އިބްރާހީމް ޚާލިދު ވ. ޖުޑީޝަލް ސަރވިސް ކޮމިޝަން

މުވައްޒަފަކު ވަޒީފާއިން ވަކިކުރަންޖެހޭނީ އެކަށީގެންވާ ސަބަބެއް އޮވެގެން ކަމާއި، ވަކިކުރި ސަބަބު ސާބިތުކޮށްދިނުން އެކަނި ނުފުދި އެއީ އެކަށީގެންވާ ސަބަބެއްކަން ސާބިތުކޮށްދިނުމަކީ ވަޒީފާދޭ ފަރާތުގެ ޒިންމާއެއްކަން ވަޒީފާއާބެހޭ ޤާނޫނުގެ 27 ވަނަ މާއްދާއިން އެނގެއެވެ. (ފަނޑިޔާރު ޝުޢައިބު ޙުސައިން ޒަކަރިއްޔާ އަދި ފަނޑިޔާރު ޢަބުދުއްރައޫފް އިބްރާހީމްގެ ރައުޔު)

ރިޑަންޑަންސީއަކީ ވަޒީފާއާބެހޭ ޤާނޫނުގެ 21 އަދި 23 ވަނަ މާއްދާގައި ބަޔާންކޮށްފައިވާ ޙާލަތެއް ނޫންނަމަވެސް، ޙަޤީޤީ ރިޑަންޑަންސީއަކީ މުވައްޒަފަކު ވަޒީފާއިން ވަކިކުރުމަށް އެކަށީގެންވާ ސަބަބެކެވެ. ނަމަވެސް ޙަޤީޤަތުގައި އެފަދަ ޙާލަތެއް މެދުވެރިވެފައިވޭތޯ، ހެޔޮ ނިޔަތުގައި ކޮށްފައިވޭތޯ، ވަކި މުވައްޒަފުން ބޭއިންސާފުން ވަކިކުރުމަށް ކޮށްފައިވޭތޯ، އަދި މައުޟޫޢީ އަދި އިޖުރާއީ ޢަދުލުވެރިކަން ޤާއިމްކޮށްފައިވޭތޯ ކަށަވަރުކުރަން ޖެހެއެވެ. (2011/HC-A/89 ގެ މައްޗަށް ބިނާކޮށް)

ރިޑަންޑަންސީގައި އިޖުރާއީ ޢަދުލުވެރިކަން ޤާއިމުވެފައިވާކަމަށް ބެލެވޭނީ، މުވައްޒަފުން ރިޑަންޑަންޓްކުރަންޖެހޭކަމާއި ޢަމަލުކުރާނެ އިޖުރާއާތާއި އުޞޫލުތައް ކުރިން އަންގާ، ވަޒީފާއާބެހޭ ޤާނޫނުގެ 22 ވަނަ މާއްދާގެ ނޯޓިސް ނުވަތަ 25 ވަނަ މާއްދާގެ ދަށުން ނޯޓިސްގެ ބަދަލުގައި ފައިސާ ދީ، ޚާއްޞަ ޢިނާޔަތްތަކެއް ވާނަމަ އޭގެ މިންގަނޑުތައް ކުރިން ކަނޑައަޅާ އަންގާފައިވާނަމައެވެ. (2011/HC-A/180 ގެ މައްޗަށް ބިނާކޮށް)

ޝަރުޢީ ދާއިރާގެ މުވައްޒަފުންގެ ގަވާއިދުގެ 96 ވަނަ މާއްދާގެ (ށ) ގައިވާ ޙާލަތަކީ ރިޑަންޑަންސީގެ ޙަޤީޤީ ޙާލަތަކަށް ވާންޖެހޭނެ ކަމާއި، އެއީ ވަކި މުވައްޒަފުން ވަކިކުރުމަށް އަމާޒުކޮށް ކުރެވޭ ކަމަކަށް ނުވާންޖެހޭނެއެވެ. އަދި އެ މާއްދާގެ ދަށުން މުވައްޒަފަކު ދޫކޮށްލެވޭނީ އެހެން ކޯޓަކުން ނުވަތަ ޝަރުޢީ ދާއިރާގެ އިދާރާއަކުން އެކަށޭނަ ވަޒީފާއެއް ހޯދައިދިނުމަށް އެކަށީގެންވާ މަސައްކަތެއް ކުރުމަށްފަހުވެސް ނުދެވިއްޖެނަމައެވެ.

