—

ޖިނާއީ އިޖުރާއަތުގެ ޤާނޫނަށް ޢަމަލުކުރަން ފެށުމާއެކު، އެޤާނޫނަށް ޢަމަލުކުރަން ފެށުމުގެ ކުރިން ޢަމަލުކުރެވެމުން ދިޔަ ޢާންމު ޖިނާއީ އިޖުރާއަތާ ގުޅޭ އެންމެހައި އުސޫލުތައް ބާޠިލުވާނެކަން އެޤާނޫނުގެ 212 ވަނަ މާއްދާގެ (ށ) އަށް ބެލުމުން އެނގެއެވެ؛ ޖިނާއީ ކުށް ކަނޑައެޅުމުގެ ޚާއްޞަ ޤާނޫނެއްގައި ވަކި ކަމެއް ކުރުމުގެ ޚާއްޞަ އުޞޫލުތަކެއް ކަނޑައަޅައިދީފައިވާ ޙާލަތުގައި ފިޔަވައި، 212 ވަނަ މާއްދާގެ (ނ) ގައި ބަޔާންކޮށްފައިވާ ކަންކަމުގައި (ކޯޓު އަމުރު ހޯދުމާއި، މީހުން ހައްޔަރުކުރުމާއި ބަންދުކުރުން ހިމެނޭ ގޮތުން) ޢަމަލުކުރަންވާނީ ޖިނާއީ އިޖުރާއަތުގެ ޤާނޫނާއި އެ ޤާނޫނުގެ ދަށުން ހަދާ ޤަވާޢިދުގައި ބަޔާންކޮށްފައިވާ ގޮތުގެމަތިންނެވެ. (ޕެރ. 3(ށ))

ކުށެއްގެ ތުހުމަތުގައި ބަންދުކުރެވޭ މީހުންގެ ބަންދާމެދު ގޮތެއް ނިންމުމުގައި މިހާރު ޢަމަލުކުރަންޖެހޭނީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) އާއި އެ ޤާނޫނުގެ ދަށުން ހަދާ ޤަވާޢިދުގައި ބަޔާންކޮށްފައިވާ ކަންތައްތަކަށެވެ. (ޕެރ. 3(ށ))

ކުށެއްގެ ތުހުމަތުގައި ބަންދުކޮށްފައިވާ މީހާ ބަންދުކޮށްފައިވަނީ ޤާނޫނީ ހަމަތަކުގެ މަތިންތޯ ކަނޑައެޅުމަށްޓަކައި ވީ އެންމެ އަވަހަކަށް އަދި ހައްޔަރުކުރެވޭތާ ލަސްވެގެން 24 ގަޑިއިރުގެ ތެރޭގައި ފަނޑިޔާރެއްގެ ކުރިމައްޗަށް އޭނާ ޙާޟިރުކުރަންވާނެއެވެ؛ ކޯޓު އަމުރެއްގެ ދަށުން ހައްޔަރުކުރެވޭ މީހަކުވެސް ބަންދުގައި ބަހައްޓާނަމަ އެގޮތުގެ މަތިން ފަނޑިޔާރެއްގެ ކުރިމައްޗަށް ހާޒިރުކުރަންވާނެއެވެ؛ މިފަދައިން ބޭއްވޭ އަޑުއެހުމަކީ އެ ޤާނޫނުގެ ބޭނުމަށްޓަކައި ޝަރީޢަތުގެ މަޖިލީހެކެވެ. (ޕެރ. 3(ށ))

