—

ރަށު ކައުންސިލްތަކުގެ ހިންގާ ޤަވާޢިދުތައް އެކުލަވާލެވިފައިވަނީ އެއް އުޞޫލަކުންތޯ ބަލައި، ހުރިހާ ކައުންސިލްތަކުން އެއްހަމަތަކަކާއި އެއް އުޞޫލުތަކެއް ދެމެހެއްޓުމަށް މަސައްކަތްކުރުމަކީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 61 ވަނަ މާއްދާގެ (ރ) އިން ލޯކަލް ގަވަރމަންޓް އޮތޯރިޓީއަށް މަތިކޮށްފައިވާ މަސްއޫލިއްޔަތެކެވެ. (ޕެރ. 3.2)

ޔުނިޓަރީ ދައުލަތަކީ އެ ދައުލަތެއްގެ އެންމެހައި ދާޚިލީ އަދި ޚާރިޖީ ސިޔާދަތު އެއް ސަރުކާރަކުން ތަމްސީލުކުރާ ދައުލަތެކެވެ. ޔުނިޓަރީ ދައުލަތެއްގައި ވެރިކަން ހިންގުމުގެ ބާރާއި، ޤާނޫނު ހެދުމުގެ ބާރާއި، ޢަދުލު އިންޞާފު ޤާއިމްކުރުމުގެ ބާރަކީ މުޅި ދައުލަތުގެ ހުރިހާ ސަރަޙައްދުތަކަށް ހިނގާ އެއްބާރުތަކެކެވެ. (ޕެރ. 3.4)

ލާމަރުކަޒީ އިދާރާތަކަށް ނުވަތަ ލޯކަލް ކައުންސިލްތަކަށް މަޢުނަވީ ޝަޚްޞިއްޔަތު ޤާނޫނުން ދެވި، އިދާރީގޮތުން މިނިވަން އިދާރާތަކެއްގެ ގޮތުގައި ކަނޑައެޅިފައި އޮތުމުގެ މާނައަކީ، އެއްވެސް ހާލެއްގައި އެ ކައުންސިލްތަކަކީ ދައުލަތުގެ ވެރިކަން ހިންގުމުގެ ބާރުގެ ތެރޭގައި ނުހިމެނޭ، ވަކި ބާރެއްގެ ގޮތުގައި ތަޞައްރުފުކުރުމުގެ އިޚްތިޔާރާއި ބާރު ލިބިފައިވާ، މަރުކަޒީ ސަރުކާރުގެ އިޝްރާފާއި ރަޤާބާއިން ބޭރުގައިވާ އިދާރާތަކެއްކަމަށް ޤާނޫނު ޤަބޫލުކުރުން ނޫނެވެ. އެ ކައުންސިލްތަކަކީ ވެރިކަން ހިންގުމުގެ ބާރުގައި ހިމެނޭ އިދާރާތަކެއްކަން ޤާނޫނުން ކަށަވަރުކޮށްދެއެވެ. އެއީ ލާމަރުކަޒީ ނިޒާމުގެ އެއް އަސާސެވެ. (ޕެރ. 3.4)

ލާމަރުކަޒީ އިދާރާތަކުގެ ނުވަތަ ލޯކަލް ކައުންސިލްތަކުގެ މައްޗަށް މަރުކަޒީ ސަރުކާރުގެ އިޝްރާފާއި ރަޤާބާ އޮތުމުން ތިން މަޤްޞަދެއް ހާޞިލުވެއެވެ. އެއީ: ދައުލަތުގެ ވަޙްދަތާއި އިސްތިޤްރާރު ޙިމާޔަތްވުން ކަށަވަރުކުރުން؛ ލޯކަލް ދާއިރާތަކުގައި ހިމެނޭ އިދާރާތައް ރަނގަޅުގޮތުގައި އެއް އުޞޫލުތަކެއްގެ މަތިން ހިންގުން ކަށަވަރުކުރުން؛ އަދި ލޯކަލް އިދާރާތަކުން ޤާނޫނުތަކާއި ޤަވާޢިދުތަކާއި ދައުލަތުގެ ޢާންމު ސިޔާސަތުތަކަށް ތަބާވުން ކަށަވަރުކުރުމެވެ. (ޕެރ. 3.4)

