ނަން ފޮރުވާފައި ވ. ނަން ފޮރުވާފައި

ޝަރީޢަތް ނިމުނުގޮތުގެ ޚުލާޞާ

ޤަޟިއްޔާ ނަންބަރު: 2011/SC-A/45

ދަޢުވާކުރާ ފަރާތް: ނަން ފޮރުވާފައި

ދަޢުވާ ލިބޭ ފަރާތް: ނަން ފޮރުވާފައި

މައްސަލައިގެ ބާވަތް: ދަރިފުޅު ނަފީކުރުން

މައްސަލަ އައިގޮތް: އިސްތިއުނާފްކުރުމުގެ ހުއްދައަށް އެދި ހުށަހަޅާ ފޯމުން

ހުށަހެޅުނު ތާރީޚް: 23 އޮކްޓޯބަރ 2011

ރަޖިސްޓްރީ ކުރެވުނު ތާރީޚް: 31 އޮކްޓޯބަރ 2011

ނިމުނު ތާރީޚް: 24 ޖޫން 2015

މައްސަލަ ނިންމި ގަޑި: 12:45

މައްސަލަ ބެލި ފަނޑިޔާރުންގެ މަޖިލިސް: އުއްތަމަ ފަނޑިޔާރު ޢަބްދުﷲ ސަޢީދު، ފަނޑިޔާރު ޢަލީ ޙަމީދު މުޙައްމަދު، ފަނޑިޔާރު އާދަމް މުޙައްމަދު ޢަބްދުﷲ.

އިސްތިޢުނާފު ކުރެވުނު ޤަޟިއްޔާ

ނަންބަރު: (MISL)95-CR/INDIV/2011/399

ނިންމެވި ކޯޓު: ދިވެހިރާއްޖޭގެ ހައިކޯޓު

ހުށަހެޅުނު ތާރީޚް: 14 ސެޕްޓެމްބަރ 2011

ނިމުނު ތާރީޚް: 18 ސެޕްޓެމްބަރ 2011

މައްސަލައިގެ ޙުލާޞާ

[1]މި މައްސަލައަކީ ފެމިލީ ކޯޓުގެ ނަންބަރު 290/Fm-C/2011 ޤަޟިއްޔާގައި އެކޯޓުން ކޮށްފައިވާ ޙުކުމާމެދު ހިތްހަމަނުޖެހޭތީ މާލޭ ހ.މޯހިރު ނަން ފޮރުވާފައި އެ ޤަޟިއްޔާ ދިވެހިރާއްޖޭގެ ހައިކޯޓުގައި އިސްތިއުނާފުކުރުމަށް ހުށަހެޅުމުން ހައި ކޯޓުގެ ނަންބަރު (MISL)95-CR/INDIV/2011/399 ނިންމުމުން އެ މައްސަލަ ބަލައިނުގަތުމަށް ހައިކޯޓުން ކަނޑައަޅާފައިވަނީ ޝަރްޢީ އަދި ޤާނޫނީ ހަމަތަކާ ޚިލާފަށްކަމަށް ބުނެ، އެ މައްސަލަ ބަލައިގަތުމަށާއި ޝަރީޢަތުން ޙުކުމެއް ކޮށްދިނުމުގެ އަމުރެއް ހައިކޯޓުގެ މައްޗަށް ނެރެދިނުން އެދި މާލޭ ހ.މޯހިރު ނަން ފޮރުވާފައި ދިވެހިރާއްޖޭގެ ސުޕްރީމް ކޯޓުގައި އިލްތިމާސްކުރުމަށް ހުށަހެޅުމުން ބަލާފައިވާ މި ކޯޓުގެ ނަންބަރު 2011/SC-A/45 ޤަޟިއްޔާއެވެ.

ފާހަގަކުރެވުނު ނުކުތާތައް

[2]މި މައްސަލާގައި ދެފަރާތުން ޝަރީޢަތުގެ މަޖިލީހުގައި ދައްކާފައިވާ ވާހަކަތަކަށާއި ހުށަހަޅާފައިވާ ލިޔުންތަކަށާއި ކަމާބެހޭ ޤާނޫނުތަކާއި ޤަވާޢިދުތަކަށް ޝަރްޢީ އަދި ޤާނޫނީ ނަޒަރަކުން ބެލިއިރު، އަންނަނިވި ކަންތައްތައް ފާހަގަކުރެވިފައިވެއެވެ.

