މެހޮގަނީ ޕވޓ ލޓޑ ވ. އިސްމާޢީލް ޖަނާޙް

ވަޒީފާއާބެހޭ ޤާނޫނުގެ ދަށުން ވަޒީފާގެ އެއްބަސްވުން ހެދިދާނީ ހަތަރު ބާވަތަކަށެވެ: ވަކި މުއްދަތެއް ކަނޑައެޅިފައިނުވާ (ދާއިމީ) އެއްބަސްވުން، ވަކި މުއްދަތެއް ކަނޑައެޅިފައިވާ (ވަގުތީ) އެއްބަސްވުން، ވަކި މަސައްކަތަކަށް ޚާއްޞަކޮށްފައިވާ އެއްބަސްވުން، އަދި އަހަރުގެ ވަކި ދުވަސްވަރެއްގައި އެކަނި ކުރަންޖެހޭ މަސައްކަތަކަށް ވެވޭ އެއްބަސްވުން؛ ފަހުގެ ދެ ބާވަތަކީ ވަޒީފާއާބެހޭ ޤާނޫނުގެ ބޭނުމަށް ދާއިމީ ވަޒީފާއެއް ނުވަތަ ވަގުތީ ވަޒީފާއެއް ކަމަށް ނުބެލެވޭ ވަޒީފާއެވެ. (ޕެރ. 7)

ވަގުތީ ވަޒީފާއެއްގެ އެއްބަސްވުން ހެދޭނީ ޤާނޫނުގައިވާ އެންމެ ގިނަ މުއްދަތަށެވެ؛ ލިޔުމުން ނުވަތަ ޢަމަލުކުރާ ގޮތުން އެ މުއްދަތަށްވުރެ އިތުރުކޮށްފިނަމަ ދާއިމީ ވަޒީފާއެއްކަމަށް ބަލަންޖެހެއެވެ؛ ވަކި މަސައްކަތަކަށް ޚާއްޞަކޮށްދޭ ވަޒީފާގެ މުއްދަތު އެ މުއްދަތަށްވުރެ އިތުރުވުން ޤާނޫނު މަނައެއް ނުކުރާއިރު، އެ މަސައްކަތް ނިމެންދެން ދެމިގެން ހިނގައިދާނެއެވެ. (ޕެރ. 8)

ވަގުތީ ވަޒީފާއަކަށް ވިޔަސް ވަކި މަސައްކަތަކަށް ޚާއްޞަކޮށްފައިވާ ވަޒީފާއަކަށް ވިޔަސް، އެއްބަސްވުމުގެ މަޤްޞަދު ނުވަތަ ނަތީޖާއަކީ ވަޒީފާ އަދާކުރާ ތަނުގައި އާދައިގެ މަތިން އަބަދުވެސް ކުރަންޖެހޭ މަސައްކަތް ދާއިމީ ގޮތެއްގައި ކުރުން ނަމަ، އެއީ ދާއިމީ ވަޒީފާއެއް ކަމުގައި ބަލަންޖެހެއެވެ. (ޕެރ. 8)

ވަކި މަސައްކަތަކަށް ޚާއްޞަކޮށްފައިވާ ވަޒީފާއެއް، އެ މަސައްކަތެއް ނިމުމާއެކު އެއްވެސް ނޯޓިހެއް ދިނުމަކާނުލައި ނިމުމަކަށް އަންނާނެއެވެ. (ޕެރ. 9، 13)

ވަކިމުއްދަތެއް ކަނޑައެޅިފައިވާ އެއްބަސްވުމެއް ދެ އަހަރަށްވުރެ އިތުރުވާ ގޮތަށް އާކޮށްފިނަމަ ނުވަތަ ދެފަރާތުގެ ޢަމަލުން އެގޮތަށް ދޭހަވާނަމަ ވަކިމުއްދަތެއް ކަނޑައެޅިފައިވާ އެއްބަސްވުމެއް ނޫންކަމަށް ބަލަންޖެހޭ ޤާނޫނީ ޙުކުމް، ވަކި މަސައްކަތަކަށް ޚާއްޞަކޮށްފައިވާ އެއްބަސްވުންތަކަށް ނުހިނގައެވެ؛ އެހެންނޫންނަމަ ވަކި މަސައްކަތަކަށް ޚާއްޞަ އެއްބަސްވުމެއް މަސައްކަތް ނިމުމުންވެސް ކުރިއަށް ދާނެކަމަށް ތަރުޖަމާވެ ޤާނޫނުގެ ދެ މާއްދާ ތަޢާރުޟުވާނެއެވެ. (ޕެރ. 10)

މުވައްޒަފަކަށް ދާއިމީ ވަޒީފާއެއް ދީފައިވާ ކަމަށް ބުނާ ލިޔުމެއް މުވައްޒަފުގެ އެދުމަށް (ބޭންކުގެ ބޭނުމަށް) ދޫކޮށްފައި އޮތުމަކުން، ވަޒީފާއަކީ ވަކި މަސައްކަތަކަށް ޚާއްޞަކޮށްފައިވާ ވަޒީފާއެއްކަމުގެ ޙަޤީޤަތް ބަދަލުވެގެން ނުދެއެވެ؛ ޙަޤީޤަތާ ޚިލާފަށް ލިޔުމެއް ދޫކުރުމަކީ ސީރިއަސް، ޤާނޫނުގެ ކުރިމަތީގައި ބަލައިނުގަނެވޭނެ ޢަމަލެއް ކަމަށާއި ކުންފުނިން ޒިންމާ އުފުލަންޖެހޭނެ ކަމެއް ކަމަށް ކޯޓުން ފާހަގަކުރިއެވެ. (ޕެރ. 11-12)

ވަކި މަސައްކަތަކަށް ޚާއްޞަ ވަޒީފާއެއްގައި ހުރި މުވައްޒަފަކު، ޕްރޮޖެކްޓް ނިމުނު ކަމަށް ބެލެވޭ ތާރީޚުގެ ފަހުން ވަޒީފާގައި ބަހައްޓާފައިވާނަމަ، ޕްރޮޖެކްޓް އެހިނދަށް ނުނިމޭ ކަމަށް ޤަބޫލުކުރަންޖެހޭތީ، ޢަދުލުވެރި ގޮތަކީ ޕްރޮޖެކްޓް ނިންމުމަށް ސަރުކާރުން ދީފައިވާ އެންމެ ފަހުގެ ތާރީޚާ ހަމައަށް މުސާރައާއި ޢިނާޔަތްތައް ލިބިދިނުމެވެ. (ޕެރ. 13)