—

މުވައްޒަފަކު ވަޒީފާއިން ވަކިކުރެވޭނީ އެކަށީގެންވާ ސަބަބެއް އޮވެގެން ކަމުގައި ބަޔާންވެގެން އޮންނައިރު، މުވައްޒަފަކު ވަޒީފާއިން ވަކިކުރުމާއި ގުޅިގެން އެމުވައްޒަފަކު ހުށަހަޅާ ޝަކުވާއެއް ނުވަތަ ދަޢުވާއެއްގައި، އޭނާ ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށް ދިނުމަކީ ވަޒީފާދޭ ފަރާތުގެ ޒިންމާއެކެވެ. (ޕެރ. 3 (ށ))

ޢާންމު އުސޫލެއްގެ ގޮތުން މުވައްޒަފަކު ވަޒީފާއިން ވަކިކުރެވޭނީ، އެމުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަން (substantive fairness) އާއި އިޖްރާޢީ ޢަދުލުވެރިކަން (procedural fairness) ޤާއިމުކުރުމަށް ފަހުގައެވެ. (ޕެރ. 3 (ށ))

ނޯޓިހެއް ދިނުމަކާ ނުލައި ވަޒީފާއިން ވަކިކުރެވޭނީ، އޭނާގެ މަސައްކަތުގެ އަޚްލާޤު އެކަށީގެން ނުވުމާއެކު، އޭނާ ވަޒީފާގައި އިތުރަށް ބެހެއްޓުމަކީ އެކަށީގެންވާ ހަމަތަކަށް ބަލާއިރު ކުރެވޭނެ ކަމެއްކަމަށް ވަޒީފާދޭ ފަރާތަށް ނުފެންނަ ޙާލަތްތަކުގައެވެ؛ މަސައްކަތުގެ އަޚްލާޤު އެކަށީގެން ނުވާކަމަށް ބެލޭނީ ވަޒީފާގައި އިތުރަށް ބެހެއްޓުމުން ވަޒީފާދޭ ފަރާތަށް ނުވަތަ ވަޒީފާ އަދާކުރާ ތަނަށް ގެއްލުންތަކެއް ލިބިދާނެ ކަމަށް ފެނުމާއި، ޚިޔާނާތެއް ވެފައިވުމެވެ. (ޕެރ. 3 (ށ))

ވަޒީފާއިން ވަކިކުރުމަށް މެދުވެރިވި ސަބަބު ނުވަތަ މުވައްޒަފުގެ މައްޗަށް ތުހުމަތުކުރެވުނު ޢަމަލު އޭނާ ކޮށްފައިވާކަން ސާބިތުނުވާނަމަ، ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަން (substantive fairness) ޤާއިމްވެފައި ނުވާކަން އެނގެއެވެ. (ޕެރ. 3 (ށ))

މުވައްޒަފަކު ވަޒީފާއިން ވަކިކުރުމުގައި އިޖްރާޢީ ޢަދުލުވެރިކަން (procedural fairness) ޤާއިމްކުރަންޖެހެއެވެ. މުވައްޒަފުގެ މައްޗަށް ތުހުމަތު ކުރެވިފައިވަނީ ކޮން މައްސަލައެއްގައިކަން އޭނާއަށް އަންގާފައިނުވާނަމަ، އެކަމާގުޅޭ ގޮތުން ވަޒީފާދޭ ފަރާތުން ތަޙްޤީޤެއް ކޮށްފައިނުވާނަމަ، އަދި ތުހުމަތުކުރެވުނު މައްސަލައިގައި ޖަވާބުދާރީވުމުގެ ފުރުޞަތާއި ޤާނޫނީ ވަކީލެއް ނުވަތަ އެހެންފަރާތެއް ޢައްޔަންކޮށް ތަމްސީލުކުރުމުގެ ފުރުޞަތު ލިބިދީފައިނުވާނަމަ، ވަޒީފާއިން ވަކިކުރުމުގެ ކުރިން އިޖްރާޢީ ޢަދުލުވެރިކަން ޤާއިމްކުރެވިފައި ނުވެއެވެ. (ޕެރ. 3 (ށ))