[3](ހ) ފުރަތަމަ ކަމަކީ، ފެމިލީ ކޯޓުގެ ނަންބަރު 290/Fm-C/2011 ޤަޟިއްޔާގެ ޝަރިޢަތް ނިމުނު ގޮތުގެ ރިޕޯޓަށް ބެލިއިރު އެ ޤަޟިއްޔާއަކީ، ނަން ފޮރުވާފައި އިނުމަށްފަހު ވަރިކޮށްފައިވާ ޝަޛުރާ އިބްރާހީމް އަށް ލިބިފައިވާ ދަރި، ޝީން އަލް އަޒްލީމަކީ، ނަން ފޮރުވާފައިގެ ދަރިއެއް ނޫންކަމަށް ބުނެ، އެ ދަރި ނަފީކުރުމަށް އެދި އެކޯޓަށް ހުށަހެޅުމުން ބަލައި ނިންމާފައިވާ ޤަޟިއްޔާކަމާއި، އެ ޤަޟިއްޔާގެ ޙުކުމުގައިވަނީ "ދެންފަހެ، މާލެ ހ. މޯހިރު ނަން ފޮރުވާފައި އިނދެވަރިކުރި ގދ.ތަރަފަންދޫ ލިލީގެ ނަން ފޮރުވާފައި އަށް ލިބިފައިވާ ދަރި، ޝީން އަލް އަޒްލީމް ( އުފަންތާރީކް: 2008 އޮކްޓޯބަރ 15) އަކީ ނަން ފޮރުވާފައިގެ ދަރިއެއް ނޫންކަމަށް ބުނެ، މި ދަރި ނަފީކުރުމަށް އެދި ނަން ފޮރުވާފައި ހުށަހަޅާފައިވާ މި ޤަޟިއްޔާގައި، ޝަރިޢަތުގައި ދެކެވުނު ވާހަކަތަކަށް ޝަރުޢީ އަދި ޤާނޫނީ ނަޒަރަކުން ރިޢާޔަތްކޮށް ބަލާއިރު، ނަން ފޮރުވާފައި އާއި ޝަޛުރާ އިބްރާހީމް ޝަރުޢީ ހަމަތަކުގެ މަތިން 23 މާރޗް 2008 މ/ 16 ރަބީޢުލްއައްވަލް 1429ހ ގައި ޝަރުޢީ ހަމަތަކުގެ މަތިން ކައިވެނި އަޤުދުކޮށްފައިވާކަން ޢާއިލާއާބެހޭ ކޯޓުގެ ނަންބަރު 559/2008 ކާވެނީގެ ސެޓިފިކެޓުން އެނގޭކަމާއި، ޝީން އަލް އަޒްލީމް އުފަންވެފައިވާ ތާރީޚަކީ 15 އޮކްޓޯބަރ 2008 މ/15 ޝައްވާލް 1429ހ ކަން މާލޭ މުނިސިޕަލްޓީގެ އުފަންދުވަހުގެ ސެޓްފިކެޓް ނަންބަރު 3488/2008 އިން އެނގޭކަމާއި، ނަން ފޮރުވާފައި، ނަން ފޮރުވާފައި 2008 ޖޫން 09 ވަނަ ދުވަހު ވަރިކޮށްފައިވާކަން ޢާއިލާއާ ބެހޭ ކޯޓުގެ ނަންބަރު 1096/AC/2008 ޤަޟިއްޔާއިން އެނގޭކަމާއި، މި ދަރިއަކީ ނަން ފޮރުވާފައިގެ ދަރިއެއް ނޫންކަމުގައި ނަން ފޮރުވާފައި ބުނި ކަމުގައިވީނަމަވެސް، ޝަރުޢީ އަދި ޤާނޫނީ ހަމަތަކުގެ މަތިން މިކަން ނަން ފޮރުވާފައި ސާބިތުކުރުމަށް ހެކިން ހުށަހަޅާފައިނުވާއިރު، އިސްވެ އިޝާރާތްކުރެވުނު ކަންކަމުގެ މައްޗަށް ޢާއިލާއާބެހޭ ޤާނޫނާއި ޢާއިލާއާބެހޭ ޤަވާޢިދުގެ އަލީގައި ރިޢާޔަތްކުރެވުނު ހިނދު، ޢާއިލާއާބެހޭ ޤަވާޢިދުގެ 82 ވަނަ މާއްދާގެ (ހ) ގައިވާ ގޮތުގެ މަތިން ކުއްޖެއްގެ ނަސަބު ނަފީކުރުމަށް ބޭނުންވަނީނަމަ، ކުއްޖާ ވިހޭ ތާރީޚުން ފެށިގެން 1 (އެކެއް) މަސް ދުވަހުގެ ތެރޭގައި ކޯޓަށް ހުށަޅަން ވާނޭކަމުގައި ބަޔާންކޮށްފައިވާއިރު، ބުނެވިދިޔަ ކުއްޖާގެ ނަސަބު ނަފީކުރުމަށް ބަޔާންކުރަނިވި މުއްދަތުގެ ތެރޭގައި ނަން ފޮރުވާފައި މައްސަލަ ހުށަހަޅާފައިނުވާކަން ކޯޓުގެ ރެކޯޑުތަކުން އެނގެން އޮތަތީ އާއި، ޢާއިލާއާބެހޭ ޤަވާޢިދުގެ 82 ވަނަ މާއްދާގެ (ހ) ގައިވާ މުއްދަތު ފާއިތުވުމަށްފަހު، ކުއްޖާގެ ނަސަބު ނަފީކުރުމުގެ މައްސަލައެއް ކޯޓަށް ބަލައިދެވޭނީ އެކުއްޖަކު ވިހާފައިވަނީ އެކުއްޖެއްގެ ނަސަބު ނަފީކުރެވޭ މީހާއާއެކު ކާވެނި ކުރިތާ 06 (ހައެއް) މަސްދުވަހުގެ ކުރިން ނުވަތަ ވަރިކުރިތާ 01 (އެކެއް) އަހަރު ފަހުންކަން އެނގޭ ލިޔުންތަކަކާއެކު ކޯޓަށް ހުށަހެޅުމުންކަން ޢާއިލާއާބެހޭ ޤަވާޢިދުގެ 82 ވަނަ މާއްދާގެ (ށ) ގައި ބަޔާންކޮށްފައިވާތީ، ނަން ފޮރުވާފައި އާއި ނަން ފޮރުވާފައި އާ ދެމީހުން ކާވެނިކޮށްފައިވާ ތާރީޚާއި، ވަރިވެފައިވާ ތާރިޚާއި ބުނެވިދިޔަ ކުއްޖާ ވިހާފައިވާ ތާރީޚަށް ބަލާއިރު، ނަން ފޮރުވާފައި، ޝީން އަލް އަޒްލީމް ވިހާފައިވަނީ ނަން ފޮރުވާފައި އާއި ނަން ފޮރުވާފައި އާ ދެ މީހުން ކައިވެނިކުރިތާ ހިޖުރީގޮތުން 06 (ހައެއް) މަހާއި 29 (އޮނަތިރީސް) ދުވަހުންކަމާއި، އަދި ނަން ފޮރުވާފައި، ޝީން އަލް އަޒްލީމް ވިހާފައިވަނީ ދެ މީހުން ވަރިވިތާ 02 (ދެއެއް) މަހާއި 19 (ނަވާރަ) ދުވަހުންކަން މި މައްސަލައާއި ގުޅިގެން ޝަރީޢަތަށް ހުށަހެޅިފައިވާ ލިޔެކިޔުންތަކުން އެނގެންއޮތަތީ، ޝީން އަލް އަޒްލީމަކީ ޤާނޫނު ނަންބަރު 4/2000 "ޢާއިލާއާބެހޭ ޤާނޫނު" ގެ 52 ވަނަ މާއްދާގައި ބަޔާންކުރާ ދަރިލެއްވުމުގެ މުއްދަތުގައި ޝަޛުރާ އިބްރާހީމް ވިހާފައިވާ ކުއްޖަކުކަމުން، ދަރިލެއްވުމުގެ މުއްދަތުގައި ޝަޛުރާ އިބްރާހީމް ވިހާފައިވާ އަންހެން ދަރި ނަފީކުރެވޭނޭ ތަނެއްނެތްކަން މާލެ ހ.މޯހިރު ޙަސަން އަޒްލީމަށް އަންގައި، މިގޮތުގެ މަތިން ޙުކުމްކޮށް މި ޤަޟިއްޔާ ނިންމީއެވެ". މިފަދައިންކަން އެނގެން އޮންނަ އޮތުމެވެ.

