ޖަލްބޫޓް މެރިން ސަރވިސަސް ޕްރައިވެޓް ލިމިޓެޑް ވ. ޙުސައިން ނިޘާމް

ނަތީޖާ: އިސްތިއުނާފު ބާޠިލް، ޓްރައިބިއުނަލްގެ އިޖުރާއީ ނިންމުން ޤާއިމް

ދަށު ކޯޓު: ވަޒީފާއާބެހޭ ޓްރައިބިއުނަލް 200-VTR/IJ/2023/23

ކޯޓުން ނިންމަން ޖެހުނު ސުވާލު

ވަޒީފާއިން ވަކިކުރުމާ ގުޅިގެން ވަޒީފާއާބެހޭ ޓްރައިބިއުނަލަށް ހުށަހެޅި މައްސަލަ ހުށަހަޅާ ފޯމަކީ ވަޒީފާދިން ފަރާތަށް ޖަވާބުދާރީވުމަށް ކުފޫހަމަވާ މިންގަނޑަށް ތަފްޞީލުކޮށްފައިވާ ފޯމެއްތޯ؛ ފޯމު އިސްލާހުކުރުމަށް ނާންގައި މައުޟޫޢީ ޖަވާބަށް އެންގުމުން ޤާނޫނުއަސާސީގެ 42 ވަނަ މާއްދާގެ ޙައްޤު ގެއްލޭތޯ.

ކަނޑައެޅި ޤާނޫނީ އުޞޫލުތައް

1. ވަޒީފާއާބެހޭ ޤާނޫނުގެ 27 ވަނަ މާއްދާގެ ދަށުން، ވަޒީފާއިން ވަކިކުރުމާ ގުޅޭ މައްސަލައެއްގައި ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށްދިނުމުގެ ބުރަ އޮތީ ވަޒީފާދޭ ފަރާތަށެވެ؛ ސާބިތުނުކުރެވިއްޖެނަމަ އެކަށީގެންވާ ސަބަބެއްނެތި ވަކިކުރީ ކަމުގައި ބެލެވޭނެއެވެ. (ޕެރ. 17، 18)
2. ވަޒީފާއިން ވަކިކުރުމާ ގުޅިގެން ޓްރައިބިއުނަލަށް ހުށަހަޅާ މައްސަލައެއްގައި، (ހ) ވަޒީފާގެ ގުޅުމެއް އޮތްކަން ދައްކުވައިދޭ މައުލޫމާތު، (ށ) ވަޒީފާއިން ކެނޑިކަމާއި ކެނޑީ ނަހަމައިންކަމުގެ ތުހުމަތު، (ނ) އެދޭ ފަރުވާ، އަސާސީ ގޮތެއްގައި އެކުލަވާފައިވާނަމަ، އެއީ ޖަވާބުދާރީވުމަށް ކުފޫހަމަވާ މިންގަނޑަށް އޮތް ހުށަހެޅުމެއް ކަމުގައި ބަލައިގަންނަންޖެހެއެވެ. (ޕެރ. 19)
3. ވަޒީފާއިން ވަކިކުރީ ނަހަމައިން ކަމަށް ދެކެނީ ކީއްވެކަމާއި އެކަމުގެ ޤާނޫނީ ބުރުހާން ދެއްކުމަކީ މައްސަލަ ހުށަހަޅާ ފަރާތަށް އޮތް ކަމެއް ނޫނެވެ؛ ވަކިކުރިކަމާއި ނަހަމައިން ކަމުގެ ތުހުމަތު އެޅުމާއެކު، އެކަށީގެންވާ ސަބަބެއްކަން ސާބިތުކުރުމުގެ ބުރަ އުފުލަންޖެހެނީ ވަޒީފާދިން ފަރާތެވެ. (ޕެރ. 20)
4. ވަޒީފާގެ މައްސަލަ ހުށަހެޅުމުގައި އިޖުރާއީ ނުވަތަ ފަންނީ އާދައިގެ އުނިކަމެއް ހުރުމަކީ އިންސާފަށް ވާޞިލުވުމަށް ހުރަހަކަށް ވާނެ ކަމެއް ނޫނެވެ؛ ވަޒީފާގެ ޙައްޤަކަށް އަރައިގަނެވިފައިވާކަމުގެ ތުހުމަތު އެޅުވޭ މިންވަރަށް ޝަކުވާ ބަޔާންކޮށްފައިވާނަމަ އެއީ ބަލައިގަތުމަށް ފުދޭ މައްސަލައެކެވެ؛ ނަމަވެސް ތަފްޞީލުގައިވާ މައުޟޫޢީ ޢައިބަކީ ކަމުގެ ތަބީޢަތާއި މިންވަރުގެ ގޮތުން މައްސަލަ ބޭރުކޮށްލަންޖެހޭ ޙާލަތެއް ކަމުގައި ވުމަކީވެސް ވެދާނެ ކަމެކެވެ. (ޕެރ. 21)
5. ހުށަހެޅި ފޯމުގައި ޖަވާބުދާރީވުމަށް ކުފޫހަމަވާ މިންވަރަށް މައްސަލަ ބަޔާންކޮށްދީފައިވާނަމަ، ފޯމު އިސްލާހުކުރުމަށް ނާންގައި ޖަވާބުދާރީވުމަށް އެންގުމުން ޤާނޫނުއަސާސީގެ 42 ވަނަ މާއްދާގައިވާ ޙައްޤުން ވަޒީފާދޭ ފަރާތް މަޙްރޫމެއް ނުވެއެވެ. (ޕެރ. 23، 24)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 27 ވަނަ މާއްދާ
• ޤާނޫނު ނަންބަރު 11/2022 (ހެކީގެ ޤާނޫނު) ގެ 146 ވަނަ މާއްދާގެ (ށ)
• ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 42 ވަނަ މާއްދާ
• ILO Termination of Employment Convention 1982 (No. 158) ގެ 9 ވަނަ މާއްދާ
• Kroukam v SA Airlink (Pty) Ltd (2005) 26 ILJ 2153 (Labour Appeal Court, South Africa)
• Burns International Security Services Ltd v Butt [1983] ICR 547 (EAT, UK)
• Grimmer v KLM Cityhopper UK Ltd [2005] IRLR 596 (EAT, UK)
• John Macmillan, Blackstone's Guide to the Employment Tribunals Rules 2013 (OUP, 2013) 28