ސުޕްރީމް ކޯޓާއި ހައިކޯޓާއި ހުޅުމާލެ މެޖިސްޓްރޭޓް ކޯޓަށް އެކަނި ސިޓީ ފޮނުވުމަކީ، އެހެން ކޯޓުތަކާއި އިދާރާތައް ހުރިއިރު، 96 ވަނަ މާއްދާގެ (ށ) ގައިވާ "އެކަށީގެންވާ މަސައްކަތެއް" ކަމަށް ނުބެލެވެއެވެ.

ޝަރުޢީ ދާއިރާގެ މުވައްޒަފުން ހަމަޖެއްސުމާއި ބަދަލުކުރުމާއި ވަކިކުރުމުގެ ކަންތައްތައް ކުރަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން ކަމުން (ގަވާއިދުގެ 65 ވަނަ މާއްދާ)، ސުޕްރީމް ކޯޓުގެ ދަށުގައި ހިނގާ ޖުޑީޝަލް އެކަޑަމީއަކީ ޑިޕާޓްމަންޓާ ވަކިން މުސްތަޤިއްލު ތަނެއް ކަމަށް ބަލައި، ވަކިކުރާ މުވައްޒަފުން އެތަނަށް ބަދަލުނުކުރެވޭނެ ކަމަށް ދައުލަތުން ބުނާ ވާހަކައަށް ޤާނޫނީ ބުރަދަނެއް ނެތެވެ.

ރިޑަންޑަންސީގެ ދަށުން މުވައްޒަފުން ވަކިކުރަންޖެހޭ ނަމަ ޤާނޫނުގައި އިޖުރާއާތު ކަނޑައަޅާފައި ނެތްނަމަވެސް އެކަން ކުރަންޖެހޭނީ އެކަށީގެންވާ ޢަދުލުވެރި (just and fair) ގޮތަކަށެވެ. ޙަޤީޤީ ރިޑަންޑަންސީއެއްތޯ، މުވައްޒަފުންނާ މަޝްވަރާކޮށްފައިވޭތޯ، އަލުން ވަޒީފާ ދިނުމަށް މަސައްކަތްކޮށްފައިވޭތޯ، އަދި ވަކިކުރާ މުވައްޒަފުން ޚިޔާރުކުރި ގޮތް (redundancy selection pool) އެކަށީގެންވޭތޯ ބެލެވިދާނެއެވެ. (ފަނޑިޔާރު މުޙައްމަދު ނިޔާޒްގެ ރައުޔު)

ބޭއިންސާފުން ވަޒީފާއިން ވަކިކުރެވިއްޖެނަމަ، މުވައްޒަފު ކުރިން ހުރި ވަޒީފާގައި ނުވަތަ އެކަށީގެންވާ އެހެން ވަޒީފާއެއްގައި ބަހައްޓަންޖެހޭނެ ކަމާއި، ވަކިކުރި ދުވަހުން ފެށިގެން އަލުން ވަޒީފާއަށް ނެރޭ ދުވަހާ ހަމައަށް މުސާރައާއި ޢިނާޔަތްތައް، އެ މުއްދަތުގައި އެހެން ވަޒީފާއެއް އަދާކޮށްފައިވާ މުއްދަތާއި ދީފައިވާ އެއްފަހަރާ ޢިނާޔަތް އުނިކުރުމަށްފަހު ދޭންޖެހޭނެއެވެ.