[4](ށ) ދެވަނަ ކަމަކީ، ފެމިލީ ކޯޓުގެ ނަންބަރު 290/Fm-C/2011 ޤަޟިއްޔާގެ ޙުކުމާމެދު ހިތް ހަމަނުޖެހޭތީ ނަން ފޮރުވާފައި ދިވެހިރާއްޖޭގެ ހައިކޯޓުގެ ނަންބަރު 313/2011 ފޯމުން އެޤަޟިއްޔާ ހައިކޯޓުގައި އިސްތިއުނާފުކުރުމަށް ނަން ފޮރުވާފައި ހައިކޯޓަށް ހުށަހެޅުމުން، ހައިކޯޓުގެ ގަވާއިދުގެ 27 ވަނަ މާއްދާގެ ދަށުން ހުށަހަޅާފައިވާ މައްސަލައަކަށް ނުވާތީ، އެ މައްސަލައަކީ ހައިކޯޓަށް ހުށަހެޅޭނެ ބާވަތުގެ މައްސަލައެއް ނޫންކަމަށާއި އަދި އެ މައްސަލަ ހައިކޯޓަށް ބަލައިގަނެވެންނެތް ކަމަށް އެކޯޓުން ނިންމި ނިންމުން ނަން ފޮރުވާފައި ދިވެހިރާއްޖޭގެ ސުޕްރީމްކޯޓުގައި އިލްތިމާސްކުރުމުގައި ހައިކޯޓުގެ ނިންމުން ރަނގަޅު ނޫންކަމަށް ދެކޭ ސަބަބު ކަމަށް ހުށަހަޅާފައިވަނީ އަންނަނިވި ނުކުތާތައްކަން އެނގެން އޮންނަ އޮތުމެވެ.

