—

މުވައްޒަފަކު ވަޒީފާއިން ވަކިކުރެވޭނީ އެކަށީގެންވާ ސަބަބެއް އޮވެގެން ކަމުގައި ވަޒީފާއާބެހޭ ޤާނޫނުގެ 21 ވަނަ މާއްދާގައި ބަޔާންވެގެން އޮންނައިރު، މުވައްޒަފަކު ވަޒީފާއިން ވަކިކުރުމާއި ގުޅިގެން، އެމުވައްޒަފަކު ހުށައަޅާ ޝަކުވާއެއް ނުވަތަ ދަޢުވާއެއްގައި، އޭނާ ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށް ދިނުމަކީ ވަޒީފާދޭ ފަރާތުގެ ޒިންމާއެއްކަން ވަޒީފާއާބެހޭ ޤާނޫނުގެ 27 ވަނަ މާއްދާގައި ބަޔާންވެގެން ވެއެވެ. (ޕެރ. 03(ހ))

މުވައްޒަފަކު ވަޒީފާއިން ވަކިކުރުމުގައި ނުވަތަ ވަޒީފާއިން ވަކިކުރުމުގެ ކުރިން، އެމުވައްޒަފަކު ވަޒީފާއިން ވަކިކުރުމަކީ ޢަދުލުވެރިކަމާއެކު ކުރެވޭކަމެއްކަން ކަށަވަރުކުރުމަށްޓަކައި ވަޒީފާދޭ ފަރާތުން ޢަމަލުކުރަންޖެހޭ ގޮތްތަކެއް ނުވަތަ އަޅަންޖެހޭ ފިޔަވަޅުތަކެއް ހުންނައިރު، ޢާންމު އުޞޫލެއްގެ ގޮތުން މުވައްޒަފަކު ވަޒީފާއިން ވަކިކުރެވޭނީ، އެމުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަން (substantive fairness) އާއި އިޖްރާއީ ޢަދުލުވެރިކަން (procedural fairness) ޤާއިމުކުރުމަށް ފަހުގައެވެ. (ޕެރ. 03(ހ))

ސިވިލް ސަރވިސް ޤަވާޢިދު 2014 ގެ 273 ވަނަ މާއްދާގެ (ހ) އާއި (ށ) ގައި ބަޔާންކުރާ، މުވައްޒަފު ޒިންމާ ނުއުފުލުމުގެ ސަބަބުން މަސައްކަތަށް ބޮޑު ގެއްލުންތަކެއް ލިބިދާނެކަމަށް ފެނުމާއި ވަޒީފާގައި އިތުރަށް ބެހެއްޓުމުން ވަޒީފާދޭފަރާތަށް ނުވަތަ ވަޒީފާއަދާކުރާ ފަރާތަށް ނުވަތަ ވަޒީފާ އަދާ ކުރާ ތަނަށް ގެއްލުން ލިބިދާނެ ކަމަށް ފެނުމަކީ އެކަށީގެންވާ ސަބަބުތަކަކާއި މަޤްބޫލު ޙުއްޖަތްތަކެއްނެތި ހަމައެކަނި ސިވިލް ސަރވިސް ކޮމިޝަނަށް ފެންނަ ފެނުމެއްގެ މައްޗަށް ނިންމިދާނެކަމެއްކަމުގައި ބެލެވެންނެތެވެ. (ޕެރ. 03(ށ))

މުވައްޒަފަކާ ޙަވާލުކުރެވިފައިވާ މަސައްކަތަށް އޭނާ އިހުމާލުވެފައިވާކަމަށް ކަނޑައެޅޭނީ އޭނާއާ ޙަވާލުކުރެވިފައިވާ މަސައްކަތަކީ ކޮބައިކަމާއި، އޭނާގެ ފަރާތުން ޚިލާފުވެފައި ވަނީ މިފަދަ މައްސަލަތަކުގައި ޢަމަލުކުރުމަށް އޮންނަ ކޮން އުޞޫލަކާ ޚިލާފުވެގެންކަން ސާބިތު ވާން އޮންނަ ޙާލަތުގައެވެ. (ޕެރ. 03(ނ))

މުވައްޒަފު ޢަމަލުކުރީ އޭނާގެ މައްޗަށް ހުރި ފަރާތަކުން ދިން އިރުޝާދުތަކާ ޚިލާފަށްކަމުގައި ބެލެވެންނެތުމާއި، މިފަދަ މައްސަލައެއްގައި ބައިވެރިވާއިރު ފުރިހަމަ ކުރަންޖެހޭ ތަމްރީނުތައް ދެވިފައިވާ ފަރާތަކަށް ނުވާތީ، މުވައްޒަފު ކުށަކަށް ބުނާ ކަންކަމަކީ އޭނާގެ ފަރާތުން ހެޔޮނިޔަތެއްނެތި އިހުމާލުވެފައިވާ ވުމެއްކަމުގައި ބެލެވެންނެތެވެ. (ޕެރ. 03(ނ))

ސިވިލް ސަރވިސް ޤަވާޢިދު 2014 ގެ 273 ވަނަ މާއްދާގެ (ހ) އަދި (ށ) އަށް ރިޢާޔަތްކޮށް ސިވިލް ސަރވިސްގެ ޤާނޫނުގެ 47 ވަނަ މާއްދާގެ (ނ) ގެ 3 ވަނަ ނަންބަރުގެ ދަށުންކަމަށް ބުނެ އެއްވެސް ނޯޓިސްއެއް ދިނުމެއްނެތި މުވައްޒަފަކު ވަޒީފާއިން ވަކިކޮށްފައިވަނީ އެމާއްދާގައި ބުނާފަދަ ސަބަބެއް އޮވެގެންކަން ސާބިތުކުރެވޭ މިންވަރުގެ ހެކިތަކެއް ސިވިލް ސަރވިސް ކޮމިޝަނުން ހުށަހަޅާފައިނުވާނަމަ، އެ ވަކިކުރުމަކީ ސިވިލް ސަރވިސްގެ ޤާނޫނާއި ޤަވާޢިދުތަކާ އެއްގޮތަށް ކޮށްފައިވާ ވަކިކުރުމެއް ނޫނެވެ. (ޕެރ. 03(ނ))