މުޙައްމަދު އަސްލަމް ވ. އެޓަރނީ ޖެނެރަލްގެ އޮފީސް

ޢުމުރު ބަދަލުކުރުމަށް އެދި ހުށަހަޅާ މައްސަލަތަކުގައި ޝަރީޢަތުން ގޮތެއް ކަނޑައަޅަންވާނީ، އެ މައްސަލައެއްގެ ބާވަތަށާއި ހުށަހަޅާފައިވާ ލިޔުންތަކަށް ރިޢާޔަތްކޮށް އޭނާ ރަށްވެހިވެފައިވާ ރަށެއްގެ ރަށު ކައުންސިލަށް ނުވަތަ މާލޭ ސިޓީ ކައުންސިލަށް، ނުވަތަ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަނަށް ނުވަތަ މިނޫނަސް މިފަދަ މަޢުލޫމާތު ރައްކާތެރިކޮށް ބެލެހެއްޓުމަށް ޚާއްސަކުރެވިފައިވާ އިދާރާތަކަށް ޢުމުރާބެހޭ ގޮތުން ލިޔެ އިތުރަށް މަޢުލޫމާތު ސާފުކުރުމަށްފަހު އެ ލިބުނު މަޢުލޫމާތަކަށާއި އަދި މިނޫނަސް ކޯޓުން ޤަބޫލުކުރާ، ރަސްމީ ލިޔުންތަކަށް ރިޢާޔަތްކުރުމަށްފަހުގައެވެ. (ޕެރ. 3(ހ))

އުފަން ތާރީޚު އަންގައިދޭ ރަސްމީ ލިޔުމެއް އޮތްނަމަ، އުފަންދުވަސް ކަނޑައެޅުމުގައި ހެއްކެއްގެ ގޮތުގައި ބަލަންވާނީ އުފަންތާރީޚް އަންގައިދޭ ރަސްމީ ލިޔުމެވެ. ހެކިންގެ ހެކިބަހުގެ މައްޗަށް ރިޢާޔަތްކޮށްގެން، އުފަންތާރީޚާބެހޭގޮތުން ގޮތެއް ކަނޑައަޅާނީ އުފަންތާރީޚު އަންގައިދޭ އެއްވެސް ރަސްމީ ލިޔުމެއްނެތްކަން ޝަރީޢަތަށް ސާބިތުވާ ޙާލަތުގައެވެ. (ޕެރ. 3(ށ))

އުފަންތާރީޚު އަންގައިދޭ އެއް ލިޔުމަށްވުރެ ގިނަ ލިޔުން ހުރެ އެލިޔުންތަކުގައިވާ މަޢުލޫމާތު ތަފާތުނަމަ، އުފަންތާރީޚް ކަނޑައެޅުމުގައި ބަލާނީ އެތަނުން އެންމެ ސައްޙަކަން ބޮޑު ލިޔުމަށެވެ. (ޕެރ. 3(ށ))

ޢުމުރު ބަދަލުކުރުމަށް އެދި ހުށަހަޅާ މައްސަލަތަކުގެ ތެރެއިން ރަސްމީ ލިޔުމެއްގައި އޮތް ޢުމުރަކީ އަސްލު ޢުމުރުނޫންކަމަށް ސަލާމަތް ބުއްދިއަށް ޤަބޫލުކުރެވޭނަމަ (މިސާލަކަށް ބޭބެއަށްވުރެ ކޮއްކޮގެ ޢުމުރުން ދޮށިވުން ނުވަތަ މައިންބައިފައިންނާއި ދަރިފުޅުގެ ޢުމުރު ދާދި އެއްވަރުވުން) ފަދަ މައްސަލަތައް ފާހަގަވާން ހުރިނަމަ، އުފަންތާރީޚު އަންގައިދޭ ރަސްމީ ލިޔުމެއް އޮތްނަމަވެސް ހެކިންގެ ހެކިބަހަށް ރިޢާޔަތްކޮށްގެން ޢުމުރާއި ބެހޭގޮތުން ގޮތެއް ނިންމިދާނެއެވެ. (ޕެރ. 3(ށ))

ޤާނޫނު ނަންބަރު 76/24 (ހެއްކާބެހޭ ޤާނޫނު) ގެ 5 ވަނަ މާއްދާގައި ބުނާފަދަ އުފަންތާރީޚު އަންގައިދޭ ރަސްމީ ލިޔުމެއްކަމުގައި ބެލިދާނެ ލިޔުންތަކަކީ އެމީހެއްގެ ފޫޅުމާ ފޯމާއި ވިހާމަރުވާއާއި، އުފަންވުމުގެ ރަޖިސްޓްރީއާއި އުފަންދުވަހުގެ ސެޓްފިކެޓާއި އެމީހެއްގެ ކާކުކަން އަންގައިދޭ (އައި.ޑީ) ކާޑާއި ޕާސްޕޯޓުފަދަ ލިޔުންތަކެވެ. (ޕެރ. 3(ނ))

ފަރާތެއް އަމިއްލައަށް ރަސްމީ އިދާރާއެއްގައި އިޤުރާރުވެފައިވާކަމަކާއި ދެކޮޅު އަދި އުފަން ތާރީޚު އަންގައިދޭ ލިޔުންތަކުގެ ތެރެއިން ފެންނަން އޮތް އެންމެ ސައްޙަކަން ބޮޑު ލިޔުމާއި ދެކޮޅު އެކަންކަން ނަފީކުރާފަދަ ހަރުދަނާ ހެކިތަކެއް ޝަރީޢަތަށް ހުށަހެޅުމަކީ އެ ފަރާތް އުފުލަންޖެހޭ ބުރައެކެވެ. (ޕެރ. 3(ރ))

ހައިކޯޓުން މައްސަލަ ބަލަނީ ދަށުކޯޓަށް ހުށަހެޅުނު ހެކިތަކާއި ޤަރީނާތައް އަސާސްކަމުގައި ބަލައިގެން ކަމުން، ދަށުކޯޓުގައިވެސް ހައިކޯޓުގައިވެސް މީގެ ކުރިން އެއްވެސް އަޑުއެހުމެއްގައި ފާހަގަކޮށްފައި ނުވާ އައު ކަމެއް، އަޑުއެހުންތައް ނިމި ޙުކުމްކުރުމަށް ބޭއްވި ޝަރީޢަތުގެ މަޖިލީހުގައި ފާހަގަކުރުމުން، އެކަން އިތުރަށް ހައިކޯޓުން ބަލައި އެކަމާ ގުޅޭ ގޮތުން ގޮތެއް ކަނޑައެޅެން ނެތެވެ. (ޕެރ. 3(ބ))

މައްސަލައިގެ ބާވަތަށް ބަލާއިރު ފާހަގަކުރާ ކަމަކީ މުހިއްމު ކަމެއްކަމުގައި ބެލެވޭނަމަ، އަލަށް ފާހަގަކުރެވުނު ހެއްކާއި އެކު މައްސަލަ އަލުން ދަށުކޯޓަށް ހުށަހެޅުމުގެ ފުރުޞަތު އޮވެއެވެ. (ޕެރ. 3(ބ))