މުޙައްމަދު ނިހާލް ސަލީމް

ނަތީޖާ: ރަޖިސްޓްރާރގެ ނިންމުމާއި މުރާޖަޢާގެ ނިންމުން ބާޠިލު؛ ޓްރައިބިއުނަލުން މައްސަލަ ބަލައިގަނެ ނިންމުމަށް

ދަށު ކޯޓު: ވަޒީފާއާބެހޭ ޓްރައިބިއުނަލް 200-M3/RDA/2025/14

ކޯޓުން ނިންމަން ޖެހުނު ސުވާލު

ޕްރޮބޭޝަން މުއްދަތުގައި ވަކިކުރެވުނު، ސަރުކާރު ކުންފުންޏެއްގެ ޗީފް އިންޓަރނަލް އޮޑިޓަރު، ވަކިކޮށްފައިވަނީ ކޯޕަރޭޓް ގަވަރނަންސް ކޯޑުގައިވާ ޚާއްޞަ އިޖުރާއަތާ ޚިލާފަށް ކަމަށް ބުނެ ހުށަހެޅި ޝަކުވާއަށް، ވަޒީފާއާބެހޭ ޤާނޫނުގެ 28 (ށ) ތަޠުބީޤުކޮށް ޓްރައިބިއުނަލަށް އިޚްތިޞާޞް ނެތް ކަމަށް ކަނޑައެޅީ ރަނގަޅަށްތޯ؟

ކަނޑައެޅި ޤާނޫނީ އުޞޫލުތައް

1. ވަޒީފާއާބެހޭ ޤާނޫނުގެ 14 ވަނަ މާއްދާއިން ވަގުތީ މުއްދަތަކަށް (ޕްރޮބޭޝަން) ވަޒީފާ އަދާކުރުމަށް ތަންދީ، އެ މުއްދަތުގައި ނޯޓިސް ނުދީ އެއްބަސްވުން ބާޠިލުކުރުމުގެ އިޚްތިޔާރު ދެފަރާތަށް ދެއެވެ؛ 28 ވަނަ މާއްދާގެ (ށ) އިން، ވަގުތީ މުއްދަތުގައި ވަކިކުރުމުން (ހ) ގެ ދަށުން ޝަކުވާ ހުށަހެޅުމުގެ ޙައްޤު ނުދެއެވެ. (ޕެރ. 20-21، 36)
2. ވަޒީފާއާބެހޭ ޤާނޫނުގެ 28 ވަނަ މާއްދާ ޚާއްޞަވަނީ 'އެކަށީގެންވާ ސަބަބެއްނެތި' ވަކިކުރުމުގެ މައްޗަށް ޝަކުވާ ހުށަހެޅުމަށެވެ؛ ވަކިކުރި ސަބަބަށް ޖަދަލު ނުކޮށް، ވަކިކުރުމުގެ އިޖުރާއަތު ޤާނޫނާއި ގަވާއިދާ ޚިލާފު ކަމަށް ބުނާ ޝަކުވާއަކީ 28 (ށ) ގެ ތެރެއަށް ނުވަދެވިދާނެ ކަމަށް ތަރުޖަމާކުރުމުގެ އިޙުތިމާލު އޮތް ބަހުސެކެވެ. (ޕެރ. 37، 41)
3. ސަރުކާރު ކުންފުނިތަކުން ޢަމަލުކުރަންޖެހޭ ވަކި އިޖުރާއަތެއްގެ ދަށުން ޤާއިމުކޮށްފައިވާ މަޤާމަކާ ގުޅޭ މައްސަލައެއް އެ އިޖުރާއަތަށް ހަވާލާދީ ހުށަހަޅައިފިނަމަ، ޕްރޮބޭޝަންގައި ހުރި ފަރާތެއް ނަމަވެސް، އެ މަޤާމަކީ އެ ޚާއްޞަ އިޖުރާއަތު ނިސްބަތްވާ މަޤާމެއްތޯ، ޢައްޔަންކޮށްފައިވަނީ އޭގެ ދަށުންތޯ، ވަކިކޮށްފައިވަނީ އޭގެ ދަށުންތޯ ބަލައި އެ ޤާނޫނީ ސުވާލަށް ޖަވާބު ދޭންޖެހޭނެއެވެ. (ޕެރ. 40، 42)
4. ކޯޑުގެ 25 ވަނަ މާއްދާގެ (4) އާއި (15) ގެ ދަށުން އިންޓަރނަލް އޮޑިޓަރު ރިޕޯޓުކުރަންޖެހޭނީ އޮޑިޓް ކޮމިޓީއަށް ނުވަތަ ބޯޑަށް ކަމާއި، ހެޑް އޮފް އިންޓަރނަލް އޮޑިޓް ޢައްޔަންކޮށް ވަކިކުރެވޭނީ އޮޑިޓް ކޮމިޓީގެ އަޣްލަބިއްޔަތުގެ ނިންމުމަކުން ކަމަށް ކޯޑުގައި ބަޔާންކުރާ ޙާލަތުގައި، އެ ޚާއްޞަ ޙާލަތު ހިމެނޭ ޝަކުވާއެއް 28 (ށ) ތަޠުބީޤުކޮށް ސީދާ ބަލައިނުގަނެ ނުނިންމޭނެއެވެ. (ޕެރ. 26، 38-39، 44)
5. ޓްރައިބިއުނަލުން ނިންމާ ނިންމުމުގައި، ޚަސްމު އުފައްދާ ޤާނޫނީ ބަހުސަށް ޖަވާބުދީ، ނިންމުމަށް ވާޞިލުވި ސަބަބު ބަޔާންކޮށްދޭންޖެހޭނެއެވެ. (ޕެރ. 41-42)
6. ޓްރައިބިއުނަލަށް އިޚްތިޞާޞް ލިބިގެންވާކަން ކަނޑައެޅޭނީ އުފައްދާފައިވާ ޤާނޫނީ ބަހުސަށް ޖަވާބު ދެވިގެން ކަމަށްވާތީ، އެފަދަ ޙާލަތުގައި މައްސަލަ ބަލައިގަނެ، މައްސަލަ ރައްދުވާ ފަރާތުގެ ބަސްވެސް ހޯދައި ގޮތެއް ކަނޑައަޅަންޖެހޭނެއެވެ. (ޕެރ. 43-44)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 14 ވަނަ މާއްދާގެ (ހ) އާއި (ށ)
• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 28 ވަނަ މާއްދާގެ (ހ) އާއި (ށ)
• ގަވާއިދު ނަންބަރު R-14/2022 (ވަޒީފާއާބެހޭ ޓްރައިބިއުނަލްގެ ގަވާއިދު) ގެ 26 ވަނަ މާއްދާގެ (ނ)
• Code of Corporate Governance for State Owned Enterprises (01 މެއި 2019) ގެ 25 ވަނަ މާއްދާގެ (4)، (6)، (15)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 268 ވަނަ މާއްދާ އާއި 284 ވަނަ މާއްދާގެ (ހ)، (ށ)، (ނ)، (ރ)