ޒަައިދު މަޙްމޫދު ވ. ޢަބްދުލްޖަލީލު ޢަބްދުއްރަޙްމާން ހުޅުމާލެ 11236 (ފެހިތަރި)

ނަތީޖާ: އިސްތިއުނާފު ބާޠިލް، ދަށުކޯޓުގެ ކޯޓު އަމުރު ޤާއިމް

ދަށު ކޯޓު: ސިވިލް ކޯޓު 144-BHD5/CA/2024/02

ކޯޓުން ނިންމަން ޖެހުނު ސުވާލު

ޙުކުމް ތަންފީޛުކުރުމުގެ ޤަޟިއްޔާއެއްގެ ތެރެއިން ދަރަނިވެރިޔާގެ މުސާރައިން މަހަކު 5,000 ރުފިޔާ އުނިކުރުމަށް ނެރުނު ކޯޓު އަމުރު، މަދަނީ އިޖުރާއަތުގެ ޤާނޫނުގެ 369 ވަނަ މާއްދާގައިވާ ގޮތަށް ދަރަނިވެރިޔާގެ މާލީ ޙާލަތު ވަޒަންކުރުމަކާ ނުލައި ނެރުނު އަމުރެއްތޯ.

ކަނޑައެޅި ޤާނޫނީ އުޞޫލުތައް

1. ދަރަނިވެރިޔާއަށް މާލީ ޙާލަތު އަންގައިދޭ ހެކި ހުށަހެޅުމުގެ ފުރުޞަތު ދީ، ހުށަހެޅި ހެކިތަކާއި ކޯޓުގެ އިސްނެގުމުގައި އިދާރާތަކުން ސާފުކުރި މަޢުލޫމާތަށް ބަލައި، ދަރަނިވެރިޔާ ކުރަންޖެހޭ ޚަރަދުތައް ވަޒަންކޮށްގެން މުސާރައިން އުނިކުރާ މިންވަރު ކަނޑައަޅާފައިވާނަމަ، އެއީ މަދަނީ އިޖުރާއަތުގެ ޤާނޫނުގެ 369 ވަނަ މާއްދާގައިވާ ގޮތަށް ދަރަނިވެރިޔާގެ މާލީ ޙާލަތު ވަޒަންކުރުމަށްފަހު ކަނޑައަޅާފައިވާ ނިންމުމެކެވެ. (ޕެރ. 10.1-10.2)
2. ދަރަނިވެރިޔާ ކުރަންޖެހޭ ޚަރަދެއްގެ ގޮތުގައި ބިލުތައް ހުށަހެޅި ނަމަވެސް އެ ޚަރަދުތައް ކުރިކަން އެނގޭ ހެކި ހުށަހަޅާފައި ނުވާނަމަ، ނުވަތަ މުސާރައިން ފައިސާ ކަނޑާކަމަށް ބުނާ ކަމެއް މުސާރައިގެ ތަފްޞީލުން ނޭނގޭނަމަ، އެ ޚަރަދުތައް ވަޒަން ނުކުރުމަކީ ހެކިތަކަށް ރިޢާޔަތް ނުކުރުމެއް ނޫނެވެ. (ޕެރ. 10.2)
3. ތަންފީޛީ މަރުޙަލާގައި ކަނޑައަޅާ ދެއްކުމުގެ މުހުލަތު މައުޟޫޢީ ޤަޟިއްޔާގައި ކަނޑައެޅި މުހުލަތަށްވުރެ ގިނަ ގުނަ ދިގުކޮށް، ޖުމްލަ ދަރަންޏާ އަޅާބަލާއިރު ކޮންމެ މަހަކު ނިސްބަތުން މަދު އަދަދެއް އުނިކުރުމަށް ނިންމާފައިވާނަމަ، އެއީ ދަރަނިވެރިޔާގެ މަޞްލަޙަތުގައި ލުއި މިންގަނޑަކުން ކުރި ނިންމުމެކެވެ؛ ކޯޓު އަމުރު ޚިލާފުވާ ޤާނޫނީ ހަމައެއް އިސްތިއުނާފުކުރާ ފަރާތަށް ބުނެދެވިފައި ނުވާނަމަ، އެ އަމުރު ބާޠިލުކުރަންޖެހޭ ތަނެއް ނެތެވެ. (ޕެރ. 10.3-10.5)

ބަލާފައިވާ ޤާނޫނުތައް

• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 369 ވަނަ މާއްދާ
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާގެ (ހ) (އިސްތިއުނާފުގެ އިޖުރާއަތު)