—

ޝަރުޢީ ކޯޓުތަކުގެ ޝަރީޢަތުގެ މަޖިލިސްތަކުގައި މައްސަލައަކާ ގުޅިގެން ހެކިބަސްނެގެނީ، ހެކިބަސްދޭ ފަރާތަކީ އިސްލާމީ ޝަރީޢަތުގައި ހެކިބަސްދޭ ފަރާތެއްގެ ކިބައިގައި ހުރުން ލާޒިމް ޝަރުޠުތައް ހަމަވާ، އަދި ހެކިބަސް ނެގުމުގެ ކުރިން، އެހެކިވެރިޔަކާ ކުރެވޭ ސުވާލަށް ތެދުބަހުން ޖަވާބުދީ، ދޮގެއް ނުބުނުމަށް މާތްﷲ ގަންދީ ހުވާކުރުމަށްފަހުގައެވެ. (ޕެރ. 3(ނ))

ބުއްދި ސަލާމަތުން ހުރި، ބާލިޣްވެފައިވާ، އަދި ހެކިވެރިންގެ ޢަދުލުވެރިކަން ގެއްލޭފަދަ ކުށެއް މައްޗަށް ސާބިތުވެފައިނުވާ ހެކިވެރިން، ވަޒީފާގެ މަސްއޫލިއްޔަތު އަދާކުރުމުގެ ގޮތުން ކުރާ މަސައްކަތަކާ ގުޅޭގޮތުން ޝަރީޢަތުގެ މަޖިލީހުގައި ދޭ ހެކިބަހަކީ، ލާބައެއް ލިބިދާނޭކަމުގެ އުއްމީދެއް ނެތި، ގެއްލުމެއް ވެދާނެކަމުގެ ބިރެއްވެސް ނެތި ހަމައެކަނި މާތްﷲގެ ވަޖުހުފުޅަށްޓަކައި ދީފާނޭ ހެކިބަހެއްކަމާމެދު ޝައްކު އުފެދޭފަދަ ޙާލަތެއް އޮތްކަމަށް ޝަރީޢަތުން ބަލަންޖެހޭ ޝަރުޢީ ޤާނޫނީ ހަމައެއް ނެތެވެ. (ޕެރ. 3(ނ))

ޙައްދުގެ މައްސަލަތަކާއި ޤިޞާޞްގެ މައްސަލަތައް ފިޔަވައި ޖިނާއީ މައްސަލަތަކުގައި ކުށް ސާބިތުވާ މިންގަނޑަކީ، ޤާނޫނުއަސާސީގެ 51 ވަނަ މާއްދާގެ (އ) ގައިވާ އެކަށީގެންވާ ޝައްކެތްނެތް މިންވަރެވެ. ހުށަހަޅާ ހެކި ޤަރީނާތަކުގެ މައްޗަށް ބަލައި އެކަށީގެންވާ ޝައްކެއްނެތް މިންވަރު ވަޒަންކުރުމުގެ ބާރު ލިބި އޮންނަނީ މައްސަލަ ބައްލަވާ ފަނޑިޔާރަށެވެ. (ޕެރ. 3(ބ))

ކުށުގެ މައްސަލައެއް ސާބިތުކުރުމުގައި އިސްލާމީ ޝަރީޢަތުގައި ވަކިބާވަތެއްގެ ނުވަތަ ވަކި މިންވަރެއްގެ ހެއްކެއް ހުރުން ލާޒިމްކުރާ ބާވަތުގެ ކުށްތައް ފިޔަވައި އެހެނިހެން ކުށްތައް ސާބިތުކުރުމުގައި ވަކި ބާވަތެއްގެ ނުވަތަ ވަކި މިންވަރެއްގެ ހެކި ހުރުން ލާޒިމްކޮށްފައެއް ނުވެއެވެ. ކުޑަކުދިންނާމެދު ޖިންސީ ޢަމަލުތައް ހިންގުމުގެ ކުށަކީ ތައުޒީރީ އަދަބެއް ކަނޑައެޅިފައިވާ ކުށެއްކަމުގައިވާއިރު، މިކުށް ސާބިތުކުރުމަށް ވަކި މިންވަރެއްގެ ނުވަތަ ވަކި ބާވަތެއްގެ ހެކި ހުރުން އިސްލާމީ ޝަރީޢަތުގައި ލާޒިމްކޮށްފައެއް ނުވެއެވެ. (ޕެރ. 3(ބ))

ކުޑަކުދިންނަށް ކުރާ ޖިންސީގޯނާގެ މައްސަލަތައް ޝަރީޢަތުން ބެލުމުގައި ހަމައެކަނި ބަލައިގަންނަން ޖެހޭނީ ޤާނޫނު ނަންބަރު 12/2009 ގެ 47 ވަނަ މާއްދާގައި ބަޔާންކޮށްފައިވާ ހެކިތައް އެކަނި ނޫނެވެ. އެމާއްދާގައި ބަޔާންވެގެންވާ ހެކީގެ ތެރެއިން މަދުވެގެން 5 ބާވަތުގެ ހެކި ލިބިފައިނެތްނަމަވެސް، ޤާނޫނުއަސާސީގެ 51 ވަނަ މާއްދާގެ (އ) ގައިވާ މިންވަރަށް ހެކި ލިބިފައިވޭތޯ ވަޒަން ކުރުމުގައި، ހުށައެޅޭ ޝަރީޢަތާއި ޤާނޫނު ހުއްދަކުރާ އެހެނިހެން ހެކިތަކާއި ޤަރީނާތަކުގެ މައްޗަށް ފަނޑިޔާރުން ރިޢާޔަތްކުރަން ޖެހޭނެއެވެ. (ޕެރ. 3(ބ))

ކުދިން އޭގެ އެއްކުއްޖަކު އަނެއްކުއްޖާއާމެދު ބައްޕަ ޖިންސީ ގޯނާކުރި މަންޒަރު ފެނުނުކަމަށް ބުނެ ދީފައިވާ ހެކިބަސް، އެވާހަކަ ކުދިން ކިޔައިދިނުމާއި، އެވާހަކަ އަޑުއެހި މީހުންގެ ބަޔާންތަކާއި، މެޑިކޯ ލީގަލް ރިކޯޑާއި ސައިކޮލޮޖިސްޓް ރިޕޯޓާ ގުޅުވާލުމުން ޤާނޫނުއަސާސީގެ 51 ވަނަ މާއްދާގެ (އ) ގައިވާ މިންވަރަށް ކުށް ސާބިތުވެއެވެ؛ އަދި ކުދިން އެފަދަ ވާހަކަ ހަދައިގެން ދައްކާނެކަމަށް ބުއްދީގެ ހަމަތަކުން ޤަބޫލުނުކުރެވޭއިރު، އެފަދަ ވާހަކައެއް ދެއްކުމުގެ ބޭނުމެއް ނުވަތަ ސަބަބެއް ތުހުމަތުކުރެވޭ ފަރާތަށް ސާބިތުކޮށްދެވިފައެއް ނުވެއެވެ. (ޕެރ. 3(ބ))