—

އިސްތިއުނާފު ކުރުމުގެ ޙައްޤަކީ، ހަމަ ކޮންމެ މީހަކަށްމެ ލިބިދީފައިވާ ޙައްޤެއްކަން ޤާނޫނުއަސާސީގެ 56 ވަނަ މާއްދާއިން އެނގެން އޮންނައިރު، ޓެކްސް ނެގުމާބެހޭ އިދާރީ ޤާނޫނުގެ 47 ވަނަ މާއްދާގެ (ހ) ގެ ދަށުން ނުވަތަ އެމާއްދާގެ (ރ) ގެ ދަށުން ދައުލަތަށް ދައްކަންޖެހޭ ޓެކްސް ތިންވަނަ ފަރާތެއް މެދުވެރިކޮށް ހޯދުމަށް އެދި މީރާއިން ފޮނުވާ ނޯޓިސް އާއި އަދި އެ ނޯޓިސްއާ ގުޅޭގޮތުން އަޅާ އިދާރީ ނުވަތަ އެނޫންވެސް ފިޔަވަޅެއްގެ ސަބަބުން، އޭގެ އަސަރުކޮށްފާނެ ކޮންމެ ފަރާތަކަށްވެސް އެ ނޯޓިސް އިސްތިއުނާފުކުރުމަކީ އެފަރާތަކަށް ލިބިގެންވާ ޙައްޤެކެވެ. (ޕެރ. 03 (ރ))

ޓެކްސްއާ ގުޅޭގޮތުން މީރާއިން ނިންމި ނިންމުމަކާމެދު ނުވަތަ ކަނޑައެޅި ޢަދަދަކާމެދު އެ ނިންމުން ރައްދުވާ ފަރާތަކުން އިޢުތިރާޒުކުރާނަމަ، މީރާއިން އެ އެންގުން އެންގިތާ 30 ދުވަހުގެ ތެރޭގައި އިޢުތިރާޒުކުރާކަން ލިޔުމުން މީރާއަށް އަންގަންވާނެއެވެ. އެހުށަހެޅުމާ ގުޅިގެން މީރާއިން ނިންމި ނިންމުމާމެދުވެސް ހިތްހަމަނުޖެހޭނަމަ އެކަމެއް އިސްތިއުނާފުކުރުމަށް، މީރާއިން ގޮތް ނިންމިތާ 30 ދުވަހުގެ ތެރޭގައި ޓެކްސް އެޕީލް ޓްރައިބިއުނަލަށް ހުށަހެޅޭނެއެވެ. (ޕެރ. 03 (ރ))

މީރާގެ ނިންމުމާމެދު އިޢުތިރާޒުކޮށް އެ ނިންމުން ޓެކްސް އެޕީލް ޓްރައިބިއުނަލްގައި އިސްތިއުނާފުކުރުމުގެ ޙައްޤު އުފަންވަނީ، ޓެކްސްއާ ގުޅޭގޮތުން މީރާއިން ކަނޑައެޅި ޢަދަދު ޓެކްސް ދައްކަންޖެހިފައިވާ ފަރާތުން މީރާއަށް ދެއްކުމުންކަމާއި، އެ ޢަދަދު މީރާގެ ފަރާތުން ތިންވަނަ ފަރާތެއްގެ ބެލުމުގެ ދަށުގައި ހުރި ޓެކްސް ދައްކަންޖެހިފައިވާ ފަރާތުގެ ފައިސާއިން އުނިކޮށް ނެގުމުން ނޫންކަން 44 ވަނަ މާއްދާގެ ސާފު ޢިބާރާތުން އެނގެން އޮތުމުން، އެނިންމުން އިސްތިއުނާފުކުރުމަށް ޤާނޫނުގައި ކަނޑައެޅިފައިވާ މުއްދަތުގައި ޓެކްސް އެޕީލް ޓްރައިބިއުނަލަށް ހުށަހެޅުމުގެ ކުރިން އެ ޢަދަދެއް ދެއްކުމަކީ، ޓެކްސް ދައްކާ ފަރާތުގެ މައްޗަށް ލާޒިމުކުރާ ކަމެކެވެ. (ޕެރ. 03 (ރ))