[5](ހ) ފުރަތަމަ ނުކުތާއަކީ 19 މެއި 2011 ވަނަ ދުވަހު ފެމިލީ ކޯޓުގެ ޝަރީޢަތުގެ މަޖިލީހަށް ނަން ފޮރުވާފައި ދީފައިވާ ބަޔާނުގައި ނަން ފޮރުވާފައިއާ ކާވެނިކޮށް، ޖިމާޢު ވެފައި ނުވާނޭ ކަމަށް ނަން ފޮރުވާފައި ބުނެފައިވާއިރު، ނަން ފޮރުވާފައި ވިހާފައިވާ ދަރިފުޅަކީ ނަން ފޮރުވާފައިގެ ދަރިއެއްކަމަށް ޝަރީޢަތުން ބައްލަވާފައިވާ ކަމަށާއި ނަމަވެސް ނަން ފޮރުވާފައި އާ ކާވެނީގެ ގޮތުން ގުޅުނު ކަމުގައިވިޔަސް އޭނާއާއެކު އެއްވެސް ވަގުތެއްގައި އަދި އެއްވެސް ދުވަހަކު ޖިމާޢު ވެފައި ނުވާނޭކަމަށް ކަނޑައެޅިގެން ޝަރިޢަތުގެ މަޖިލީހުގައި ދެންނެވުމުން ނަން ފޮރުވާފައިގެ މައްޗަށް ޝަރްޢީގޮތުން އޮންނާނީ ލިޢާންކުރުން ކަމަށް ނަން ފޮރުވާފައި ދެކޭކަމަށާއި، ނަމަވެސް ލިޢާން ކުރުމަށް ފުރުސަތު ނުދެއްވާ ނަން ފޮރުވާފައި ވިހާފައިވާ ދަރިފުޅަކީ ނަން ފޮރުވާފައިގެ ދަރިއެއްކަމަށް ބެލެވޭނެ ޝަރްޢީ އެއްވެސް ހަމައެއް ނޯންނާނެ ކަމުގައި ހައިކޯޓަށް ނަން ފޮރުވާފައި ހުށަހެޅި ފޯމުގައި ބަޔާންކޮށްފައިވާއިރު، މި މައްސަލައަކީ ހައިކޯޓުގެ ޤަވާއިދު 2011 ގެ 27 ވަނަ މާއްދާގެ ދަށުން ބަލައިގަނެވޭނެ މައްސަލައެއް ނޫންކަމަށް ޖަވާބު ދެއްވާފައިވާކަމަށް ބުނެ ފާހަގަކުރި ނުކުތާ.

