މީޑިއާ ރިންގް ޕވޓ ލޓޑ ވ. ޒައިދު ޢަބްދުﷲ

ވަޒީފާއާބެހޭ ޤާނޫނުގެ 27 ވަނަ މާއްދާގެ ދަށުން، މުވައްޒަފަކު ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށްދިނުމަކީ ވަޒީފާދޭ ފަރާތުގެ ޒިންމާއެއް ކަމާއި، އެކަން ސާބިތުނުކުރެވިއްޖެނަމަ ވަކިކުރީ އެކަށީގެންވާ ސަބަބެއް ނެތި ކަމުގައި ބެލެވޭނެއެވެ. (ޕެރ. 04)

ވަޒީފާއާބެހޭ ޤާނޫނުގައި ރިޑަންޑަންސީއާ ގުޅޭ އުޞޫލެއް ބަޔާންކޮށްފައި ނުވިޔަސް، ވިޔަފާރީގެ ނަފާއަށް ހިންގާ ކުންފުނިތަކުގައި ރީސްޓްރަކްޗަރކުރުން ފަދަ ކަމަކަށްޓަކައި މުވައްޒަފުން ދޫކޮށްލަންޖެހޭ ރިޑަންޑަންސީގެ ޙާލަތަކީ މުވައްޒަފަކު ވަޒީފާއިން ވަކިކުރުމަށް އެކަށީގެންވާ ސަބަބެއް ކަމަށް ހައިކޯޓުން ޤާއިމުކޮށްފައިވާ އުޞޫލު މި ނިޒާމުގައި އިސްތިޤްރާރުވެފައިވެއެވެ. (ޕެރ. 05)

ރިޑަންޑަންސީގެ ސަބަބުން ވަކިކުރުމުގެ މައްސަލައެއްގައި، ޙަޤީޤަތުގައިވެސް އެފަދަ ޙާލަތެއް މެދުވެރިވެފައިވޭތޯއާއި، ހެޔޮނިޔަތުގައި ކޮށްފައިވޭތޯއާއި، ވަކި މުވައްޒަފުން ކަނޑައެޅިގެން ބޭއިންސާފުން ވަކިކުރުމަށް ކޮށްފައިވޭތޯއާއި، މުވައްޒަފުން ކަނޑައެޅުނު ގޮތާއި މައުޟޫޢީ އަދި އިޖުރާއީ ޢަދުލުވެރިކަން ގާއިމުވެފައިވޭތޯ ކަށަވަރުކުރަންވާނެއެވެ. މައުޟޫޢީ ޢަދުލުވެރިކަން ސާބިތުނުވާނަމަ އިޖުރާއީ ޢަދުލުވެރިކަން ބަލަން ނުޖެހޭނެއެވެ. (ޕެރ. 06، 09)

ރިޑަންޑަންސީގައި މައުޟޫޢީ ޢަދުލުވެރިކަން ގާއިމުވީ ކަމަށް ބެލެވޭނީ ނިންމުމަކީ ހެޔޮނިޔަތުގައި އެކަށީގެންވާ ސަބަބަކާ ހުރެ ނިންމި ނިންމުމެއް ނަމައެވެ. އިޖުރާއީ ޢަދުލުވެރިކަން ގާއިމުވީ ކަމަށް ބެލެވޭނީ ރިޑަންޑަންޓް ކުރަންޖެހިފައިވާކަމާއި ޢަމަލުކުރާނެ އިޖުރާއަތާއި އުޞޫލުތައް މުވައްޒަފުންނަށް ކުރިން އަންގާފައިވުމާއި، 22 ވަނަ މާއްދާގެ ނޯޓިސް ނުވަތަ 25 ވަނަ މާއްދާގެ ދަށުން ނޯޓިސްގެ ބަދަލު ދީފައިވުމާއި، ޚާއްޞަ އިނާޔަތްތަކެއް ދޭނަމަ އެ މިންގަނޑުތައް ކުރިން ކަނޑައަޅައި އަންގާފައިވާނަމައެވެ. (ޕެރ. 07)

ވަޒީފާއިން ވަކިކުރުމަށްފަހު ކުންފުންޏަށް ލިބުނު ސިޓީތަކަކީ، ބޯޑުން ނިންމުމުގެ ކުރިން ވަޒަންކުރެވުނު ސިޓީތަކެއް ނޫންކަމުން، އެ ސިޓީތަކުން ރިޑަންޑަންސީގެ ޙަޤީޤީ ޙާލަތެއް އޮތްކަން ދަލީލުކޮށް ނުދޭނެއެވެ. މާލީ ޙާލަތު ދަށްވި ސަބަބު ބޯޑުގެ ނިންމުމުގައި ބަޔާންކޮށްފައި ނުވާނަމަ މައުޟޫޢީ ޢަދުލުވެރިކަން ސާބިތު ނުވެއެވެ. (ޕެރ. 08)

ވަޒީފާއާބެހޭ ޤާނޫނުގެ 13 ވަނަ މާއްދާގެ (ކ) ގެ ދަށުން، ވަކި މުއްދަތެއްގެ ވަޒީފާ އެއްބަސްވުމެއް ޖުމްލަ މުއްދަތު ދެ އަހަރަށްވުރެ އިތުރުވާ ގޮތަށް އާކޮށްފިނަމަ އެއީ ވަކި މުއްދަތެއް ކަނޑައެޅިފައިވާ އެއްބަސްވުމެއް ނޫން ކަމުގައި ބަލަންޖެހޭތީ، އެފަދަ މުވައްޒަފަކު ނުޙައްޤުން ވަކިކުރެވިފައިވާނަމަ ވަޒީފާއަށް ރުޖޫޢުކުރުމަށް ނިންމުމަކީ ރަނގަޅު ނިންމުމެކެވެ. (ޕެރ. 10)

ނުޙައްޤުން ވަކިކުރެވުމުން މުވައްޒަފު އެހެން ވަޒީފާއެއް އަދާކުރަމުން ދާނަމަ، ކުރީގެ ވަޒީފާގެ މުސާރައާއި ލިބެމުންދާ މުސާރައާ ދެމެދުގެ ތަފާތު ލިބޭގޮތަށް ބަދަލު ހިސާބުކުރުމަކީ ޢަދުލުވެރި ހަމައެކެވެ. (ޕެރ. 11)

ޓްރައިބިއުނަލުގައި ޖަވާބާއި ބަޔާން ހުށަހަޅައި ހެކި ހުށަހެޅުމުގެ ފުރުޞަތު ލިބިފައިވާ ފަރާތަކުން ޚުލާޞާ އަޑުއެހުމަށް ޙާޟިރުނުވެ އެ ފުރުޞަތު ގެއްލުނުނަމަ، ފުރުޞަތު ނުދިން ކަމަށް ބުނެ އިސްތިއުނާފުގައި ޝަކުވާކުރެވޭނެ ހަމައެއް ނެތެވެ؛ ޓްރައިބިއުނަލުން ކުރި މަސައްކަތްތަކާމެދު އިސްތިއުނާފީ ނުކުތާތަކުގައި ސުވާލު އުފައްދާފައި ނުވާނަމަ އެ މަސައްކަތްތައް ކޮށްފައިވާ ކަމަށް ބަލަންޖެހޭނެއެވެ. (ޕެރ. 12)