އިސްމާޢީލް އަޒްމީ ޢަދުނާން ވ. އަޙްމަދު މުޙައްމަދު

ނަތީޖާ: ދަށުކޯޓުގެ ޙުކުމް ބާޠިލުކޮށް، އަލުން ބެލުމަށް ސިވިލް ކޯޓަށް ފޮނުވި

ކީވޯޑުތައް: އެއްބަސްވުމާ މެދު ޚިލާފު އުފެދިގެން

ދަށު ކޯޓު: ސިވިލް ކޯޓު 856/Cv-C/297

ކޯޓުން ނިންމަން ޖެހުނު ސުވާލު

ކޯޓުގެ ހުއްދަ ލިބިގެން ރާއްޖެއިން ބޭރަށް ގޮސްފައިވާ ދަޢުވާލިބޭ ފަރާތަށް ޙާޟިރުވުމުގެ އަމުރު ރައްދުނުވުމުން އޭނާގެ ޣައިރު ޙާޟިރުގައި މައްސަލަ ހިންގާ ޙުކުމްކުރީ ޤާނޫނީ އުޞޫލުތަކާއި ކަނޑައެޅިފައިވާ އިޖްރާއަތާ އެއްގޮތަށްތޯ.

ކަނޑައެޅި ޤާނޫނީ އުޞޫލުތައް

1. ދަޢުވާލިބޭ ފަރާތް ރާއްޖެއިން ބޭރަށް ފުރާފައިވަނީ ކޯޓުން ޗުއްޓީ ދީ ހުއްދަ ލިބިގެންނަމަ، 'ކޯޓުގެ ހުއްދަ ނެތި ރަށުން ބޭރަށް ފުރާފައިވާތީ' ކަމަށް ބުނެ އޭނާގެ ޣައިރު ޙާޟިރުގައި މައްސަލަ ހިންގުމަށް ނިންމުމަކީ ރަނގަޅު ޙަޤީޤަތެއްގެ މައްޗަށް ބިނާކޮށް ނިންމާ ނިންމުމެއް ނޫނެވެ. (ޕެރ. 15)
2. ކޯޓުން ދިން ޗުއްޓީގެ މުއްދަތުގައި އެނބުރި ނާދެވޭނަމަ، އެކަން ކޯޓަށް އަންގައި ޗުއްޓީ އިތުރުކުރުމަކީ އެ ޚަޞްމުގެ ޒިންމާއެކެވެ. (ޕެރ. 16)
3. މަދަނީ މައްސަލައެއްގައި ދަޢުވާލިބޭ ފަރާތަށް ޗިޓް ރައްދުނުކުރެވޭނަމަ ޣައިރު ޙާޟިރުގައި މައްސަލަ ހިންގޭނީ 'ކޯޓަށް މީހުން ޙާޟިރުކުރުމުގައި ޢަމަލުކުރާނެ ގޮތުގެ ގަވާއިދު' ގެ 28 ވަނަ މާއްދާއާ އެއްގޮތަށެވެ؛ ޙާޟިރުކުރަންޖެހޭ މީހާ ދީފައިވާ އެޑްރެހުގައި ނެތްނަމަ ނުވަތަ ވީތަނެއް ނޭނގޭނަމަ، އޭނާ ހޯދުމަށް ޚަބަރު ފަތުރާ ވަސީލަތްތަކުން އިޢުލާނުކުރަންވާނެއެވެ. (ޕެރ. 17–18)
4. ޣައިރު ޙާޟިރުގައި މައްސަލަ ހިންގަން ނިންމުމުގެ ކުރިން ކަނޑައެޅިފައިވާ އިޖްރާއަތު ފުރިހަމަކޮށްފައިވާކަން ޝަރީޢަތް ނިމުނު ގޮތުގެ ރިޕޯޓުން ނުވަތަ ފައިލުން ނޭނގޭނަމަ، ޣައިރު ޙާޟިރުގައި ކުރި ޙުކުމް ބާޠިލުކޮށް، މައްސަލަ އަލުން ބެލުމަށް ދަށުކޯޓަށް ތަޙްވީލުކުރެވެއެވެ. (ޕެރ. 18–19)

ބަލާފައިވާ ޤާނޫނުތައް

• ކޯޓަށް މީހުން ޙާޟިރުކުރުމުގައި ޢަމަލުކުރާނެ ގޮތުގެ ގަވާއިދުގެ 28 ވަނަ މާއްދާ (ހ)
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 46 ވަނަ މާއްދާގެ (ށ)
• ހައިކޯޓުގެ ނަންބަރު 2014/HC-A/240 ޤަޟިއްޔާ (އަޙްމަދު މަމްދޫޙު ވ. ބޭންކް އޮފް މޯލްޑިވްސް)
• ހައިކޯޓުގެ ނަންބަރު 2014/HC-A/247 ޤަޟިއްޔާ (ޖާރނީ ވޯލްޑް މޯލްޑިވްސް ޕްރައިވެޓް ލިމިޓެޑް ވ. މާލެއަތޮޅު ހިންމަފުށި ކައުންސިލްގެ އިދާރާ)
• ސުޕްރީމް ކޯޓުގެ ނަންބަރު 2021/SC-A/02 ޤަޟިއްޔާ (އެޓޯލް ބެންޑް ޕްރައިވެޓް ލިމިޓެޑް ވ. މޫސާ ޢަބްދުއްރަޙީމް)