ޙައްވާފާނު ވ. ގއ. ވިލިނގިލި ކައުންސިލް އިދާރާ

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ގއ. ވިލިނގިލި މެޖިސްޓްރޭޓް ކޯޓު 201/P2C/2015

ކޯޓުން ނިންމަން ޖެހުނު ސުވާލު

ސުނާމީގައި ހަލާކުވި ގޭގެ ބަދަލުގައި ގެއެއް އަޅައިދޭން ކައުންސިލް އިދާރާއަށް ލާޒިމުވޭތޯ، އަދި ކައުންސިލް އިދާރާއަކީ އެ ދަޢުވާ އުފުލެވޭނެ ފަރާތެއްތޯ؛ އަދި ޖުމްލަ ގޮތެއްގައި ހުށަހަޅާ އިސްތިއުނާފީ ނުކުތާތަކުގެ މައްޗަށް ދަށުކޯޓުގެ ޙުކުމް ބަދަލުކުރެވޭތޯ.

ކަނޑައެޅި ޤާނޫނީ އުޞޫލުތައް

1. ދަށުކޯޓުތަކުން ނިންމާ މައްސަލަތަކުގެ ތެރެއިން އިސްތިއުނާފަށް ހުށަހެޅޭ މައްސަލަތަކުގައި ހައިކޯޓުން ގޮތެއް ކަނޑައަޅަނީ (1) ޤާނޫނު މާނަކުރުމުގައި ކުށެއް ހެދިފައިވާ ނުވަތަ ނިންމުން ޤާނޫނާ ޚިލާފުކަމަށް ދެކޭ ޙާލަތުގައި، އަދި (2) ނިންމުމަށް އަސަރުކުރި އިޖުރާއީ ޢައިބެއްގެ ސަބަބުން އެ އިޖުރާއަތު ބާޠިލުކަމަށް ދެކޭ ޙާލަތުގައެވެ. (ޕެރ. 8)
2. ކޯޓުތަކުގެ ޤާނޫނުގައިވާ ޙާލަތެއް އޮތްކަން ހާމަކޮށް ހުށަހެޅުމަކީ އިސްތިއުނާފުކުރާ ފަރާތުގެ ޒިންމާއެކެވެ؛ ޤާނޫނެއްގެ މާއްދާއަކަށް ޙަވާލާދީ ޖުމްލަ ގޮތެއްގައި ނިންމުން ގޯސްކަމަށް ބުނުމަކުން އެ ޒިންމާ އަދާނުވެ، ދަށުކޯޓުގެ ނިންމުން ރަނގަޅުނޫން ސަބަބު ޤާނޫނުގެ މާއްދާތަކާއި ޤާނޫނީ އުޞޫލުތަކުގެ އަލީގައި ބަޔާންކުރަން ޖެހެއެވެ. (ޕެރ. 9-10)
3. ޤާނޫނު ނަންބަރު 7/2010 ގައި ކައުންސިލްތަކަށް ލިބިދީފައިވާ މަސްއޫލިއްޔަތުތަކާއި ބާރުތަކުގެ ތެރޭގައި ގެ އެޅުމާއި މަރާމާތުކުރުން ނުހިމެނޭތީއާއި، ސުނާމީއަށްފަހު ގެ އެޅުމުގެ މަސައްކަތް ކުރީ ހައުސިންގ މިނިސްޓްރީގެ މެންޑޭޓްގެ ދަށުން، ކައުންސިލްތަކުގެ ދައުރަކީ މެދުވެރިޔާގެ ދައުރުކަމުން، މިނިސްޓްރީން އަދާނުކުރި ޒިންމާއެއް ކައުންސިލް އިދާރާއަކުން ނުއުފުލެއެވެ؛ އެ ދަޢުވާއަކީ ކައުންސިލް އިދާރާގެ މައްޗަށް ކުރެވޭނެ ދަޢުވާއެއް ނޫނެވެ. (ޕެރ. 11-12)

ބަލާފައިވާ ޤާނޫނުތައް

• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު)
• ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު)
• ސުޕްރީމް ކޯޓު: ޢިމާދު ޔޫސުފް ވ. ސީ. އެންޑް ސަން މޯލްޑިވްސް ޕްރައިވެޓް ލިމިޓެޑް [2021] SC 09