ސިވިލް ސަރވިސް ކޮމިޝަން ވ. އިބްރާހީމް އަފީފް

ދިވެހި ސިވިލް ސަރވިސްގެ މުވައްޒަފުންނަށް ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) އާއި ޤާނޫނު ނަންބަރު 5/2007 (ދިވެހި ސިވިލް ސަރވިސްގެ ޤާނޫނު)، މި ދެޤާނޫނުވެސް ހިންގޭނެއެވެ. (ޕެރ. 03 (ނ))

ވަޒީފާއާބެހޭ ޤާނޫނުގެ 23 ވަނަ މާއްދާގެ (ހ) ގައިވާ ގޮތުން، ނޯޓިހެއް ދިނުމަކާއި ނުލައި ވަޒީފާއަދާކުރާ ފަރާތެއް ވަޒީފާއިން ވަކިކުރެވޭނީ، އޭނާގެ މަސައްކަތުގެ އަޚުލާޤު އެކަށީގެންނުވުމާއެކު، އޭނާ ވަޒީފާގައި އިތުރަށް ބެހެއްޓުމަކީ އެކަށީގެންވާ ހަމަތަކަށް ބަލާއިރު ކުރެވޭނެކަމެއްކަމަށް ވަޒީފާދޭ ފަރާތަށް ނުފެންނަ ޙާލަތްތަކުގައެވެ؛ އަދި ވަޒީފާއަދާކުރާ ފަރާތުގެ މަސައްކަތުގެ އަޚުލާޤު އެކަށީގެންނުވާކަމަށް ބެލެވޭނީ ވަޒީފާގައި އިތުރަށް ބެހެއްޓުމުން ވަޒީފާދޭ ފަރާތަށް ނުވަތަ ވަޒީފާ އަދާކުރާ ތަނަށް ގެއްލުންތަކެއް ލިބިދާނެކަމަށް ފެނުން ނުވަތަ ޚިޔާނަތެއްވުމެވެ. (ޕެރ. 03 (ނ))

ދިވެހި ސިވިލް ސަރވިސްގެ ޤާނޫނުގެ 47 ވަނަ މާއްދާގެ (ނ) ގެ 3 އަށް ބަލާއިރު، ދިވެހި ސިވިލް ސަރވިސްގެ ޤާނޫނާއި، ދިވެހި ސިވިލް ސަރވިސްގެ ޤަވާއިދާއި، ދިވެހި ސިވިލް ސަރވިސްގެ ކޯޑް އޮފް ކޮންޑަކްޓާ ޚިލާފުވިކަން ސިވިލް ސަރވިސް ކޮމިޝަނަށް ސާބިތުވެއްޖެނަމަ، އެމުވައްޒަފަކު ވަޒީފާއިން ވަކިކުރުމުގެ ބާރު ސިވިލް ސަރވިސް ކޮމިޝަނަށް ލިބިގެންވެއެވެ. (ޕެރ. 03 (ހ)، (ނ))

ދިވެހި ސިވިލް ސަރވިސްގެ ޤަވާއިދު 2014 ގެ 273 ވަނަ މާއްދާގެ (ށ) ގައި، މުވައްޒަފަކު ވަޒީފާގައި އިތުރަށް ބެހެއްޓުމުން ވަޒީފާދޭ ފަރާތަށް ނުވަތަ ވަޒީފާ އަދާކުރާތަނަށް ގެއްލުންތަކެއް ލިބިދާނެކަމަށް ސިވިލް ސަރވިސް ކޮމިޝަނަށް ފެނިއްޖެނަމަ ޖަވާބުދާރީވުމަށް ފުރުޞަތު ދިނުމަކާ ނުލައި އެމުވައްޒަފެއް ވަޒީފާއިން ވަކިކުރުމުގެ ބާރު ކޮމިޝަނަށް ލިބިދީފައިވީނަމަވެސް، ވަޒީފާގައި އިތުރަށް ބެހެއްޓުމުން ގެއްލުން ލިބިދާނެކަމަށް ފެނުމަކީ އެކަށީގެންވާ ސަބަބުތަކަކާއި މަޤްބޫލު ޙުއްޖަތްތަކެއްނެތި ހަމައެކަނި ސިވިލް ސަރވިސް ކޮމިޝަނަށް ފެންނަ ފެނުމެއްގެ މައްޗަށް ވަޒީފާއިން ވަކިކުރެވިދާނެ ކަމެއް ނޫނެވެ. (ޕެރ. 03 (ނ))

