—

ޝަރީޢަތަށް ހުށަހެޅޭ މައްސަލަތަކުގައި މައްސަލައިގެ ބާވަތުން އެމައްސަލައެއްގައި ސާފުކުރަންޖެހޭ ކަންކަން ސާފުކުރުމާއި، މައްސަލައިގައި ސުވާލުކުރަންޖެހޭކަމަށް ޝަރީޢަތަށް ފެންނަ ފަރާތްތައް ޝަރީޢަތަށް ޙާޟިރުކޮށް ސުވާލުކުރުމުގެ ބާރަކީ ފަނޑިޔާރުންނަށް ލިބި އޮންނަ ބާރެކެވެ. (ޕެރ. 3(ހ))

ބެލުން ޝަރުތުކުރުމުގެ އެއްބަސްވުމެއް ތަންފީޛުކުރުމުގެ ގޮތުން ހުށަހެޅޭ މައްސަލައެއްގައި، ބެލުން ޝަރުތުކުރުމުގެ އެއްބަސްވުމުގެ ދަށުން ބެލެވުނު ފަރާތުގެ ޢާއިލީ ގޮތުން އެންމެ ގާތް ފަރާތްތަކެއްގެ ގޮތުގައި ދުނިޔޭގައި ތިބި ފަރާތްތަކެއްގެ ބަސް ހޯދުމަކީ އިންސާފު ޤާއިމުކުރުމަށްޓަކައި މަސްލަޙަތު ހުރި ގޮތެއް ކަމުން، މައްސަލަ ނިންމުމުގެ ކުރިން އެފަދަ ފަރާތްތަކެއް ބުނާ ބަސް ޝަރީޢަތުން ދެނެގަތުމަކީ ޢަމަލުކުރަންޖެހޭ އިޖުރާއާތުތަކާއި ޚިލާފަށް ކުރި ކަމެއްކަމުގައި ބެލެވެން ނެތެވެ. (ޕެރ. 3(ހ))

ޤާނޫނު ނަންބަރު 4/91 (ކޮންޓްރެކްޓާބެހޭ ޤާނޫނު) ގެ 22 ވަނަ މާއްދާގެ (ހ) ގެ ދަށުން ޢަމަލުކުރެވެން ނެތް ކޮންޓްރެކްޓެއްކަމަށްވާނީ، ކޮންޓްރެކްޓެއްގެ ބައިވެރިންގެ މައްޗަށް ލާޒިމްކުރާކަމަކީ އެއްބަސްވި ގޮތަށް އެކަން ވެވެން ނެތް ކަމަކަށްވުމުންނެވެ. (ޕެރ. 3(ރ))

ބެލުން ޝަރުތުކޮށްދިނުމަށް ދެފަރާތުގެ ދެމެދުގައި ވެފައިވާ އެއްބަސްވުމާއި، އޭގެ ފަހުން ދެފަރާތުގެ ދެމެދުގައި ވެފައިވާ ވިއްކުމުގެ މުޢާމަލާތަކީ ދެ އެއްބަސްވުމެއްގެ ދަށުން ވެފައިވާ ވަކި ދެ މުޢާމަލާތެއް ކަމުން، ވިއްކުމުގެ އެއްބަސްވުމުގެ ދަށުން ގޯތީގައިވާ ޢިމާރާތްތަކާއި ވަޅުފަދަ ތަންތަން އެއްކޮށް ވިއްކުމަށް އެއްބަސްވެފައި ނުވާނަމަ، ބެލުން ޝަރުތުކުރުމުގެ އެއްބަސްވުމުގެ މަޙައްލު އެޙާލަތުގައިވެސް ދެމިއޮތް ކަމުގައި ބަލަންޖެހޭނެއެވެ. (ޕެރ. 3(ރ))

ބެލުން ޝަރުތުކުރުމުގެ އެގްރީމެންޓުގެ ދަށުން ދިނުމަށް ނިންމާފައިވާ ނިސްބަތަކީ ޢިމާރާތް ހުރި ބިމުން ވަކިތަނެއް ޢައްޔަންކޮށްވެފައިވާ އެއްބަސްވުމެއް ނޫންނަމަ، ބަލަންޖެހޭނީ ބެލެވުނު ފަރާތް ނިޔާވިއިރު އޭނާގެ މިލްކުގައި އެ ގޯތިން އެއްވެސް ބައެއް އޮތްކަން ނުވަތަ ނޫންކަމެވެ؛ އަދި އެގްރީމެންޓުގެ ދަށުން ލިބެންޖެހޭ ނިސްބަތް ކަނޑައަޅާނީ ބެލެވުނު ފަރާތް ނިޔާވިއިރު، އޭނާގެ ނަމުގައި ރަޖިސްޓްރީ އޮތް ބައިގެ ނިސްބަތުންނެވެ. (ޕެރ. 3(ރ))

ބެލުން ޝަރުތުކޮށްދިނުމުގެ އެގްރީމެންޓާއި ވިއްކުމުގެ މުޢާމަލާތަކީ ވަކި ދެ މުޢާމަލާތެއްކަމަށްވާއިރު، މި ދެ މުޢާމަލާތަކީވެސް ވަކި ވަކިން ތަންފީޛުކުރެވެން އޮތް ދެ މުޢާމަލާތެވެ. (ޕެރ. 3(ބ))

ބެލުން ޝަރުތުކުރުމުގެ އެއްބަސްވުން ރޫޅާލަން ބެލެވުނު ފަރާތުގެ ދުނިޔޭގައި އޭނާ އެއްވެސް މަސައްކަތެއްކޮށްފައިވާކަން ނުވަތަ ޝަރީޢަތަށް ހުށަހަޅާފައިވާކަން އެނގެން ނެތްނަމަ، ދެފަރާތުން ފަހުން ޢަމަލުކުރި ގޮތެއްގެ ސަބަބުން ކުރިން ދެފަރާތުގެ ދެމެދުގައިވެފައިވާ ބެލުން ޝަރުތުކޮށްދިނުމުގެ އެއްބަސްވުމަށް ޢަމަލުނުކުރުމަށް ދެފަރާތުން ނިންމީ ކަމުގައި ބެލުމުގެ އަސާސެއް ނެތެވެ. (ޕެރ. 3(ބ))

ބެލުން ޝަރުތުކޮށްދިނުމުގެ އެގްރީމެންޓްތަކަކީ ޞައްޙަ މަގުން ކުރެވިފައިވާ އަދި އެއާއި އެއްގޮތަށް ޢަމަލުކުރެވިފައިވާ އެއްބަސްވުންތަކެއް ކަމުގައިވާނަމަ، އެފަދަ އެއްބަސްވުމަކީ ތަންފީޛުކުރެވޭ އެއްބަސްވުމެކެވެ. (ޕެރ. 3(ޅ))