ކުށުގެ ތުހުމަތުގައި ބަންދުކުރެވޭ ފަރާތް ފަނޑިޔާރެއްގެ ކުރިމައްޗަށް ހާޒިރުކުރަންޖެހޭނެ ކަމަށް 58 ވަނަ މާއްދާގައި ބަޔާންކުރެވިފައިވުމުގެ މަޤުޞަދަކީ، އެފަރާތް ބަންދުކުރެވިފައިވަނީ ޤާނޫނީ ހަމަތަކުގެ މަތިންތޯ ކަށަވަރުކުރުމާއެކު އެފަރާތުގެ ޙާލަތުވެސް ވަޒަންކޮށް ދެނެގަތުމަށް މަގުފަހިކުރުމެވެ؛ ވުމާއެކު، ބަންދުކޮށްފައިވަނީ ޤާނޫނީ ހަމަތަކުންތޯ ކަނޑައެޅުމަށްޓަކައި ބޭއްވޭ ޝަރީޢަތުގެ މަޖިލީހަކީ އެޝަރީޢަތް ބޭއްވޭ ކޯޓުގައި ފަނޑިޔާރުގެ ކުރިމައްޗަށް އެ މީހާ ހާޒިރުކޮށްގެން ބާއްވާ ޝަރީޢަތުގެ މަޖިލީހަކަށް ވާންޖެހޭނެއެވެ؛ ޖިނާއީ އިޖުރާއަތުގެ ޤާނޫނަށް ބަލާއިރު ބަންދާމެދު ގޮތެއް ނިންމަން ބޭއްވޭ ޝަރީޢަތުގެ މަޖިލިސް އޯޑިއޯ ކޮންފަރެންސް މެދުވެރިކޮށް ކުރިއަށް ގެންދެވިދާނެކަމަށް ނުފެނެއެވެ. (ޕެރ. 3(ށ))

ޖިނާއީ އިޖުރާއަތުގެ ޤާނޫނުގައި ޖިނާއީ މައްސަލައެއް އޯޑިއޯ ކޮންފަރެންސް މެދުވެރިކޮށް ކުރިއަށް ގެންދެވިދާނެ އެއްވެސް އިސްތިސްނާ ޙާލަތެއް ބަޔާންކޮށްފައި ނުވެއެވެ؛ ނަމަވެސް ވީޑިއޯ ކޮންފަރެންސް މެދުވެރިކޮށް ހެކިބަސް ނެގުމަށް 148 ވަނަ މާއްދާގައި ދީފައިވާ އިސްތިސްނާއަށް ބަލާއިރު، ބަންދު އަމުރާ ގުޅޭ މައްސަލަތަކުގައިވެސް ތުހުމަތުކުރެވޭ މީހާ ހުރީ އެހެން ރަށެއްގައި ކަމަށްވެފައި، އޭނާ ޝަރީޢަތަށް ހާޟިރުކުރުމަށް ހުރި ތަކުލީފުތަކެއްގެ ސަބަބުން މައްސަލަ ނުހިންގި ޢަދުލު އިންސާފު ޤާއިމުކުރުމަށް ހުރަސް އެޅޭކަމަށް ފަނޑިޔާރަށް ޤަބޫލުކުރެވިއްޖެ ހިނދެއްގައި، ވީޑިއޯ ކޮންފަރެންސް މެދުވެރިކޮށް ޝަރީޢަތުގެ މަޖިލިސް ކުރިއަށް ގެންދެވިދާނެއެވެ. (ޕެރ. 3(ނ))

ކޯޓު އަމުރު ނެރުއްވުމަށް ބޭއްވުނު ޝަރީޢަތުގެ މަޖިލިސް އޯޑިއޯ ކޮންފަރެންސް މެދުވެރިކޮށް ކުރިއަށް ގެންގޮސްފައިވާނަމަ، އެ ކޯޓު އަމުރު ނެރުއްވުމުގައި ޢަމަލުކުރައްވާފައިވަނީ ޖިނާއީ އިޖުރާއަތުގެ ޤާނޫނުގެ 58 ވަނަ މާއްދާގައި ބަޔާންކޮށްފައިވާ އިޖުރާއަތާ އެއްގޮތަކަށް ނޫނެވެ. (ޕެރ. 3(ރ))