ސިވިލް ސަރވިސް ކޮމިޝަން ވ. މުޙައްމަދު ނާޝިދު

ވަޒީފާއާބެހޭ ޤާނޫނުގެ 23 ވަނަ މާއްދާގެ (ހ) ގައި ނޯޓިހެއް ދިނުމަކާއި ނުލައި، ވަޒީފާއަދާކުރާ ފަރާތެއް ވަޒީފާއިން ވަކިކުރެވޭނީ، އޭނާގެ މަސައްކަތުގެ އަޚުލާޤު އެކަށީގެންނުވުމާއެކު، އޭނާ ވަޒީފާގައި އިތުރަށް ބެހެއްޓުމަކީ އެކަށީގެންވާ ހަމަތަކަށް ބަލާއިރު، ކުރެވޭނެކަމެއްކަމަށް ވަޒީފާދޭ ފަރާތަށް ނުފެންނަ ޙާލަތްތަކުގައި ކަމަށް އޮންނަކަމާއި، އަދި ވަޒީފާއަދާކުރާ ފަރާތުގެ މަސައްކަތުގެ އަޚުލާޤު އެކަށީގެންނުވާކަމަށް ބެލެވޭނީ ވަޒީފާގައި އިތުރަށް ބެހެއްޓުމުން ވަޒީފާދޭ ފަރާތަށް ނުވަތަ ވަޒީފާ އަދާކުރާ ތަނަށް ގެއްލުންތަކެއް ލިބިދާނެކަމަށް ފެނުން ނުވަތަ ޚިޔާނަތެއްވުންކަން އެމާއްދާގެ (ށ) ގައި ބަޔާންކޮށްފައިވެއެވެ. (ޕެރ. 03 ނ)

ވަޒީފާގައި އިތުރަށް ބެހެއްޓުމުން ވަޒީފާދޭފަރާތަށް ނުވަތަ ވަޒީފާ އަދާކުރާ ތަނަށް ގެއްލުން ލިބިދާނެކަމަށް ފެނުމަކީ އެކަށީގެންވާ ސަބަބުތަކަކާއި މަޤްބޫލު ޙުއްޖަތްތަކެއްނެތި ހަމައެކަނި ސިވިލް ސަރވިސް ކޮމިޝަނަށް ފެންނަ ފެނުމެއްގެ މައްޗަށް ވަޒީފާއިން ވަކިކުރެވިދާނެ ކަމެއް ނޫނެވެ. (ޕެރ. 03 ނ)

އެފަދަ ޙާލަތެއްގައި ވަޒީފާއިން ވަކިކުރާއިރު ވެސް ވަޒީފާދޭފަރާތަށް ނުވަތަ ވަޒީފާއަދާކުރާ ތަނަށް ގެއްލުންތަކެއް ލިބިދާނެ ކަމަށް ވަޒީފާ ދޭ ފަރާތަށް ފެނުނު ހަމައަކީ އެކަށީގެންވާ ހަމައެއްތޯ ބެލެވެން ޖެހޭނެއެވެ. އަދި އެފަދަ ތުހުމަތެއްގައި ވަޒީފާއިން ވަކިކޮށްފައިވާ މީހެއްގެ ވަޒީފާއިން ވަކިކޮށްފައިވަނީ ޢަދުލުވެރިކަމާއެކުގައިތޯއާއި، ވަޒީފާއިން ވަކިކުރީ އެކަށީގެންވާ ހަމައަކުންތޯއާއި، ވަޒީފާއިން ވަކިކުރުމުގެ ކުރިން ޝަކުލީ ގޮތުންނާއި އިޖުރާއީ ގޮތުން ތަބާވުން ލާޒިމްވެފައިވާ ކަންތައްތަކަށް ވަޒީފާދިން ފަރާތުން ތަބާވުމަށްފަހުގައިތޯ އާއި، މިފަދަ ފިޔަވަޅެއް އެޅުމުގެ ކުރިން ބަލަންޖެހޭ ބެލުންތަކަށް އެކަށީގެންވާ މިންވަރަކަށް ބެލުމަށްފަހުގައިތޯ ކަށަވަރުކުރަން ޖެހޭނެއެވެ. (ޕެރ. 03 ނ)

ވަޒީފާގައި އިތުރަށް ބެހެއްޓުމުން ވަޒީފާދޭފަރާތަށް ނުވަތަ ވަޒީފާ އަދާކުރާ ތަނަށް ގެއްލުން ލިބިދާނެކަމަށް ފެންނަ ޙާލަތަކީ ވަޒީފާއާބެހޭ ޤާނޫނާއި ސިވިލް ސަރވިސްގެ ޤާނޫނުގެ ދަށުން ވެސް ނޯޓިސް ނުދީ ވަޒީފާއިން ވަކިކުރެވިދާނެ ޙާލަތެއް ކަމުގައިވީނަމަވެސް، އެޙާލަތުގައިވެސް އޭނާގެ މައްޗަށް ތުހުމަތުކުރެވިފައިވާ ކަމެއްގެ މަޢުލޫމާތު އެފަރާތަށް އަންގަންޖެހޭނެއެވެ. (ޕެރ. 03 ނ)

ވަޒީފާ ދޭ ފަރާތުން ޤާނޫނާ ޚިލާފަށް މުވައްޒަފަކު ވަޒީފާއިން ވަކިކުރި ނަމަވެސް، އެފަދަ މުވައްޒަފަކަށް ޤާނޫނީ ފަރުވާއެއްގެ ގޮތުން އެމުވައްޒަފަކު ކުރިން ހުރި ވަޒީފާގައި ބެހެއްޓުމަށް ކަނޑައެޅުމުގައި، އެމައްސަލައިގެ ވަށައިގެންވާ ކަންތައްތަކަށް ރިޢާޔަތްކޮށް ވަޒީފާދޭ ފަރާތުގެ ޙައްޤުތަކަށްވެސް ރިޢާޔަތްކުރައްވައި ދެފަރާތަށް އެންމެ މަޞްލަޙަތުހުރި ގޮތުގެ މައްޗަށް ރިޢާޔަތް ކުރަންޖެހޭނެއެވެ. (ޕެރ. 03 ރ)

ޤައުމީ ސަލާމަތާ ގުޅިފައިވާ ވަޒީފާއެއް އަދާކުރަމުން ދިޔަ ފަރާތްތަކުގެ މައްޗަށް ވަޒީފާދޭ ފަރާތުގެ އިތުބާރު އޮތުން އެވަޒީފާގެ ބާވަތުން މުހިއްމުވާތީ، ވަށައިގެންވާ އެންމެހައި ކަންކަމަށާއި، ވަޒީފާއަދާކުރާ ތަނާއި ވަޒީފާގެ މަސްއޫލިއްޔަތުތަކުގެ މައްޗަށް ބަލާއިރު، ވަޒީފާ އަނބުރާ ރުޖޫޢަކުރުމަކީ އެންމެ މަސްލަޙަތު ހުރި ގޮތެއް ނޫނެވެ. (ޕެރ. 03 ރ)