އެފަދަ ޙާލަތެއްގައި ވަޒީފާއިން ވަކިކުރާއިރުވެސް، ވަޒީފާދޭ ފަރާތަށް ނުވަތަ ވަޒީފާއަދާކުރާ ތަނަށް ގެއްލުންތަކެއް ލިބިދާނެ ކަމަށް ވަޒީފާދޭ ފަރާތަށް ފެނުނު ހަމައަކީ އެކަށީގެންވާ ހަމައެއްތޯ ބެލެވެންޖެހެއެވެ. އަދި އެފަދަ ތުހުމަތެއްގައި ވަޒީފާއިން ވަކިކޮށްފައިވާ މީހެއްގެ ވަޒީފާއިން ވަކިކޮށްފައިވަނީ ޢަދުލުވެރިކަމާއެކުގައިތޯއާއި، އެކަށީގެންވާ ހަމައަކުންތޯއާއި، ވަޒީފާއިން ވަކިކުރުމުގެ ކުރިން ޝަކުލީ ގޮތުންނާއި އިޖުރާއީ ގޮތުން ތަބާވުން ލާޒިމްވެފައިވާ ކަންތައްތަކަށް ވަޒީފާދިން ފަރާތުން ތަބާވުމަށް ފަހުގައިތޯއާއި، މިފަދަ ފިޔަވަޅެއް އެޅުމުގެ ކުރިން ބަލަންޖެހޭ ބެލުންތަކަށް އެކަށީގެންވާ މިންވަރަކަށް ބެލުމަށްފަހުގައިތޯ ކަށަވަރުކުރަންޖެހެއެވެ. (ޕެރ. 03 (ނ))

ވަޒީފާގައި އިތުރަށް ބެހެއްޓުމުން ވަޒީފާދޭފަރާތަށް ނުވަތަ ވަޒީފާ އަދާކުރާ ތަނަށް ގެއްލުން ލިބިދާނެކަމަށް ފެންނަ ޙާލަތަކީ ވަޒީފާއާބެހޭ ޤާނޫނާއި ސިވިލް ސަރވިސްގެ ޤާނޫނުގެ ދަށުން ވެސް ނޯޓިސް ނުދީ ވަޒީފާއިން ވަކިކުރެވިދާނެ ޙާލަތެއް ކަމުގައިވީނަމަވެސް، އެޙާލަތުގައިވެސް މުވައްޒަފުގެ މައްޗަށް ތުހުމަތުކުރެވިފައިވާ ކަމެއްގެ މަޢުލޫމާތު އެފަރާތަށް އަންގަންޖެހެއެވެ. ތުހުމަތު ކުރެވިފައިވަނީ ކޮންކަމެއްކަން މުވައްޒަފަށް އެންގިފައިނުވާއިރު، ގެއްލުމެއް ލިބިދާނެކަމަށް ފެނުނު ހަމައަކީ އެކަށީގެންވާ ހަމައެއްކަމަށް ސާބިތުކޮށްދޭ ހުއްޖަތެއް ހުށަހަޅާފައިނުވާނަމަ، އަދި ވަކިކުރުމުގެ ކުރިން ބަލަންޖެހޭ ބެލުންތަކަށް އެކަށީގެންވާ މިންވަރަކަށް ބެލިފައިނުވާނަމަ، އެނިންމެވުމުގައި އިޖުރާއީ ޢަދުލުވެރިކަން ޤާއިމުކުރެވިފައި ނުވެއެވެ. (ޕެރ. 03 (ނ))

ވަޒީފާދޭ ފަރާތުން ޤާނޫނާ ޚިލާފަށް މުވައްޒަފަކު ވަޒީފާއިން ވަކިކުރި ނަމަވެސް، އެފަދަ މުވައްޒަފަކަށް ޤާނޫނީ ފަރުވާއެއްގެ ގޮތުން އެމުވައްޒަފަކު ކުރިން ހުރި ވަޒީފާގައި ބެހެއްޓުމަށް ކަނޑައެޅުމުގައި، އެމައްސަލައިގެ ވަށައިގެންވާ ކަންތައްތަކަށް ރިޢާޔަތްކޮށް ވަޒީފާދޭ ފަރާތުގެ ޙައްޤުތަކަށްވެސް ރިޢާޔަތްކުރައްވައި ދެފަރާތަށް އެންމެ މަސްލަޙަތުހުރި ގޮތުގެ މައްޗަށް ރިޢާޔަތްކުރަންޖެހޭނެއެވެ. (ޕެރ. 03 (ރ))

ޤައުމީ ސަލާމަތާ ގުޅިފައިވާ ވަޒީފާއެއް އަދާކުރާ ފަރާތްތަކުގެ މައްޗަށް ވަޒީފާދޭ ފަރާތުގެ އިތުބާރުއޮތުން އެވަޒީފާގެ ބާވަތުން މުހިއްމުވާތީ، އެފަދަ ވަޒީފާއެއްގައި ހުންނަ މުވައްޒަފެއްގެ މައްޗަށް އޮންނަންޖެހޭ އިތުބާރު ގެއްލިފައިވާކަމަށް ބެލެވިގެން ވަޒީފާއިން ވަކިކޮށްފައިވާ ޙާލަތެއްގައި، މައްސަލައިގެ ވަށައިގެންވާ ކަންކަމަށާއި ވަޒީފާއަދާކުރާ ތަނާއި ވަޒީފާގެ މަސްއޫލިއްޔަތުތަކަށް ބަލައި، ވަޒީފާ އަނބުރާ ރުޖޫޢަކުރުމަކީ އެންމެ މަސްލަޙަތު ހުރި ގޮތް ނޫންކަމަށް ކަނޑައެޅިދާނެއެވެ. (ޕެރ. 03 (ރ))