[6](ށ) ދެވަނަ ނުކުތާއަކީ ޤާނޫނު ނަންބަރު 4/2000 (ޢާއިލާއާބެހޭ ޤާނޫނު)ގެ 52 ވަނަ މާއްދާގެ (ނ)ގައި "އިސްލާމީ ޝަރީޢަތުގައި ކަނޑައެޅިފައިވާ ގޮތުގެ މަތިން ލިޢާންކޮށް، ކުއްޖެއްގެ ނަސަބު ނަފީކުރުމަށް މި މާއްދާ ހުރަހެއް ނާޅައެވެ". މިފަދައިން މި މާއްދާގައި ބަޔާންކޮށްފައި އޮތް ހިނދު އަދި ނަން ފޮރުވާފައި ވިހާފައިވާ ދަރިފުޅަކީ ނަން ފޮރުވާފައިގެ ދަރިއެއް ނޫންކަމަށާއި އެއްވެސް އިރެއްގައި ނަން ފޮރުވާފައި އާ ނަން ފޮރުވާފައި ޖިމާޢު ވެފައި ނުވާނެ ކަމަށް ހައިކޯޓަށް ހުށަހެޅި ފޯމުގައި ބަޔާންކޮށްފައިވާއިރު ހައިކޯޓުގެ ޤަވާޢިދު 2011 ގެ 27 ވަނަ މާއްދާގެ ދަށުން މި މައްސަލައަކީ ހައިކޯޓަށް ހުށަހެޅޭ މައްސަލައެއް ނޫންކަމަށް ޖަވާބުދެއްވާފައިވާކަމަށް ބުނެ ފާހަގަކުރި ނުކުތާ.

