އާމިނަތު ނާސިޔާ ވ. ސްޓޭޓް ޓްރޭޑިންގ އޯގަނައިޒޭޝަން ޕލކ

ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 21 އަދި 28 ވަނަ މާއްދާއަށް ބެލުމުން، މުވައްޒަފަކު ވަޒީފާއިން ވަކިކުރެވޭނީ އެކަށީގެންވާ ސަބަބެއް އޮވެގެންނެވެ. (ޕެރ. 3(ހ))

މުވައްޒަފަކު ވަޒީފާއިން ވަކިކުރުމާ ގުޅިގެން، އެ މުވައްޒަފަކު ހުށަހަޅާ ޝަކުވާއެއް ނުވަތަ ދަޢުވާއެއްގައި، އޭނާ ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށް ދިނުމަކީ، ވަޒީފާއާބެހޭ ޤާނޫނުގެ 29 ވަނަ މާއްދާގައި ބަޔާންކޮށްފައިވާ ޙާލަތްތައް ފިޔަވައި، އެހެނިހެން ޙާލަތްތަކުގައި ވަޒީފާދޭ ފަރާތުގެ ޒިންމާއެއްކަން ވަޒީފާއާބެހޭ ޤާނޫނުގެ 27 ވަނަ މާއްދާގައި ބަޔާންވެގެންވެއެވެ. (ޕެރ. 3(ހ))

ވިހެއުމާ ގުޅިގެން ލިބޭ ޗުއްޓީ ހަމަވުމުން، އެ ޗުއްޓީ ނެގުމުގެ ކުރިން އަދާކުރަމުން އައި ވަޒީފާއަށް އަނބުރާ އައުމުގެ ޙައްޤު، މަސައްކަތްކުރާ ތަނުގެ އިޤްތިޞާދީ، ނުވަތަ ފަންނީ، ނުވަތަ އިންތިޒާމީ ސަބަބަކާހުރެ، އެ ވަޒީފާ ނެތިއްޖެނަމަ ލިބިގެންނުވާކަން ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 44 ވަނަ މާއްދާގެ (ހ) ގެ 1 ވަނަ ނަންބަރަށް ބެލުމުން އެނގެން އޮވެއެވެ. (ޕެރ. 3(ނ))

ޢާންމު އުޞޫލެއްގެ ގޮތުން، މުވައްޒަފަކު ވަޒީފާއިން ވަކިކުރުމުގައި ޤާއިމުކުރަންޖެހޭ މައުޟޫޢީ ޢަދުލުވެރިކަމަކީ، މުވައްޒަފަކު ވަޒީފާއިން ވަކިކުރެވުނު ސަބަބަކީ ޢަދުލުވެރި ނުވަތަ އެކަށީގެންވާ ސަބަބެއްކަމަށް ވުމެވެ. (ޕެރ. 3(ރ))

ވަޒީފާއާބެހޭ ޤާނޫނުގައިވެސް އަދި އެ ޤާނޫނުގެ ދަށުން ހެދިފައިވާ ޤަވާޢިދެއްގައިވެސް ރިޑަންޑަންސީއާ ގުޅޭގޮތުން ވަކި އުޞޫލެއް ޤާއިމުކޮށްފައި ނުވިނަމަވެސް، ވިޔަފާރީގެ ނަފާ ހޯދުމަށް ހިންގޭ ކުންފުނިތައް ރީސްޓްރަކްޗަރ ކުރުމަށް ނުވަތަ ކުންފުނީގެ މާލީ ޙާލަތު ދަށްވުންފަދަ ކަމެއް މެދުވެރިވެގެން ކުންފުނީގެ މުވައްޒަފަކު ދޫކޮށްލަންޖެހިއްޖެނަމަ ނުވަތަ މަދުކުރަންޖެހިއްޖެނަމަ، އެފަދަ ޙާލަތުގައި މުވައްޒަފަކު ނުވަތަ މުވައްޒަފުންތަކެއް ވަޒީފާއިން ވަކިކުރާ ވަކިކުރުމަކީ، މުވައްޒަފަކު ވަޒީފާއިން ވަކިކުރުމަށް އޮތް އެކަށީގެންވާ ސަބަބެއް ކަމުގައި ބެލެވިދާނެއެވެ. (ޕެރ. 3(ރ))

ރިޑަންޑަންސީގެ ސަބަބަށްޓަކައި މުވައްޒަފަކު ވަޒީފާއިން ވަކިކުރާ ކުރުމުގައި ޙަޤީޤަތުގައިވެސް އެފަދަ ޙާލަތެއް މެދުވެރިވެފައިވޭތޯއާއި، އެކަން ކޮށްފައިވަނީ ހެޔޮނިޔަތުގައިތޯއާއި، އަދި އެއީ ވަކި މުވައްޒަފަކު ނުވަތަ މުވައްޒަފުންތަކެއް ކަނޑައެޅިގެން ބޭއިންސާފުން ވަޒީފާއިން ވަކިކުރުމަށްޓަކައި ކޮށްފައިވާކަމެއްތޯ ނުވަތަ ނޫންތޯއާއި، އަދި ވަޒީފާއިން ވަކިކުރާނެ މުވައްޒަފުން ކަނޑައެޅުނުގޮތަކާއި، އެ މުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަމާއި (substantive fairness) އިޖްރާއީ ޢަދުލުވެރިކަން (procedural fairness) ޤާއިމުކޮށްފައިވޭތޯ ބަލާ އެކަންކަން ކަށަވަރުވާން ޖެހޭނެއެވެ. (ޕެރ. 3(ރ))

ވަޒީފާއިން ވަކިކުރާ ކުރުމުގައި މައުޟޫޢީ ޢަދުލުވެރިކަން ޤާއިމުވެފައިވާނަމަ، އެ ވަކިކުރާ ކުރުމުގައި އިޖްރާއީ ޢަދުލުވެރިކަން ފުރިހަމައަށް ޤާއިމުވެފައިނުވިނަމަވެސް، އެފަދަ މީހަކު އަނބުރާ ވަޒީފާއަށް އިޢާދަކުރުން ލާޒިމެއް ނޫނެވެ. އެ ޙާލަތުގައި އެފަދަ މީހަކަށް ދޭންޖެހޭނީ އެކަށީގެންވާ މާލީ ބަދަލެކެވެ. (ޕެރ. 3(ޅ))

މިފަދަ މައްސަލަތަކުގައި މާލީ ބަދަލު ނެގުމުގައި ބަލަންޖެހޭ މިންގަނޑުތައް 2012/HC-A/184 ޤަޟިއްޔާގައި ކަނޑައަޅުއްވާފައިވާއިރު، މުވައްޒަފަށް ލިބެމުންދިޔަ މުސާރައަށާއި، ވަޒީފާ އަދާކުރި މުއްދަތަށާއި، ވަޒީފާއާބެހޭ ޤާނޫނުގެ 22 ވަނަ މާއްދާގެ (ހ) ގެ (2) ވަނަ ނަންބަރުގެ ދަށުން ދޭންޖެހޭ ނޯޓިސްގެ ބަދަލުގައި އެ ޤާނޫނުގެ 25 ވަނަ މާއްދާގެ ދަށުން ފައިސާ ދީ ވަކިކުރެވުނުނަމަ ޙައްޤުވާނެ މިންވަރަށް ބަލައި ކަނޑައަޅާ މާލީ ބަދަލަކީ ޢަދުލުވެރިނޫން ބަދަލެއްކަމުގައި ބެލެވެން ނެތެވެ. (ޕެރ. 3(ކ))