މުވައްޒަފަކު ވަޒީފާއިން ވަކިކޮށްފައިވަނީ އެކަށީގެންވާ ސަބަބެއް ނެތިކަމަށް ވަޒީފާއާބެހޭ ޓްރައިބިއުނަލަށް ފެންނަ ޙާލަތުގައި އަމުރުނެރުމުގައި، ޓްރައިބިއުނަލުން ފުރަތަމަ ބަލަންވާނީ އެމުވައްޒަފަކު ވަކިކުރިއިރު ހުރި ވަޒީފާގައި އަލުން ބެހެއްޓުމަށް ނުވަތަ އެވަޒީފާއާގުޅޭ ނުވަތަ އެނޫންވެސް އޭނާއާ އެކަށީގެންވާ ވަޒީފާއެއްގައި ބެހެއްޓުމަށެވެ. އެފަދައިން ބެލުމުގައި ވަޒީފާއިން ވަކިކުރެވުނު ޙާލަތުތަކަށާއި، ވަޒީފާއިން ވަކިކުރަން ދިމާވީ މުވައްޒަފަކު ކުރި ޢަމަލެއްގެ ސަބަބުންކަމަށްވާނަމަ އެކަމުގައި އޭނާ ބައިވެރިވާ މިންވަރަށް ރިޢާޔަތްކުރަންވާނެއެވެ. (ޕެރ. 3 (ރ))

މުވައްޒަފުގެ މައްޗަށް ކުރެވުނު ތުހުމަތުތަކާގުޅިގެން ވަޒީފާދޭ ފަރާތުން އެއްވެސް ތަޙްޤީޤެއް ނުކޮށް، އަދި ތުހުމަތުކުރެވުނު މައްސަލައިގައި އޭނާއާ ސުވާލުކޮށް ޖަވާބުދާރީވުމުގެ ފުރުޞަތު ނުދީ ވަޒީފާއިން ވަކިކޮށްފައިވާނަމަ، އެންމެ ޢަދްލުވެރި ބަދަލަކީ އޭނާ ކުރިން އަދާކުރަމުން ގެންދިޔަ ވަޒީފާއަށް އަނބުރާ ރުޖޫޢުކުރުމެވެ؛ އެފަދަ ޙާލަތެއްގައި ކުރިން ހުރި ވަޒީފާގައި ބެހެއްޓުމަށް އަމުރު ނުކޮށް ބަދަލު ދިނުމުގެ އަމުރެއް ނެރުމަކީ މިބާވަތުގެ މައްސަލަތަކުގައި ޢަމަލުކުރުމަށް ކަނޑައަޅާފައިވާ ޝަރުޢީ އަދި ޤާނޫނީ އުޞޫލުތަކާ ޚިލާފު ކަމެކެވެ. (ޕެރ. 3 (ރ))

މިބާވަތުގެ މަދަނީ މައްސަލަތައް ޝަރީޢަތަށް ސާބިތުކޮށް ދޭންޖެހޭނީ ބޮޑަށް ބުރަވެވޭ މިންވަރަށް (balance of probability) އެވެ. (ޕެރ. 3 (ބ))

އެކަށީގެންވާ ސަބަބެއް ނެތި، މައުޟޫޢީ އަދި އިޖްރާޢީ ޢަދުލުވެރިކަން ޤާއިމުނުކޮށް ވަޒީފާއިން ވަކިކުރެވޭ މުވައްޒަފަކަށް ޤާނޫނީ ގޮތުން ލިބިދޭންޖެހޭ ފަރުވާއަކީ އޭނާ ކުރިން އަދާކުރަމުން ގެންދިޔަ ވަޒީފާއަށް އަނބުރާ ރުޖޫޢުކުރުމާއި، އޭނާއަކީ އެއްވެސް ހާލަތެއްގައި ވަޒީފާއިން ވަކިކުރެވިފައިވާ މުވައްޒަފެއްކަމުގައި ނުބަލުމާއެކު، އޭނާ ވަޒީފާގައި ހުރިނަމަ އެ މުއްދަތުގައި މުސާރައާއި އުޖޫރައާއި އިނާޔަތްތަކުގެ ގޮތުގައި ލިބޭނޭ ފައިސާ އޭނާއަށް ލިބިދިނުމަށް އަމުރުކުރުމެވެ. (ޕެރ. 3 (ބ))