[7](ނ) ތިންވަނަ ކަމަކީ، މި މައްސަލައަކީ ނަން ފޮރުވާފައި 15 އޮކްޓޯބަރ 2008 (15 ޝައްވާލު 1429ހ) ގައި ވިހާފައިވާ ދަރިފުޅަކީ ނަން ފޮރުވާފައިގެ ދަރިއެއް ނޫންކަމަށްބުނެ ދަރިފުޅުގެ ނަސަބު ނަފީކުރުމަށް ހުށަހަޅާފައިވާ މައްސަލައަކަށްވެފައި، އިސްލާމީ ޝަރީޢަތުގައި ނަސަބު ސާބިތުވާ ސަބަބަކީ "އަލްވަލަދު ލިލްފިރާޝް" ގެ މަބްދައުގެ މަތިން ކާވެނީގެ ޞައްޙަ އަޤްދުކަމާއި އެގޮތުން ޞައްޙަކާވެންޏަކަށް ހަމަސް ފުރައި ވިހާކުއްޖާގެ ނަސަބު އެކާވެނީގެ ޢަޤްދުކުރި ފިރިމީހާއަށް ސާބިތުވާނެކަން އެނގެން އޮތުމުގެ އިތުރަށް، ދަރިލައްވާ ކުރު މުއްދަތަކީ ހިޖްރީ މައްސަރުން ހަމަސްދުވަސްކަމަށާއި އަދި ވަރިކޮށްފައިވާނަމަ ދަރިލައްވާ މުއްދަތަކީ ވަރިކުރި ތާރީޚުން ފެށިގެން ހިޖްރީ ގޮތުން 1 (އެކެއް) އަހަރު ތެރޭގައި ވިހެއުންކަމަށް ޤާނޫނު ނަންބަރު 4/2000 (ޢާއިލާއާބެހޭ ޤާނޫނު) ގެ 52 ވަނަ މާއްދާގެ (ށ) ގައި ބަޔާންކޮށްފައި އޮތުމާއެކު، ނަން ފޮރުވާފައި އާއި ނަން ފޮރުވާފައިއާ ދެމީހުން 23 މާރޗް 2008 (16 ރަބީޢުލްއައްވަލް 1429ހ) ގައި ކާވެނި ޢަޤްދުކުރުމަށްފަހު، 9 ޖޫން 2008 (05 ޖުމާދިލްއާޚިރު 1429) ގައި ނަން ފޮރުވާފައި، ނަން ފޮރުވާފައި ވަރިކޮށްފައިވާކަމާއި، 15 އޮކްޓޯބަރ 2008 (15 ޝައްވާލް 1429) ގައި ނަން ފޮރުވާފައި ވިހޭކުއްޖާ ޝީން އަލް އަޒްލީމް ވިހާފައިވަނީ ނަން ފޮރުވާފައި އާއި ނަން ފޮރުވާފައި 23 މާރޗް 2008 (16 ރަބީޢުލްއައްވަލް 1429) ގައި ކައިވެނިކުރިތާ ހިޖުރީ ގޮތުން 6 (ހައެއް) މަހާއި 29 (އޮނަތިރީސް) ދުވަހުންކަމާއި އަދި 15 އޮކްޓޯބަރ 2008 (15 ޝައްވާލް 1429) ގައި ނަން ފޮރުވާފައި، ޝީން އަލް އަޒްލީމް ވިހާފައިވަނީ އެދެމީހުން 9 ޖޫން 2008 (05 ޖުމާދިލް އާޚިރު 1429) ގައި ވަރިވިތާ 02 (ދޭއް) މަހާއި 19 (ނަވާރާ) ދުވަހުންކަން އެނގެން އޮންނާތީ، ނަން ފޮރުވާފައި، ޝީން އަލް އަޒްލީމް ވިހާފައިވަނީ އިސްލާމީ ޝަރީޢަތުގައި ކަނޑައެޅިފައިވާ އުޞޫލާ އެއްގޮތްވާ ގޮތުގެމަތިން، ޤާނޫނު ނަންބަރު 4/2000 (ޢާއިލާއާބެހޭ ޤާނޫނު) ގެ 52 ވަނަ މާއްދާގެ (ށ) ގައި ބަޔާންކޮށްފައިވާ ދަރި ލެއްވުމުގެ މުއްދަތުގައިކަން އެނގެން އޮންނަ އޮތުމެވެ.