ލޯކަލް ގަވަރމަންޓް އޮތޯރިޓީއަކީ ލޯކަލް ކައުންސިލްތަކުގެ މަސައްކަތްތަކާއި ޙަރަކާތްތައް ހިނގަމުންދާގޮތް ބަލައި ކައުންސިލްތަކުގެ މަސައްކަތް ވިލަރެސްކުރުމަށްޓަކައި ޙަރަކާތްތެރިވާ ޤައުމީ މުއައްސަސާއެއްކަން ލާމަރުކަޒީ ޤާނޫނުގެ 60 ވަނަ މާއްދާއިން ސާފުކޮށް އެނގެއެވެ. އަދި އެ މުއައްސަސާއަށް ޖަވާބުދާރީވެ ރިޕޯޓުކުރުމަކީ ލޯކަލް ކައުންސިލްތަކުގެ މައްޗަށް ލާޒިމްވެގެންވާ ކަމެކެވެ. (ޕެރ. 3.4)

ޤާނޫނުގައި ބަޔާންކުރެވިފައިނުވާ ހާލަތެއް ދިމާވެއްޖެނަމަ، ނުވަތަ ވަކިކަމެއްގައި ދެ ކައުންސިލެއްގެ ދެމެދުގައި ޚިޔާލުތަފާތުވެއްޖެނަމަ، ޤާނޫނުއަސާސީއާއި ޤާނޫނުތަކާއި ޤަވާޢިދުތަކާ ޚިލާފު ނުވާނޭ ގޮތުގެމަތިން އެކަމެއްގައި ގޮތެއް ނިންމުމުގެ ބާރު ގަވަރމަންޓް އޮތޯރިޓީއަށް ލިބިގެންވެއެވެ. ލޯކަލް ކައުންސިލްތަކަށް ތަފާތު ޤަވާޢިދުތަކާއި އުޞޫލުތައް ހެދުމުގެ ބާރު ލިބިގެންވަނީ ގަވަރމަންޓް އޮތޯރިޓީގެ މަޝްވަރާއާއެކުކަން ލާމަރުކަޒީ ޤާނޫނުގެ 149، 151 އަދި 152 ވަނަ މާއްދާއިން އެނގެއެވެ. (ޕެރ. 3.4)

ލޯކަލް ގަވަރމަންޓް އޮތޯރިޓީގެ ބޯޑުން ވަކިކަމެއްގައި ވަކިގޮތަކަށް ޢަމަލުކުރުމަށް ނިންމައި ލޯކަލް ކައުންސިލްތަކަށް އަންގާ އެންގުންތަކަށް ތަބާވެ، އެ އެންގުންތަކާ އެއްގޮތަށް ޢަމަލުކުރުމަކީ ލޯކަލް ކައުންސިލްތަކުގެ މައްޗަށް ލާޒިމްވެގެންވާ ކަމެކެވެ. އެފަދަ އެންގުންތަކަކީ އެއަށް ޢަމަލުކުރުމާއި ނުކުރުމުގެ އިޚްތިޔާރު ލޯކަލް ކައުންސިލްތަކަށް ލިބިގެންވާ އެންގުންތަކެއް ނޫނެވެ. (ޕެރ. 3.4)

އޮތޯރިޓީގެ ސަރކިއުލަރުގެ އުޞޫލުތަކާ ޚިލާފަށް ކައުންސިލްގެ ރައީސްގެ މައްޗަށް ނަގާފައިވާ އިތުބާރު ނެތްކަމުގެ ވޯޓާއި، އޭގެ ފަހުން ރައީސަކު އިންތިޚާބުކުރި ނިންމުމަކީ ބާޠިލް ނިންމުންތަކެއްކަމަށް ލޯކަލް ގަވަރމަންޓް އޮތޯރިޓީން ކައުންސިލަށް އަންގާ އެންގުމަކީ، ލާމަރުކަޒީ ޤާނޫނުން އޮތޯރިޓީއަށް ލިބިފައިވާ ބާރާއި އިޚްތިޔާރުގެ ދަށުން އަންގާ ޞައްޙަ އެންގުމެކެވެ. (ޕެރ. 3.3-3.4)