އއ.ތޮއްޑޫ ކައުންސިލް ވ. އަޒްމަތު ޚަލީލް އަދި އިތުރު ފަރާތްތައް

ނަތީޖާ: ވަގުތީ އަމުރުގެ ފާއިލިއްޔަތު ގޮސްފައިވާތީ ދަށުކޯޓުގެ އަމުރަށް ބަދަލެއް ނުގެނެސް އިސްތިއުނާފު ނިންމި

ދަށު ކޯޓު: އއ. ތޮއްޑޫ މެޖިސްޓްރޭޓް ކޯޓު U.1.MC/2023/01

ކޯޓުން ނިންމަން ޖެހުނު ސުވާލު

ބަންޑާރަ ގޯތި ދޫކުރުމުގެ އިޢުލާނާ ގުޅިގެން އެއްވެސް ފަރާތަކާ ގޯއްޗެއް ހަވާލުނުކުރުމަށް ކައުންސިލަށް މެޖިސްޓްރޭޓް ކޯޓުން ނެރުނު ވަގުތީ އަމުރު ޤާނޫނާ ޚިލާފުތޯ؛ އަދި އިސްތިއުނާފު ބަލަމުންދަނިކޮށް މައުޟޫޢީ މައްސަލައިގައި ޙުކުމްކޮށްފައިވާ ޙާލަތުގައި ވަގުތީ އަމުރާމެދު ގޮތެއް ނިންމަންޖެހޭތޯ.

ކަނޑައެޅި ޤާނޫނީ އުޞޫލުތައް

1. ވަގުތީ އަމުރެއް ނެރެފައިވަނީ މައުޟޫޢީ މައްސަލައިގައި ޙުކުމްކުރެވެންދެން ކަމުގައިވާނަމަ، މައުޟޫޢީ މައްސަލައިގައި ޙުކުމްކުރުމާއެކު އެ ވަގުތީ އަމުރުގެ ފާއިލިއްޔަތު ނެތިގެންދެއެވެ. (ޕެރ. 17-19)
2. ކޯޓަށް ހުށަހެޅިފައިވާ މައްސަލައެއްގެ މައުޟޫޢާމެދު ކޯޓުން ގޮތެއް ކަނޑައެޅުމުގެ ކުރިން އެ މައުޟޫޢުގައި އިދާރާއަކުން އިދާރީ ފިޔަވަޅުތައް އަޅަން ދޫކޮށްލެވިއްޖެނަމަ މައްސަލަ ފައިޞަލާކުރުމުގެ ބޭނުން ނެތިގެން ދިއުމަށް ޖެހޭތީ، މައުޟޫޢީ ދަޢުވާގެ މައުޟޫޢު ރައްކާތެރިކޮށް ބެހެއްޓުމަށް ވަގުތީ އަމުރުން އިދާރީ ފިޔަވަޅު ހުއްޓުވުމަކީ ޤާނޫނީ ގޯހެއް ފާޅުކަން ބޮޑުގޮތެއްގައި ފެންނަ ކަމެއް ނޫނެވެ. (ޕެރ. 19)
3. ވަގުތީ އަމުރު ނެރުމުގައި ޤާނޫނާ ޚިލާފު ކަމެއް ފާޅުކަން ބޮޑުގޮތެއްގައި ފެންނަން ނެތް ޙާލަތެއްގައި، މައުޟޫޢު ނެތިފައިވާ ފަހުން ފަނޑިޔާރު ޤާނޫނު އެޕްލައިކުރި ގޮތާއި އިޚްތިޔާރުގެ ބޭނުންކުރި ގޮތާމެދު އިތުރަށް ބަޙުޘްކުރުމުގެ ބޭނުމެއް ނެތެވެ. (ޕެރ. 20)

ބަލާފައިވާ ޤާނޫނުތައް

• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާގެ (ހ)، (ށ)، (ނ) (އިސްތިއުނާފުގެ މުއްދަތު)