[8](ރ) ހަތަރުވަނަ ކަމަކީ، ޙަސަން އަޒްލީމާއި ނަން ފޮރުވާފައިއާއި ދެމީހުން ކާވެނި ޢަޤްދުކުރިތާ ހަމަސްފުރައި ވިހާފައިވާ ޝީން އަލް އަޒްލީމްއަކީ ނަން ފޮރުވާފައިގެ ކުއްޖެއް ނޫންކަމަށްބުނެ، ނަސަބު ނަފީކުރުމައްޓަކައި ލިޢާންކުރަން އެދޭކަމަށް ނަން ފޮރުވާފައި ހުށަހެޅި ނަމަވެސް، އިސްލާމީ ޝަރީޢަތުގައި ލިޢާނު ދެވެނީ ވަކި އުޞޫލުތަކެއްގެމަތިން އަދި ވަކި ޝަރްޠު ތަކެއް ފުރިހަމަވެގެންކަމަށްވެފައި އެއުޞޫލުތަކުގެ މަތިން، ޢާއިލާއާބެހޭ ޤަވާޢިދުގެ 82 ވަނަ މާއްދާގެ (ހ) ގައި ކުއްޖެއްގެ ނަސަބު ނަފީކުރަން ބޭނުންވަނީނަމަ، ކުއްޖާ ވިހޭ ތާރީޚުން ފެށިގެން 1 (އެކެއް) މަސް ދުވަސްތެރޭގައި ކޯޓަށް ހުށަހަޅަންވާނޭކަމަށް ބަޔާންކޮށްފައި އޮތް އިރު، ބުނެވިދިޔަ ކުއްޖާގެ ނަސަބު ނަފީކުރުމަށް، ބަޔާންވެ ދިޔަ މުއްދަތުގެ ތެރޭގައި ނަން ފޮރުވާފައި މައްސަލަ ހުށަހަޅާފައިނުވާކަން އެނގެން އޮތުމާއި، ޢާއިލާއާބެހޭ ޤަވާޢިދުގެ 82 ވަނަ މާއްދާގެ (ހ) ގައިވާ މުއްދަތު ފާއިތުވުމަށްފަހު، ކުއްޖާގެ ނަސަބު ނަފީކުރުމުގެ މައްސަލައެއް ކޯޓުން ބަލައިދެވޭނީ އެ ކުއްޖަކު ވިހާފައިވަނީ އެކުއްޖެއްގެ ނަސަބު ނަފީކުރެވޭ މީހާއާއެކު ކާވެނި ކުރިތާ 06 (ހައެއް) މަސްދުވަހުގެ ކުރިން ނުވަތަ ވަރިކުރިތާ 01 (އެކެއް) އަހަރު ފަހުންކަން އެނގޭ ލިޔުންތަކާއެކު ކޯޓަށް ހުށަހެޅުމުންކަމަށް ޢާއިލާއާބެހޭ ޤަވާޢިދުގެ 82 ވަނަ މާއްދާގެ (ށ) ގައި ބަޔާންކޮށްފައިއޮތް އޮތުމަށާއި މި މައްސަލައިގައި ހުށަހެޅިފައިވާ ލިޔެކިޔުންތަކަށާއި ޝީން އަލް އަޒްލީމް ވިހާފައިވަނީ ޝަޛުރާ އިބްރާހީމް އާއި ނަން ފޮރުވާފައިއާ ދެމީހުން ކައިވެނިކުރިތާ ހިޖުރީ ގޮތުން 06 (ހައެއް) މަހާއި 29 (އޮނަތިރީސް) ދުވަހުންކަން އެނގެން އޮތް އޮތުމުގެ މައްޗަށް ރިޢާޔަތްކުރާއިރު، މި މައްސަލައަކީ ޝަރްޢީ ހަމަތަކުގެމަތިން ލިޢާންކުރެވޭގޮތަށް އޮތް މައްސަލައެއް ނޫންކަން އެނގެން އޮންނައޮތުމެވެ.

ޙުކުމް

[9]އިސްވެ ބަޔާން ކުރެވުނު ސަބަބުތައް އެގޮތަށް ހުރުމުން، ފެމިލީ ކޯޓުގެ ނަންބަރު 290/Fm-C/2011 ޤަޟިއްޔާގައި ކޮށްފައިވާ ޙުކުމާއި ހައިކޯޓުގެ ނަންބަރ (MISL)95-CR/INDIV/2011/399 ނިންމުން ޝަރްޢީ އަދި ޤާނޫނީ ހަމަތަކާ ޚިލާފުކަމަށް ކަނޑައެޅޭނެ ތަނެއް ނެތްކަމަށް މި މައްސަލަ ބެލި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންނަށް އިއްތިފާޤުވެވުނު ހިނދު، ދިވެހިރާއްޖޭގެ ހައިކޯޓުގެ ނަންބަރު (MISL)95-CR/INDIV/2011/399 ނިންމުމަށާއި ފެމިލީ ކޯޓުގެ ނަންބަރު 290/Fm-C/2011 ޤަޟިއްޔާގެ ޙުކުމަށް ބަދަލު ގެންނަންޖެހޭނެ ތަނެއްނެތްކަމަށް ކަނޑައަޅައި ފެމިލީ ކޯޓުގެ ނަންބަރު 290/Fm-C/2011 ޤަޟިއްޔާގެ ޙުކުމަށް ތާއީދުކޮށް މައްސަލަ ނިންމީއެވެ.

އުއްތަމަ ފަނޑިޔާރު ޢަބްދުﷲ ސަޢީދު

ފަނޑިޔާރު ޢަލީ ޙަމީދު މުޙައްމަދު

ފަނޑިޔާރު އާދަމް މުޙައްމަދު ޢަބްދުﷲ