މީރާއިން ނިންމި ނިންމުމަކާމެދު ނުވަތަ ކަނޑައެޅި ޢަދަދަކާމެދު 30 ދުވަހުގެ ތެރޭގައި ލިޔުމުން އިޢުތިރާޒުކޮށްފައި ނުވާނަމަ، ނުވަތަ އިޢުތިރާޒާ ގުޅިގެން މީރާއިން ނިންމި ނިންމުން 30 ދުވަހުގެ ތެރޭގައި ޓެކްސް އެޕީލް ޓްރައިބިއުނަލަށް ހުށަހަޅާފައި ނުވާނަމަ، އެކަމުގެ މައްޗަށް ތަރުތީބުވެގެންދާ ނަތީޖާއަކީ، އެނިންމުން ރައްދުވާ ފަރާތުން އެނިންމުން ޤަބޫލުކުރީކަމަށް ޤާނޫނީގޮތުން ބެލެވުން ކަމަށްވުމާއެކު، ތަޤާދުމުގެ އުޞޫލުން މީރާއިން ކަނޑައެޅި އެ ޢަދަދަކީ ނުވަތަ ޓެކްސް އެޕީލް ޓްރައިބިއުނަލުން ނިންމި ނިންމުމަކީ ޤާނޫނީ ގޮތުން ބަނދެވިގެންދާ ނިހާއީ ނިންމުމަކަށްވެގެން ދިއުމެވެ؛ އަދި އެ ނިންމުމާމެދު އެހެން މަރުޙަލާއެއްގައި މައުޟޫޢީގޮތުން ބަޙުޘްކުރެވި އިތުރު ބަދަލެއް ޝަރުޢީ ޤާނޫނީ ގޮތުން ނުގެނެވޭނެއެވެ. (ޕެރ. 03 (ރ))

ޤާނޫނުގައި ކަނޑައެޅިފައިވާ މުއްދަތުތައް ފާއިތުވުމަށް ފަހު އެމައްސަލައަކާ ގުޅިގެން މީރާގެ ފަރާތުން ފައިސާ ހޯދުމުގެ ނުވަތަ ތަންފީޒީ މަރުޙަލާގައި މައުޟޫޢީގޮތުން ބަޙުޘް ކުރެވުމަކީ، ޓެކްސް ނެގުމާބެހޭ އިދާރީ ޤާނޫނުގެ 42 ވަނަ މާއްދާއާއި 44 ވަނަ މާއްދާގައި އިސްތިއުނާފުކުރުމަށް ދީފައިވާ 30 ދުވަހުގެ މުއްދަތުގެ ބޭނުމާއި މަޤްޞަދު ގެއްލި އެ މާއްދާތަކުގެ ޤާނޫނީ ބާރު ގެއްލިގެންދާނެ ކަމެކެވެ. (ޕެރ. 03 (ރ))

44 ވަނަ މާއްދާގައި ބަޔާންކޮށްފައިވާ ގޮތުގެމަތިން މީރާގެ އިޢުތިރާޒު ބެލުމުގެ ނިންމުން އިސްތިއުނާފުކުރުމުގެ ޙައްޤު އުފަންކޮށް ޓެކްސް އެޕީލް ޓްރައިބިއުނަލްގައި އިސްތިއުނާފުކޮށްފައިނުވާއިރު، އެ ނިންމުމާމެދު ފަހުން ހުށަހެޅޭ މައްސަލައެއްގައި މައުޟޫޢީގޮތުން ޓެކސް އެޕީލް ޓްރައިބިއުނަލްގައި ވާހަކަ ދެކެވި އެނިންމުމަށް ބަދަލު ގެނެސްފައިވުމަކީ، 42 ވަނަ މާއްދާއާއި 44 ވަނަ މާއްދާގައި އިސްތިއުނާފު ކުރުމަށް ދީފައިވާ 30 ދުވަހުގެ މުއްދަތުގެ މަފްހޫމް ގެއްލި އެ މާއްދާތަކުގެ ބޭނުން ނެތިދިޔުން ކަމުގައި ޤާނޫނީގޮތުން ބަލަންޖެހޭތީ، ޓެކްސް އެޕީލް ޓްރައިބިއުނަލްގެ އެނިންމުމަކީ ޤާނޫނީގޮތުން ބާޠިލު ނިންމުމެކެވެ. (ޕެރ. 03 (ބ))