްކުރުމުގެ ގޮތުން ތިންވަނަ ފަރާތެއްގެ ބަސް ހޯދުން ނުވަތަ އެ ފަރާތުގެ ކިބައިން މަޢުލޫމާތު ހޯދުމަށް އެންގުމަކީ ޢާންމު އުޞޫލުން ޝަރީޢަތުން ޢަމަލުކުރަމުންދާ ގޮތެވެ؛ އެފަދަ ފަރާތަށް ވާހަކަދެއްކުމުގެ ފުރުޞަތު ލިބިގެންވާނަމަ އެ އެންގުމަށް ބަދަލު ގެންނަންޖެހޭ ސަބަބެއް ނެތެވެ. (ފަނޑިޔާރު ފާޠިމަތު ފަރްހީޒާގެ ރައުޔު، ޕެރ. 13)
5. ވަގުތީ އަމުރަކީ މައްސަލަ ނިމެންދެން ދެވޭ ވަގުތީ ފަރުވާއެއް ކަމުން، އެ އަމުރު ތަންފީޛުނުވާނަމަ މައުޟޫޢީ މައްސަލަ ބަލާ ފަނޑިޔާރު ނޫން އެހެން ފަނޑިޔާރަކު ބަލާ ވަކި ތަންފީޛީ ޤަޟިއްޔާއެއް ހިންގުމަކީ އެންމެ ރަނގަޅު ގޮތެއް ނޫނެވެ؛ އޮތް ފަރުވާއަކީ މައުޟޫޢީ މައްސަލައިގެ ތެރެއިން އިތުރު ފިޔަވަޅު އެޅުން ނުވަތަ ކޯޓު ޙުރުމަތް ކެނޑުމުގެ ފިޔަވަޅު އެޅުމެވެ. (ފަނޑިޔާރު ފާޠިމަތު ފަރްހީޒާގެ ރައުޔު، ޕެރ. 14)